講兩句《鬼同你住》（含劇透）
—
套戲唔係cult片，係一種刻意為之嘅荒謬，但又有咩荒謬得過，香港就係一個咁扭曲嘅地方。
-
近排睇咗幾套香港電影，上嘅未上嘅其實都有睇，但好多都無刻意講，因為自己唔太鍾意，又搵唔到太多值得講嘅角度，但講到當中最鍾意最有驚喜嘅，係尋日上畫嘅《鬼同你住》。
—
對套戲嘅第一個感覺，係覺得戲名太過通俗，以口語入文當然唔係無，算係近年少見，但意思上都好似無咩深意。而電影套路亦明顯，借鬼怪片講香港瘋狂嘅社會，無屋住仲恐怖過同鬼住，未睇套戲，都大概估到套戲講咩。
—
而下一樣立即聯想到嘅嘢，就係自身嘅經歷，唔知大家有無排公屋嘅經驗，作為一個窮到燶嘅香港人，我由自己啱啱成年嗰陣就開始排公屋，到今時今日已經十年有多，樓當然未有排到，但當中比較特別嘅係，政府定時定候就會問你要唔要排埋「特快公屋」。咩係「特快」？通常就係指有問題嘅單位，而有問題嘅單位，其中亦有一定嘅比率係所謂嘅「凶宅」。「凶宅」究竟搶唔搶手呢？根據我嘅經驗，當我每次都剔曬任何可以剔曬嘅選項嘅時候（即係咩區咩大細間屋有咩問題都照要），有機會揀樓嘅次數係——————「零」！由此證明，「凶宅」喺香港，仍然係相當搶手。
—
講返套戲，電影同月前嘅《濁水漂流》一樣，以住屋見眾生，無論你係住富宅，定係捱劏房，都要面對居住嘅問題，窮人有錢人都喺樓市漩渦入面不斷打轉，有錢人就想分家產炒多幾間，窮人就想欺壓比自己更窮嘅人，將每間房劏少十呎。總之有樓就大曬，炒賣就係香港人最大嘅共同價值。
—
唔怕電影荒謬，只係怕佢唔夠誇張，當觀眾見到電影角色為香港嘅寸土尺土而打生打死，喺概念同畫面都玩到極盡顛狂嘅時候，為樓死為樓亡嘅原來唔止係人，連鬼喺香港都無處容身，將嗰份近乎信仰嘅執念帶埋落地府，連死都唔想賤賣自己一生嘅心血！香港人窮一生嘅精力，都只係想有一個安樂嘅「家」，睇《鬼同你住》，應該會有所共鳴。
—
世界咁大，香港人要搵一個容身之所，竟然會咁難。喺電影入面，亦有「外來者」嘅角色，導演以菲傭同南亞裔人士嘅目光睇盡香港荒謬，不約而同都拋下一句[生命逝去嘅地方，就會有另一種生命嘅誕生]，當香港人比地產霸權壓到喘唔過氣之際，又可以有咩出路？又有咩生命可以誕生？
—
電影編導究竟點睇香港嘅未來？我嘅睇法係看似樂觀，但實質係絕對嘅絕望。表面上，包租公帶領劏房戶進行「螞蟻搬家」，即係幫地產商搞掂「一手空置稅」，以即晚居住嘅形式一解住屋嘅燃眉之急，達成雙贏局面；而主角林正源亦帶領屋企人住入別墅級豪宅，睇落去非常正面。但兩者不約而同，窮人都係喺地產商同有錢人嘅鼻息之下苟延殘喘，當政府「辣招」一過，劏房戶即變condom，而當林正源賣到間豪宅，立即又會變成無殼蝸牛。窮人一世，都只能夠活喺有錢人嘅陰影之下，結局愈開心，真相愈悲哀。
—
睇完套戲之後，我突然發現自己忽略咗戲名嘅第二重意思，香港呢個瘋狂嘅城市，淨係掛住搵錢，淨係掛住炒樓，真係一個「鬼同你住」嘅地方！
-
P.s. 我覺得音音姐嘅造型同表現，已經值得一個女配角嘅提名，特揀此圖。
府連 路 凶宅 在 台南東區.這戶非凶宅.但是隔壁戶很兇.看屋驚魂 - Mobile01 的推薦與評價
借標題問一下以前看過文章提到自由路二段或三段有透天的房子是凶宅現在google不到了有人知道哪一間嗎另外樓主看的房子前幾天蘋果新聞有寫到耶 ... <看更多>