8月4日在兩區同時舉行集會遊行，一邊是勇武派圍堵將軍警署，另一邊則是傳統飯民大台集會──但對於已經歷了近兩個月抗爭浪潮的群眾而言，大家早已明白這只是「抗爭大餐」的頭盤而已，真正重點還是在後續博弈。
正如本人一再提及，抗爭者在多番與警方交手後，早已把對手優於武力、而拙於應變的特性摸清摸透：警方和美軍一樣，雖然具有壓倒性優勢的武裝，但卻極度害怕有人員損傷打擊士氣，所以每次出兵皆極端小心，不能作任何冒險進攻──所以防暴隊／速龍隊是在前線鎮壓的唯一選擇；
而且每次鎮壓前，均需要依照教習規條進行列隊、佈陣、警告、出擊，所以為何屢屢在電視我們都會見到防暴警會向空無一人的地方衝鋒？因為防暴教科書一整套規則就係咁，食古不化嘅廢柴指揮官就係只識由頭到尾操一次而絲毫不懂變通。
當知道防暴隊係一個行動遲緩而低智的巨人之後，徹底貫徹Hit & Run戰術就成為了今天抗爭的主菜。抗爭者以磚頭擲擊將軍澳令該區警察顏面掃地；然後再在對抗警力集結前將主力全部轉移至銅鑼灣，並藉此與從西環撤退的隊伍合兵。在確立銅鑼灣為穩守防線後，抗爭別動隊又重覆昨日以快閃形式佔領紅隧入口，直至防暴隊老羞成怒於波斯富街瘋狂發射催淚彈時，即果斷立刻拋棄銅鑼灣防線，宣佈全面轉進黃大仙。
老實講，當我朋友響銅鑼灣視察抗爭者佈防情況，發覺成條防線係佈置得極有心機：唔單止一整條路前後距離達5分鐘路程，有極大縱深進行攻防，而且各出入口亦極好心機設置好各式各樣障礙物──更重要係成條防線有成萬幾人協防，要守足一晚並唔係咩難事──所以當知道得打都未打過就將成條防線放棄，未免覺得有啲可惜。
然後當最後一批抗爭者準備搭地鐵前往黃大仙之時，竟然又傳黎最新指示：因為黃大仙已佈下重兵，所以全部人轉去觀塘警署。然後好不容易趕到觀塘站之時，早已趕到現場、以千計嘅示威者又正在進行撤退，聲稱將會再轉進至油塘……基本上反應比較慢的示威者，除了不斷追尾，有時真係會懷疑，係咪真係要轉得咁密？駛唔駛剩係收到警察出動嘅情報就立刻撤退？
但其實就正正係因為抗爭者敢於放棄既有防線，先至能夠將策略再次升級。
由馬鞍山開始，去到84九西大戰略，就同毛澤東一樣，抗爭者發現防線只具有象徵意義，真正令警察深陷泥沼嘅，還是帶入城市嘅人民戰爭。而家特區警察就好似當年笨重嘅國民黨軍隊一樣，只要被輕易挑撥就會發動進攻，但偏偏反應遲緩同武力過大，卻又會傷及無辜，因而衍生咗一種專門針對佢地嘅「點火策略」：
1. 首先由極少數抗爭者設置路障或圍堵警署，迫使防暴隊／速龍隊出動；
2. 抗爭者迅速撤退，或者隱藏於同情抗爭者嘅街坊掩護之後；
3. 暴怒嘅警察洶湧而出準備報復，偏偏當佢地指照教範規則列好陣型後，面前就只剩低街坊，只要防暴警一沈不住氣進行鎮壓「攞番個尾彩」，當區居民怒火就立刻被點燃。
今天晚上，抗爭者就一次過點燃咗美孚、天水圍、將軍澳、銅鑼灣、黃大仙同觀塘六區。而如果再加上之前嘅馬鞍山、沙田、元朗、葵芳、屯門、旺角，全香港經已有超過一半地區民意係與警察為敵。而當今晚經歷過將軍澳無辜市民爆頭、觀塘警署Head Shot、天水圍女性被性暴力脫裙對待、拘捕者被打至昏迷……每一單都係將當區居民嘅仇警情緒推至高峰。
其實警方要反制「點火策略」嘅方法係非常非常之簡單──就只不過係拿出少少自制力，認清眼前嘅只係普通市民、又或者係難以將市民同抗爭者區分嘅事實，唔好將佢地當成發洩對象。但結果卻係佢地傲慢得完全唔覺得需要節制，非常可悲。
當日612佔領、71衝擊立法會，有好多KOL批評抗爭者係一次又一次中咗林鄭計，比政府藉口進行全面打壓。但依我睇黎，而家警察先係不斷中計果個：當你明知抗爭者就係想你響住宅區濫打濫捕將市民推向對立面，而你仲要一次又一次踩入陷阱之中，又怪得邊個？今晚「點火策略」輕易點燃六個區，全港十八區同時起火嘅日子還會遠嗎？
當各區嘅茶餐廳侍應由批評「後生仔搞亂香港、差佬打佢地就啱」、慢慢轉變成「死黑警亂咁打人拉人，搞倒我啲客同你勢不兩立」之時，我地要問嘅問題就唔再係特區政府會唔會倒台，而係究竟會點樣倒台。
巨沼怪特性 在 [ポケ] 西洽Pokemon補完計畫(43)#260巨沼怪- 看板C_Chat 的推薦與評價