[ViuTV][理想國 之 後美好時代]
一開始就以反烏托邦、科幻小說經典《美麗新世界》做點題。我冇睇過本書，不過睇咗啲資料，除咗有個自稱或被稱為創造者嘅科技高層、一切以穩定社會為目標嘅手段之外，似乎冇乜關係。我又有諗過個「後」嘅意思，但又似乎對於《美麗新世界》冇乜拆解再重組嘅傾向，諗唔到有咩重點要喺個故事裡面提到呢個經典作品。如果你有睇過又覺得係有關連嘅，請留言指正。
套劇啲對白好唔生活，以係睇緊小說，好書面語，令到感覺好抽離。本來以為係專登設計畀劉天蘭同埋王敏奕嗰個角色，咁都正喎，因為劉天蘭就係自覺高高在上，寫到佢唔貼地都好，而王敏奕係佢設計出嚟，所以佢講嘢都係書面語都合理。但係楊偲泳個角色都係咁，就真係有啲失當。話佢係低下階層出身，又係劇中三個角色當中最貼近社會追求真實嘅人，如果佢啲對白俚民啲，同王敏奕做個對比，而兩者又喺見到現實世界之後有個影響互換，咁就豐富得多，好過王敏奕喺見識完之後只係講咗粒超字咁薄弱。
故事方面，一直講嘅真假，有兩大演繹：一就係「真人VS假人」，二就係「真現況VS假新聞」。依家兩者嘅比例差唔多，或者可以話真現況假新聞嘅篇幅更大。呢個處理唔係唔可行，但啲例子實在寫得太薄弱。嗰個絕食抗議嘅叔叔、得到基金醫佢個女嘅女士，仲有被人拆樓迫遷嘅岑建勳，若果一開始喺休息室度安排一直都好想做個新聞人嘅王敏奕追問楊偲泳，楊偲泳為咗唔穿煲而呃佢，到最尾見到佢哋實況，王敏奕決定要反抗嘅理由就有力得多，依家呢個大橋托唔起，演員做到幾出力都冇用。
至於真人假人方面，亦都係冇乜力量。家人係假嘅，胡卓希演嘅追求者嘅假嘅，都冇乜力，因為我都唔覺得王敏奕對佢哋好投入。或者唔投入都可以，但就要加強返佢對楊偲泳嘅倚重，但劇裡面只係講咗一句佢唔只係我助手仲係我朋友就當交代，真係嘥咗。如果佢哋嘅朋友關係深啲，咁佢哋要分別嗰吓全劇最高位就會好好多。依家兩位女演員喊晒都冇乜感覺，因為佢哋都唔似係深交嘅朋友。
太貪心喇，乜都想講啲。用太多時間透過書面語式嘅對白去講，似文宣多過以劇情講道理。減走晒啲文縐縐嘅對白，唔好齋講，啲戲位喺晒度啦其實，寫多少少應該會好睇得多。
[立即重溫《理想國 之 後美好時代》]
https://viu.tv/en…/the-republic/the-republice3good-news-days
#ViuTV #理想國 #後美好時代 #美麗新世界 #孫曉影 #譚惠貞 #陳翹英 #劉天蘭 #王敏奕 #楊偲泳
