【三十歲，so what？】
前兩日睇到李慧詩拎完銅牌後嘅訪問，佢講到成日有報導不停提到佢「已、經、34、歲」，令我諗起呢個世界其實真係有好多三姑六婆鍾意用年齡去綁住身邊嘅人。
今年正好係我踏入三十歲嘅一年，三十歲之後我嘅人生其實並無咩變化，咪一樣好似廿九歲嘅時候咁生活。但偏偏就會有好多人提醒我：你、已、經、三、十、歲。
近呢一兩年最多人提醒我嘅就係我個子宮已經唔年輕，有仔要趁嫩生呀，三十歲要係時候結婚啦等等。呢個社會經常都會將女人同年紀掛鉤，三十歲變成女人大限，青春終點，要係時候安心去搵個男人結婚生仔，然後過住依附別人、埋沒自己、成全下一代⋯嘅配角生活。相反男人呢，男人三十歲先係起步點，唔使急住結婚㗎，因為老咗都一樣可以溝到後生女，老咗精子一樣活躍。
呢種「三十之限」喺我細個嘅時候影響得我好深，以前我覺得自己要廿八歲結婚、三十歲生仔，咁先係幸福正確嘅人生。但去到人愈大，愈覺得每個人都有自己嘅步伐，我實在無法勉強自己去追唔知邊個訂落嚟嘅時間表。而我更加唔再認為三十係一個deadline，雖然皺紋同老態的確會出現，但係我依然覺得有好多野想做，亦有好多野可以做得到。
幾年前我就有一個諗法，我覺得一個人去到三十歲先係真正嘅成年，三十歲先係一個真真正正嘅大人。即使如此，但大人依然可以去做好多事，大人依然可以按照自己嘅自由意志去生活，唔一定要去追逐大眾嘅時間表，逼自己複製其他人嘅人生。
一個人老定係唔老，年齡唔係重點，心態先係最重要。切忌被自己/別人用年齡去局限你嘅可能性，未到終點就急急停步。
我個子宮嫩唔嫩，關你撚事咩。
IG：@hkgirlfriend
FB：港女友
