米媽孕期19週： 手敏感發作&剝智慧齒
米媽呢星期過得很痛苦呢。係物體上的痛苦。
上星期六米媽一直有的手部皮膚過敏又發作，
那種又痕，又腫又刺痛，完全唔掂得任何野的感覺真的非常辛苦。
因為皮膚醫生週末無開，所以星期六日，只能不斷用兩個冰袋敷住手，開住風扇仔吹住對手，訓覺時都一樣，開大冷氣，風扇對住手吹等到佢凍到無知覺無咁痕同痛。
等到星期一睇皮膚醫生，搽藥膏，到今日先終於好7成。但仍痕同紅腫。對手唔可以係冷氣外，或者變返室溫，唔係就會痕返。 米米呢星期見親米媽咁，一直叫米媽係房唔好出黎。米媽去接佢時，佢第一時間係拎起我對手指，係咁幫我吹。問我仲痕唔痕。
呢幾日米媽牙痛到訓唔到覺，前兩日睇過一次，只係話發炎，無蛀牙，開漱口水，原本想開抗生素，後尾醫生又話都係唔好食。米媽諗住盡量唔食就唔食，唔想影響到小花。
今日痛到去睇第二個牙醫。牙醫話米媽隻智慧齒蛀得好犀利，食抗生素都無用。要盡快剝左佢。因為唔係啲菌有機會經血液帶到俾小花。
於是問左婦科醫生話可以照X-ray 同局部麻醉，米媽就話咁晏啲就照剝啦。只要唔影響到小花就照去。
米媽打俾米米，同米米講低米媽要晏少少返。因為牙痛要剝牙。
米： 咁係驚唔驚
米媽：媽咪驚。
米：你怕唔怕痛呀
米媽：媽咪怕呀。
米：咁小花怕唔怕痛呀。
米媽：怕呀。咁點算。
米： 唔好怕，你同小花都忍耐一下就好喇。
你幾時返黎呀。
米媽：我係你晚飯時返到黎喇。
米：媽咪，咁你加油，我訓醒晏覺等你返黎。love you 午安。
多謝你米米，錫住米媽小花。每晚訓前都唱歌我地聽。又照顧米媽。
陀一胎唔易，第二胎都唔易，每一胎都有機會身體出現唔同狀況要去決定點應付，點解決。 做媽媽既，肚內有一個，最怕就係驚做既任何決定會影響到佢。痛唔係最辛苦，影響到佢先係最痛苦。
快啲剝完牙，手又快啲好返曬，做返個開心媽咪😭
（正面啲諗，好在及時睇醫生，係4-6個月期間可以剝牙，唔係過左後就無得做又可愛影響到小花花😊👊🏻）
牙醫係咁問我駛唔駛聽日先剝，等都公黎陪住我。米媽話唔駛啦，唔駛麻煩老公，佢做緊野。我自己搞得掂，醫生都呆左😂。
後尾米媽同米爸講米媽要剝時，米爸自己提出等陣要黎陪米媽。😊
#無病無痛
#呢幾日都無曬心機講但都要保持正能量💪🏻
#小病小痛好快好！💪🏻
#抱抱😭
