“Nothing Compares to You” — Bowmore 10 Years -- Dark and Intense
Patreon: https://www.patreon.com/posts/36691399
Medium: https://link.medium.com/Ryu5U5Cwb6
//
雖然政府帶頭五月初復工，但係距離唔使戴口罩出街嘅日子仍然遙遠。 #酒精抗疫 嘅歲月，大不了變 #酒精抗逆 ，畢竟人生中嘅逆境，社會中嘅逆境求存，同樣迢長而路遠。
最近寫 #較早前錄影 多，加上有部份時間去咗打機，投放喺酒精嘅筆墨難免少咗。但當然唔代表我冇飲啦，仲有新買入嘅威士忌添。新品種遲啲開咗會介紹，今次想同大家分享嘅，係受疫情影響而一支難求嘅 Bowmore 10 Years -- Dark and Intense (以下簡稱「10 仔」) 。
唔係講笑，呢支份屬 Travel retail-exclusive 三兄弟之一 (另外兩支係 15 年及 18 年，18 年嗰篇早前已經寫咗) ，主要喺機場發售 (當然都有舖頭會喺門市或者網上銷售) ，咁而家民航受封關同強制檢疫影響而癱瘓， 10 仔自然貨源短缺。
- - -
初次同 10 仔見面，係喺 2019 年 8 月底。記性好嘅朋友大概會記得我早前寫過， Veggle Cafe 觀塘店結業，我嘅一位長期讀者 G 帶咗支 10 仔，同一眾友好為 Veggle 「謝幕」。
其時我入坑未深，只係覺得 10 仔比起其他試過嘅品種，嚟得比較有性格，絕對唔係大眾臉或者友誼小姐。一旦有咗呢個覺悟，自然就會慶幸自己當初冇手多多、貪方便走去買 Johnny Walker 或者 Chivas 嘅 blended whisky 。
我唔係話 JW 或者 Chivas 差，而係佢哋本身係經過調和嘅威士忌，對於某啲酒客嚟講可能比較容易入口 (可能因為咁，唱 K 要用 JW 溝道地綠茶) ，但係於我而言，呢類型嘅烈酒比較上冇性格。唔信嘅，日後試下問人記唔記得 JW Black Label 係咩氣味、飲落係咩口感？
- - -
兩個幾月之後，有支 10 仔嚟咗我屋企。並無預先刻意安排，只係 follow my heart 咁，將呢支 10 仔帶咗返屋企。
急不及待以酒杯相待。揭開錫紙封條，將木塞緩緩扭開，優雅嘅泥煤香氣漸漸散發，似要邀請酒精如我進一步試探。
將十年佳釀倒進玻璃杯，深沉嘅琥珀色，暗藏一絲光芒，清澈但深不見底。
舉杯聞香，再次確認係曾經有過一面之緣嘅舊相識。獨特嘅風味，有人視之如保濟丸、敬而遠之，有人偏偏喜歡，猶如愛這電油味嘅盧巧音。
10 仔酒體渾圓厚重，流過舌頭，擁抱過味蕾，留下剛烈嘅泥煤香氣，酒如其名， Dark & Intense 。韻味長久，層層遞減。
- - -
有次同酒友四哥講起，佢覺得 10 仔太飽滿，太刻意著跡強調 peaty 特色。咁佢本身鍾情輕泥煤嘅 Bunnahabhain ，Bowmore 本來就唔係四哥嗰杯茶。
何況 10 仔喺 Bowmore 一眾有年份嘅出品當中，算係比較年輕，較諸成熟而平衡，甚或帶有「番梘味」嘅老前輩 (Bowmore 18 喺泥煤同果香之間嘅平衡的確比較出色) ， Bowmore 10 就好比修行滿師，但仍待身體力行嘅小伙子，毋須修飾，棱角稍為磨過但仍見痕跡。
及後， Bowmore 10 成為咗我屋企生活日常嘅 daily drinks ，一公升飲盡，又買一支。雖然期間總有其他新嘅良伴加入，進駐廚房同酒架每個角落，但係需要或值得 encore 嘅，唯有 10 仔。
盧巧音初出道時造型一度酷似 Sinead O'Connor ，唱腔亦多少受其影響，更曾經喺演唱會翻唱 “Nothing Compares to You” 。好唔好聽，見仁見智。但 Sinead O'Connor 本尊自得一個， Candy Lo 經過歲月洗禮後，亦走出《好心分手》嘅套路，近年新作《哲學家》與《一夜白頭》亦更見其個人風格。
有一種人，就係咁愛恨分明，而且對於別樹一格嘅事物情有獨鍾。如果你係天蠍座，大抵就會明白。
祝大家都搵到屬於自己嘅 Bowmore 10 Years -- Dark and Intense。
- - -
臨尾附上官方 tasting note (賴叔英譯中) 畀大家參考返：
- 聞香：經日照曬乾嘅果實，烤焗過嘅西維爾香橙，烘培過嘅楓葉
- 嚐味：提子乾、海鹽及深色果實油
- 餘韻：泥煤煙薰過嘅核桃及香料
- - -
[頭盔] 賴叔係鼻敏感患者，嗅覺係正常人一半；又由於青春期喪食白烚翠玉瓜同娃娃菜，味覺都係正常人嘅一半。
所以，我講啲咩都好，大家最好 take it with a pinch of salt 。唔好阿叔講乜就講乜，自己用個鼻、用條脷，試真佢。 [/頭盔]
- - -
想睇更多賴叔時政見聞、金融掃盲及職場文章，請訂閱 Patreon:
https://www.patreon.com/shuklai
#hk #hongkong #patreon #blogger
好心分手 翻唱 在 Affectionate singing "Good Heart Breaking" listened to the ... 的推薦與評價
亮声音乐# 好心分手 #卢巧音今天由Kie和大家分享，卢巧音的《 好心分手 》，经典歌曲就是经典，再听依旧怀念！大家好，这里是亮声音乐，斗鱼TV， ... ... <看更多>