【賣妻勿摸頭 摸頭眼淚流】
預留時間去洗手間，對的士佬黎講係一個必學技能，要訣係知道各區公共水費站喺邊。
黎到九龍灣，個人偏好觀塘海濱公園公廁，貪佢乾淨同靚。呢度仲發生過奇事，下意識想再食花生。
雖然果度雙黃線，但見周圍都擺滿車，咁見有空位就塞入去啦。暢快完出返黎，先留意到前面部Golf Gti旁邊有兩男一女。一般黎講，企得喺私家車隔離都唔會係客，所以我無細心留意佢地，只係諗緊調頭去Mega box，定順去巧明街。
點知一撻車，着燈，其中一個男人就揮手截車，而對男女就上車走。
「將軍澳英明苑。」
「哦好，將。軍。澳。英。明。苑。」雖然隱若有印象點去，但都係set個地圖穩陣。
「跟住前面部車入將軍澳，入到去我再帶你行啦。」
「哦好，唔該你下。」其實說話間，航道已設定完成。跟車？畀人放咁點算。
去到偉業街迴旋處燈位，黃燈在望，就係咁啱，前車過左，我就滯留喺度。
「唉。」後座傳來幽幽嘅嘆息。
「唔洗驚wo，下盞燈紅燈好耐，實跟得上，我都識路。」
「唔係呀，條女係我架，本來。」
「吓，本來？我見你地有講有笑咁。」莫非又係一段可哀可泣嘅綠豆故事？但為免刺傷人地，我唔敢問得更深入，點知乘客自己繼續講。
「佢陪左我幾年架喇，無計啦，我養唔起佢，雖然副偈好好，但都只再以交畀個後生仔，希望佢好好對佢啦。」
「養佢好貴架？」我膽粗粗咁問。
「個幾一公里，最攞命係停車場，而家轉左浮動位又麻煩。」屌，原來講緊部車，人與人之間嘅溝通真係好複雜。
說話間，又到燈位，睇住盞尾燈，佢又唉聲嘆氣。
「養唔起，咪搵多d，或者買架平d嘅囉，唔好唉啦。」
「唉，唔係錢嘅問題，問題係有錢都隨時無位泊，今日唔知聽日事，好難搞。嘩，乜佢咁踩部車架。」入將軍澳隧道上斜，睇住部Gti衝住去，係爽嘅，但後座個乘客就睇到好灰。
「咁又係，我都聽講有d要搶月票。」呢個我真係聽返黎，好似話荃灣搶得好勁。
「唉，所以唯有賣車，始終唔係必要，不過賣左又心噏。點知原來係街坊，大家又喺觀塘做嘢，會見到嘅。」
透過倒後鏡見到佢眼定定咁望住前車，真係好慘，睇住部車畀令一個男人帶走，更慘嘅係睇住個男人揸得咁狼死。
「算啦，人地車住條女，部車加左十匹架。你記住，賣出去嘅車就好似潑出去嘅水一樣，收唔返架。一係買過架啦，叫埋d街坊車主努力d，會搵到車位嘅。」我邊講，邊狠狠左轉離開將軍澳隧道公路落寶琳，終於唔使再對住個乘客嘅EX。
其實，喺香港養車咁辛苦，揸車慘過犯罪，泊車難過拍拖，搭的士咪幾好。
#lazytaxi
#的士
#taxi
#賣車
#泊車
