《揀鞋同揀人》
大部份男人，除咗波鞋愛好者同潮流達人之外，鞋都唔會太多，一對出街鞋，一對返工鞋，一對運動鞋，一對波鞋之類就差唔多；女人鞋……以我印象中數已經有，出街鞋（深色系）、出街鞋（淺色系）、運動鞋（有款，其實都係出街）、運動鞋（真係做運動）、平底鞋、高跟鞋（盛裝有牌子）、高跟鞋（中度聚會使用）、名牌鞋……
話說有日我老婆同我講，不如你買過對鞋啦，我心諗，呢對鞋我好似買左兩個月左右，點解要買呢？佢話，我覺得唔好睇；我話，但我著得舒服喎。
所以話，男人同女人睇鞋真係好唔同，好多次老婆佢行行下話鞋刮腳同痛，然後要即時去買膠布比佢貼，我成日問，點解對鞋咁唔舒服都要著呢？佢話，靚囉，靚比舒服重要，咁當然又靚又舒服就係可遇不可求嘅事喇。
買鞋真係一種學問，好似揀伴侶咁，入到鞋舖，我地憑價錢、憑款式去尋找一對適合自己嘅鞋，唔好話咩人只係單憑外表同條件去揀伴侶，因為係揀鞋呢樣野上面，男同女都係一樣，對於陌生人，你唔憑咁去選擇，唔通你可以係目測就睇得出佢咁深入嘅內在咩？
當你見到一對心儀嘅鞋，首先你需要睇有冇碼，有冇貨，有冇色，就好似要睇下對方會唔會仲Avaliable一樣，當佢有貨，你就可以試穿，係舖入面行兩步，照鏡睇下襯唔襯；好似剛剛認識對方咁，佢係最新最靚，行兩步，未體現到長途競賽，擁有好感先會試，咁一定睇得順眼嫁。
買走之後，先至係真正開始，當你著足一日兩日三日時，一對鞋好唔好著先會真正浮現，鞋舖有地墊又係平地，行兩步點會試得好，但相處落就知道光鮮以外，會同時承受咩痛苦。
鞋，靚唔靚，通常都比人睇既，因為你唔會一直行住望對鞋，買左一輪之後，你唔會再好在意外表，反而你著住佢時，你只會關心舒唔舒服，再靚既鞋，唔舒服你只可以忍，又或者改變自己去迎合一對鞋。
男人唔會明點解女人會有咁多鞋，腳就得一對，好多鞋買返黎無耐就會打入冷宮，到你幫佢拎去扔時你先會諗起呢對鞋佢無乜著過。
而女人亦唔會明點解男人會得幾對鞋，明明唔襯都要著，有時仲著對波鞋返工，到對鞋個底已經受到嚴重破壞，咁對鞋先會扔，然後再去買返一對相同或者相似既鞋，點解？因為舒服囉，仲有朋友係連續買幾對一模一樣既鞋。
人愈大，買鞋就會愈求舒服，身體跟唔上喇，同埋，已經過左要著對靚鞋去比人睇既年紀，有時同朋友講起鞋都係講返種舒服，明明鞋款真係麻麻都會討論得興高采烈。
你可能會話，小朋友先做選擇，又靚又舒服唔得咩！
係，一定有，但既然又靚又舒服，咁價錢一定唔會平，你買唔買到？買唔買得起？又係另一個故事。
作為一個普通人，靚係著比人睇，舒唔舒服係自己知，要靚定舒服，思考下。
－－－－－－－－－－－－－－－－－－－－－
有興趣購買《弊傢伙，我女朋友有咗》的朋友，可以經以下連結購買：
Payme, FPS, Alipay連結：https://forms.gle/UEdH32PfVD2cp5nK6
掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
