《渣男的自白》
有個大學同學，佢三字頭未成家立室之餘，仲連拍拖都唔定，係佢口中聽到既愛情故事豐富過葉念琛，有一次我終於忍唔住問佢，其實你擺到明係一條粉腸，點解你仲會溝到咁多女呢？
佢拎住杯威士忌問我，酒夠傷身，你又飲？薯條膽固醇高，你又食？然後娓娓道來佢既渣男之道。
渣男，世俗人只會好表面地睇佢唔專一，花心等等，任何事你只係睇佢既後果同壞處，咁一定會好荒謬，因為你無視左佢既價值。
要做渣男唔容易，有部份人佢唔敢渣，但更多人係佢渣唔起，渣男唔易做，因為渣男比絕大部份人都了解女人。
如果一個男人佢外形企理性格溫柔，識主動搵你風趣幽默，關心你起居飲食，工作煩惱；同你傾計時會溫柔既注視你，偶爾讚美你而不失真誠，仲會好細心咁幫你拎野、遞紙、披衣；佢從來唔會管你點洗錢，買唔同衫同鞋佢唔會話你，反而會比意見你點穿搭；經常送小禮物比你，你不經意地講想食咩糖，下次就會出現係你眼前；係特別日子佢會準備驚喜，記得你食麵唔要蔥；就算打機都會先同你講，然後打完又會同你分享日常趣事，你會心動嗎？
如果佢係你唔開心既時候會靜靜聽你講，會將膊頭借比你，會深夜唱歌你聽，會同你講佢點都支持你，任何人質疑你佢都會企你呢邊；佢好奇你所有過去，憧憬你一切未來；佢風趣，但事業上亦有成就，呢種人，你會討厭嗎？
男人唔壞，女人唔愛，呢個道理太表面，就好似白粥夠清淡，沙律菜夠健康，點解食個陣好似受罪咁？
因為人追求既好，唔係單方向，而係種種層面結集分析之後得出既結論。
渣男永遠都有市場，一個又一個中個頭入去，唔係喜歡佢壞，而係比佢好既一面吸引，又妄想可以成為最後一個。
就好似一罐可樂咁，呢一杯會唔會成為導致你糖尿病既最後一罐？無人知，但佢帶比你既即時歡樂，你會瞬間感受到。
凡事都有好壞，專一既好男人，望望自己，除左專一之外，比起渣男有咩優勝之處？如果覺得自己不足既，學下一個仆街好既一面，無壞啊！
女士們，唔好問點解唔可以兩全其美，又專一，又做到上面做既一切呢？
如果你未拍拖，咁既人又易搵咩？有都比人mark左啦；如果你話已經搵到，我男朋友我老公就係咁，咁唔該你唔好太大聲，會令人妒忌啊！
