關於 強制驗樓資助計劃 ，我們在網路上蒐集到這些相關的討論、資訊與評價

《無異之局》荒村異聞（五）
　　　
「我今日係嚟幫凌少爺報仇。」
　
陌生男人一講完即刻舉起雙手到下巴高度，擺出一副戰鬥格式。見到咁嘅情況我已經第一時間想退後避開，但身體卻冇辦法作出回應，就好似俾一股無形嘅氣震懾住一樣。
　
說時遲那時快，下一秒對方已經對我揮出一下直拳。假如佢真係嚟尋仇，咁呢一拳肯定會置我於死地。諗到呢度，我腦海不禁閃過如初嘅臉頰……
　
但就喺下一瞬間，忽然有另一股力量從背後拉住我，用力將我扯到雙腳凌空……足足扯後到接近三米距離先停落嚟，最後成個人失平衡瞓喺梳化上面。
　
雖然降落姿勢差多少有啲撞傷，但見身體又郁得返，狼狽嘅我即刻諗住起身……
　
「阿聰，唔好亂郁！」但無二突然喝停我。
　
「吓？」
　
就喺佢講完一刻，我背後幾箱裝滿清潔劑嘅紙皮盒突然「啪」一聲爆開，清潔液隨即流滿一地……
　　
＝＝＝＝＝＝＝＝＝
另一篇長故《扮工鬥室》Patreon 連載中！歡迎訂閱支持！
https://www.patreon.com/echoofheart
　
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797&__tn__=-UC-R
　
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
　
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告】《無異之初》、《無異之地》各大書局有售！
＝＝＝＝＝＝＝＝＝
　　
「差少少爆嘅就唔係清潔劑而係你個頭。」無二企起身，目光一直盯住門口嘅陌生男人，「喂，你打我嘅助手都算喇，而家整爛埋啲搵食工具係咩意思先？」
　
雖然講得尖酸涼薄，但頭先顯然係佢救我一命……我自己當然冇能力咁樣避開。
　
「我已經講咗，我係要幫凌少爺報仇。」陌生男人重申。
　
「但你殺人前至少都留低個名……呢個係基本禮儀。」雖然來者不善，但無二依然係表現得相當輕鬆。
　
「在下陸孝忠。」男人放返雙手，「城寨『九龍』之一，四大天師陸孝虎正正係我嘅大哥。」
　
「聽個名都大致估到。」
　
「咁我可以繼續喇？」陸孝忠一腳踏入大門。
　　
「等等先……岳少佢真係死咗！？」我插嘴問，內心當然唔信呢個係事實。
　
陸孝忠只係望咗我一眼但冇回應，再轉向無二問：「十月九日嘅凌晨時間，你哋係咪去過『城寨』搵凌少爺？」
　
「冇錯。」無二照直承認。
　
「嗰晚之後，凌少爺就失蹤咗十幾日。之後幫會全員盡出去搵佢，直到前晚，有成員喺一座山上面發現佢嘅屍體。」
　
「所以，你哋『城寨幫』就認定兇手係我哋兩個？」無二問。
　
「你哋係佢失蹤前最後見嘅人。然後，驗屍報告話凌少爺身上面只有一個傷口，即係俾人一擊致命。」陸孝忠講到呢度用力握緊拳頭，「以少爺而家嘅實力，可以用呢種近乎羞辱方式殺死佢嘅人根本唔多……而你，無二正正就係其中之一。」
　
「我聽完都唔知應該話榮幸定遺憾好。」無二依然係表情得平淡。
　
「廢話少講喇。」陸孝忠邊講邊行近過嚟，眼神再次充滿殺意。
　
「你冷靜少少先！」我大聲講：「我哋嗰晚見完岳少就走咗，根本就冇同佢上山……」
　
「我唔會相信任何人嘅說話，」佢怒聲打斷我，「我呢種粗人只會用拳頭嚟確認清楚……納命來！」
　
語畢，佢右腳猛地一踏，然後用超乎常人嘅速度越過我身邊，下一瞬間已經一拳直揮正中無二左邊心口……威力之大，令到無二身後幾塊玻璃窗全部同時間「嘭」一聲粉碎爆開。
　
但令我意外嘅係，無二中完一拳居然仲筆直咁企喺原地，而且冇做過任何防禦動作，彷彿係硬生生食咗呢一拳咁……
　
「咁你而家確認清楚未？」幾秒後，無二開口問道。
　
陸孝忠慢慢收返拳頭，接住講：「其實喺入門口之前，我已經清楚我哋之間嘅差距。假如你真係殺死凌少爺嘅兇手，大可以喺出拳之前就解決我，但你冇咁做到。」
　
「或者我只係扮嘢……格硬食你呢拳然後話自己係無辜。」
　
「你可以，但佢唔同。」陸孝忠轉身望向我，「從開始到而家，佢都係表現到一無所知……我睇得出佢係真心。而且，佢雙眼仲好清澈……並唔係殺人者嘅眼神。」
　
「咁佢係我助手，可能對呢件事根本唔知情呢。」
　
「你就算講呢啲無謂嘢都唔會改變我嘅諗法。」陸孝忠退後一步，然後分別對我同無二點咗下頭，「點都好，我對自己剛才嘅無禮向你哋道歉……然後，我建議你哋盡快離開呢度。」
　
「點解咁講？」無二皺起眉問。
　
「我哋『城寨幫』本來定好十一點突襲呢度。但我事前已經覺得成件事有疑點，所以就早一步上嚟……以防真係誤會造成死傷，咁真兇肯定會笑到最後。」陸孝忠望一望牆上嘅掛鐘，「而家已經差唔多十一點，所以……」
　
講到一半，樓下突然傳嚟騷動。我行埋窗邊望落去，見到有幾架黑色車同一時間泊埋路邊，隨即有一班人開門落車準備行入我哋呢座大廈，全部人手上都係拎住武器，甚有有人揸槍……
　
「各位！我哋今日一定要幫岳少報仇！」其中一個年輕男人高舉起刀大喊。
　
「無二，真係有班人打算上嚟尋仇！」我即刻同無二講。
　
「我唔係盲嘅……見到喇。」無二轉身望向陸孝忠問：「你指嘅疑點到底係咩？起碼留啲線索俾我哋查下。」
　
「首先，我唔知指控你哋係兇手嘅呢個訊息係邊到傳出嚟。但只係短短半日就傳遍整個『城寨』，就好似有人刻意導向咁；然後，近期『城寨』裡面嘅派系鬥爭相當激烈，我直覺認為兩者係擺脫唔到關係。」
　
「派系鬥爭……」無二思考咗兩秒然後望向我，「算，之後再諗……再遲啲呢度就會變成凶鋪。阿聰，你行得未？」
　
「嗯。」我點頭，見佢臨走之際喺台面拎起之前見過嘅「異地」地圖，邊摺好邊過嚟。
　
「係嘞……有樣最重要嘅嘢唔記得問。」本來我哋已經行出辦公室，但無二又回頭問陸孝忠：「你哋係喺邊座山發現岳少條屍？」
　
「西貢，妖邪之地白湖村外圍。」
　
「白湖村？」我有啲意外，估唔到呢個名字會再次出現。
　
「收到。」無二拍一拍我肩膀，「我哋行樓梯。」
　
一推開門，我即刻擔心問：「你食咗嗰一拳有冇事？」
　
「話冇事就呃你，條友係抱住必死嘅覺悟打埋嚟，所以完全冇留力……等佢仲好意思話事前覺得有疑點。」我注意到佢嘴角流出一滴血，「不過抖返大半日應該冇事，但接住落嚟就就要靠你喇。」
　
「吓？」我不解。
　
就喺下一刻，後樓梯底層開始傳嚟一群人嘅腳步聲。
　
「我食完一拳靈力有啲亂，可能幫唔到你用隱蔽術。」無二壓低聲講：「所以呢次你只可以靠自己。」
　　
「但係，萬一失敗嘅話……」
　
「咁你就即刻跑上天台……呢邊由我頂住。」無二笑住講：「嚟喇，我知你得嘅。」
　
無二帶我行上一層樓梯，先貼牆企喺最角落，然後佢用一隻手搭住我肩膀。
　
「記住我之前教你嘅嘢。」
　
我合埋眼，開始回想幾日前佢教過我嘅心得──保持內心平靜、先認清楚自己嘅「氣」、再理解四周空間形成嘅「氣」……然後分析、拆解、調和、最後將兩道「氣」合二為一。
　
嘀嗒、嘀嗒、嘀嗒……腳步聲越嚟越近。下一秒已經有人出現喺我哋面前──係頭先拎刀嘅年輕男人，佢先確認防火門另一邊冇異樣，再抬頭望向我同無二呢邊。
　
有一瞬間，我仲以為同佢目光對上咗。但佢馬上轉過頭對住後面嘅手下講：「搵五個去上層一層一層咁搜……特別係天台，千祈唔好俾佢哋走到。」
　
「收到……域少。」
　
說罷，隨即有幾個手下聽令跑上嚟。從我同無二身邊經過嘅時候最近只係剩低半呎距離……我不禁屏住呼吸，好希望心跳聲唔會出賣自己。
　
等到所有人都離開後樓梯後，無二即刻撇撇頭，示意我向下層走。之後嘅路都係暢通無阻，最後我哋順利避開埋守喺門口嘅兩個「城寨幫」成員……總算無驚無險咁離開。
　
「嗄……嗄……」走咗兩條街確認安全之後，我總算鬆一口氣，隱蔽術亦隨即解開。
　
可能係頭先太過專注，又跑咗一段路，所以有種頭暈缺氧嘅感覺。
　
「犀利喎，我其實冇預你第一次實戰用隱蔽術就成功。」無二難得露出驚嘆嘅表情。
　
「你頭先明明唔係咁講……」
　
「哈哈，睇嚟『求生類』嘅技能真係幾適合你，有機會等我再教你幾招。」
　
「但我哋接住落嚟應該點做？」我喘住氣問：「如果真係成個『幫會』搵我哋尋仇，咁人數肯定係唔少……」
　
「嗯，閒閒地上百個，而且當中肯定有高手。」明明面對緊猶如動作電影般嘅追殺橋段，但無二依然表現得輕鬆，「我哋先去停車場，揸車去咗安全點再諗辦法……」
　
「我係你就唔會咁做喇。」
　
回應無二嘅人並唔係我，而係旁邊一架白色轎車傳嚟。望過去，可以見到一位戴住黑超、上身白色西裝，全身散發住「老闆」級氣牆嘅中年男人……
　
「據我所知『城寨幫』至少派咗兩個高手守住停車場。」白衣男人除低黑超接住講落去：「上車喇……等我送你哋一程。」
　
車門一開，可以見到車廂裡面相當寬敞。兩邊對望座椅之間仲有個可以放酒嘅矮櫃，成個格局相當豪華奢侈。
　
「有酒飲嘅話，係可以考慮下嘅。」無二講完隨即上車，見係咁，我當然跟埋上去。
　
一上車坐低，我先注意到白衣男人係斷咗右手……
　
「目的地喺邊？」白衣男人微笑問道。
　
「尖沙嘴海威酒店。」無二一直盯住白衣男人，「阿聰，等我簡單介紹下……」
　
　
「……呢個人就係『白色秩序』大老闆──鼎鼎大名嘅白笑燭。」
　
（待續）　
　
　
戰鬥開始？下集暫定星期六或日。
　
Patreon 已經正式開始有連載啦！長篇故事係《扮工鬥室》、集歡樂、恐怖、愛情於一身……會更加似我以前嘅風格，希望大家多多訂閱支持！
　
https://www.patreon.com/echoofheart
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
IG：echoofheart

【屍人屋苑】病毒變種、喪屍橫行，一個關於選擇的故事…（下）
　　
活咗三十幾年人，我真係從冇諗過自己有一日要出賣身體去換取糧食。但呢個選擇都係為咗可以生存落去……
　
當然，即使我係應承咗程叔佢哋，但為咗保障自己、同時守住僅餘嘅尊嚴，事前我哋都有約定三章──呢場「交易」只會喺我屋企進行、只會接受一對一、身體不適嘅話我係有權拒絕……而佢哋都好順攤咁接受咗。
　
記得我嘅第一個「客人」正正就係Steven。初初傾計打破尷尬氣氛嘅時候，Steven同我講，程叔佢哋應該係見佢曾經救過我，所以作為第一次應該唔會特別抗拒。而事實的確唔算壞……
　
「我知道同妳講加油好似有啲奇怪……」當『交易』結束後，佢一邊著返衫一邊同我講：「總之，妳有咩需要就同我講喇。」
　
記得當晚Steven走咗唔係好耐，程叔佢就接住出現。
　　　　　
－－－－－－－－－－－－－－－－－－
《屍人屋苑》前幾回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
　
《無異之地》實體版，網上預訂有折同各種禮品！
https://www.ideapublication.com/products/unusual-region
－－－－－－－－－－－－－－－－－－
　　
「其實我最憎食人口水尾，」程叔行入門口之後講：「不過喺而家呢個環境，都冇得介意咁多喇，而且我係有準備㗎。」佢喺袋裡面拎出一盒安全套。
　
因為有過不愉快嘅經歷，所以我當然先入為主咁覺得呢次「體驗」肯定會好差，但實際情況卻又出乎我意料……雖然平時程叔俾人感覺非常粗鄙，但喺床上面嗰陣卻又好似換咗另一個人咁。而且，雖然叫佢做「叔」，但佢實際年紀都只係四十多啲，依然係我仲可以接受嘅範圍裡面……
　
但就算身體接受到，生活一下子變化咁大，心理上始終係會出現偏差。
　
最初嗰幾日，每次送完「客人」走剩低自己一個人嘅時候，我都會忍唔住走入廁所崩潰大喊，覺得自己全身上下都好污糟、越諗就越覺得發生過嘅事太噁心。連披單枕頭都唔想再掂、結果就喺浴缸上面攰到瞓著咗……
　
呢種痛不欲生嘅感覺，足足維持咗成個星期。直到眼淚終於都流乾後，為咗掩蓋內心嘅痛苦，我開始會睇返阿豪之前買落嘅心理小說，然後不斷諗啲正面嘢去安慰自己。
　
譬如話，我根本就唔需要怕呢啲「醜事」會傳開去。喺喪屍橫行嘅世界，互聯網同手提電話早就已經成為過去式。而且親戚朋友唔係已經「離開」就已經失去聯絡，就算真係有緣再聚，可能都已經係講緊幾年後嘅事……
　
然後，防衛隊嘅嗰班男人都算係幾遵守我嘅條件。起碼最初呢段時間都冇出現過違規情況。或者，佢哋都想呢段關係可以保持長久，所以先唔敢亂嚟……
　
最後，係「交易」後佢哋留低嘅糧食，確實係比起我最初想像嘅多。我開始會儲埋一啲放得比較耐嘅糧食，或者將來係有機會用到……而且，之前Steven話過有需要就搵佢，我確實係有好好利用到呢點……
　
「妳話……想要老鼠藥？」躺喺旁邊嘅Steven聽完我講之後，不禁露出疑惑嘅眼神。
　
「嗯，上次王伯嚟嘅時候話喺後樓梯見到有老鼠。我驚唔處理嘅話，之後會引起好大問題……」
　
「原來係咁……好喇，等我聽日出去搵資源嗰陣留意下。」
　
我當然知道出賣身體係一條歪路，但呢條歪路……確實令我得到安穩而又可以溫飽嘅生活。換轉你係我，你又有冇信心可以喺呢個困境下搵到其他出路？
　
我冇勇氣、怕死、亦都冇能力……所以，剩係可以選擇呢一條路。
　
轉眼間又過多一個星期，當我開始慢慢習慣呢種生活嘅時候……鍾意作弄人嘅上天，又開始咗佢嘅下一個動作。
　
當晚，送走咗Steven之後。見時間唔早，我本來諗住清潔下床鋪，順便洗下啲內衣，但聽朝天光嗰陣可以拎去曬下……
　
「咦？」但就喺我執床嗰陣，竟然俾我見到有把短刀連埋刀鞘留咗喺床上面，「睇嚟應該係Steven留喺度……」
　
出於好奇，我先小心翼翼咁將把刀喺鞘裡面抽出嚟，然後胡亂咁揮動兩下。望住鋒利嘅刀身，我不禁諗……Steven到底用呢把刀殺過幾多隻喪屍？
　
下一刻，腦中又再一次閃過當日嗰隻男喪屍。雖然餘悸猶存，但我知道的……總有日我係要再次面對佢哋。而為咗呢日來臨嘅時候可以保護自己，我確實有必要準備下。
　
諗到呢度，突然心血來潮，我決定親自落去二樓基地，將把刀交返俾Steven嘅同時，希望搵到人願意訓練我去面對喪屍……
　
然而，當我穿過幽暗嘅走廊嚟到二樓走廊嘅時候，等緊我嘅卻係一個震撼嘅「真相」。
　
「程叔……你有冇試過夜晚瞓教嘅時候夢見Adam？」
　
係Steven把聲，一聽到Adam呢個名，我下意識停低咗腳步……明明只需要行多兩步就會去到大閘前，但我卻企喺一個可以偷聽到嘅位置。
　
「你確定要喺呢個時間提起佢？」程叔回應：「你真係唔怕撞鬼？」
　
「我都好想擺脫佢……但每次合埋眼……都會回憶起佢當時嘅表情……」Steven用痛苦嘅語氣講：「明明我哋出生入死咗咁多次……點解要因為咁嘅理由背叛佢……」
　
……背叛？
　
「你唔係內疚呀？Steven……佢係抵死㗎！」程叔加重語氣，「明明有個老婆喺十五樓仲偷偷養住另一個女人！你記唔記得嗰一日……我哋已經係好聲好氣咁同佢講，叫佢有『好嘢』要識得分享，但條陷家產竟然第二日即刻叫小芙唔再落嚟！」
　
「但係……」
　
「唔好但係喇，Steven……呢件事已經過咗去。而家咁咪幾好囉？我哋有女齊齊上，皆大歡喜。而且，你要記住……當時落手殺佢嘅人唔係我哋，而係班喪屍。」
　
　
　
「我哋只係太過粗心大意，唔小心反鎖咗道門啫。」
　
　
　
聽到呢度，我腦海開始急速咁運轉起嚟。記得當晚，程叔明明話佢哋係遇到其他生還者，Adam先會出事俾喪屍咬中……
　
「你係有咁多時間亂諗嘢，不如幫手定個計劃……去海邊搵架遊艇離開呢度仲好喇。」
　
但原來唔係咁，Adam之所以會死……係因為Steven同程叔背叛咗佢。雖然唔知道實際情況係點，但若果佢哋當時冇反鎖道門……
　
Adam就唔會死。
　
而佢哋之所以咁做，目的就係想我失去Adam呢個依靠……然後，好自然就會順晒佢哋意。
　
當我將所有碎片串連埋一齊之後，久違嘅噁心感再一次湧上喉嚨。我幾乎就要發出聲，但我最後強忍住……
　
「但離開呢度又可以去邊？」
　
「去搵個島呀，我哋可以帶啲種子去，重新過耕田嘅生活……總好過留喺呢個連太陽都見唔到嘅大廈，根本睇唔到將來……」
　
「但呢座大廈仲有其他人需要我哋……」
　
「我哋需要佢哋嗰陣又唔見佢哋肯幫手？後生仔，記住人善被人欺呀……」
　
我趁住佢哋對話，用最細嘅腳步慢慢向後退，最後退返去後樓梯。慢慢閂埋防火門之後，先至加速跑返去自己屋企……
　
當晚，我又再一次喺浴缸崩潰大喊。但今次喊到底之後，等緊我嘅並唔係要面對現實嘅無奈……而係憤怒。
　
一種，被欺騙而生嘅憤怒；
　
以及另一種……渴望復仇嘅憤怒。
　
幾日後，我揀正佢哋出發搵資源前再次落到基地，眾人見到我嗰陣當然係好驚訝。
　
「係咁嘅……我見好耐冇為你哋煮過飯，所以咪落嚟睇下有冇機會……」我帶住笑臉講：「就當係報答你哋對我咁好。」
　
「小芙，我之前都講過，我哋已經冇乜資源亂咁用。」程叔睇嚟興趣不大。
　
「程叔，既然阿芙咁有誠意……咪俾佢煮一餐囉，反正我哋都好耐冇食過。」防衛隊另一個成員馬哥接住講。
　
「同意……」Steven跟住和應：「最多今次出去我落力啲拎多啲嘢返嚟。」
　
「嗱，你話架，唔好到時又話我迫你冒險。」程叔講完再望向我，「咁今晚就靠妳喇，記住唔好令我哋失望。」
　　
「嗯。」我點點頭。
　
「唉，」王伯嘆咗口氣，「最衰屋企個老虎乸開始懷疑，叫我今晚出完去要即刻返歸，唔係我都想再試多次小芙嘅廚藝……」
　
「你咪拎啲嘢返去叫老婆煮囉。」馬哥提議。
　
「咪搞啦，我寧願食過期餅乾……」
　
「哈哈哈哈……」
　
就係咁，所有人都帶住笑容出發。冇人有過懷疑、冇人知道我接住落嚟準備做啲咩……
　
呢一餐飯，我可以話係比過去任何一次都落力。等到佢哋順利回程見到飯台上面嘅飯餸後，每個人都即刻雙眼發光，好似流晒口水咁……
　
「喂，我唔等啦……食先。」程叔第一個坐低食飯。
　
「嘩，今晚連湯都有？」王伯本來打算放低啲嘢就走，但見到有湯都停低落嚟。
　
「係呀，之前我叫Steven出去嘅時候偷偷執啲湯包返嚟。」
　
「原來你個袋就係裝呢啲嘢裝到冇晒位。」程叔睥咗眼Steven，飲咗啖湯再講：「不過見幾好飲就算喇。」
　
「王伯，你唔介意咪倒啲返去，我記得廚房有保溫壺……」
　
「都好喎，咁就拜託妳啦……」
　
結果開飯都唔洗幾分鐘，台上面嘅飯餸都已經清得一乾二淨。
　
「如果我仲有機會娶老婆嘅話，一定要搵個好似小芙你咁嘅。」馬哥飲咗少少酒之後開始胡言亂語。
　
「馬哥，你咁講大抬舉我喇。」我客氣咁回應。
　
「邊有抬舉？入得廚房出得廳堂，哈……床上功夫又了得……」
　
「喂，」程叔推一推佢，「咁多人面前唔係講呢啲呀？」
　
「你扮咩嘢呀？呢度有邊個未幫襯過佢先？」
　
「你……」
　
「好喇好喇，大家唔好嘈。」我注意到程叔開始青筋暴現，所以即刻勸交，「大家照顧我我係好清楚……」
　
「係囉，小芙。」馬哥搭住我膊頭講：「其實在座除咗程叔之外每一個都係好男人嚟，妳應該要認真考慮下……」
　
「馬哥，你應該係醉喇。」我慢慢企起身，「等我入去倒杯水俾你……Steven，你洗唔洗？」
　
「吓？」Steven抬起頭望向我，明顯係心不在焉。
　
「我見你已經靜咗好耐……」
　
「冇……我只係覺得個肚好似有少少唔舒服，可能係晏就食錯過期嘢……」
　　　
一聽完佢呢句，我就知道時間應該差唔多了。本來每個人體質就唔同，加上飯餸食嘅份量都有分別，所以好難做到完全準確。但唔理點都好，終於要到了……
　
「啊……我都好似想嚟料。」馬哥等唔切我杯水，第一時間就衝入廁所。
　
慢慢、剩低落嚟嘅三個人……包括程叔都開始感覺到身體有唔妥。
　
「小芙，妳係咪用咗唔新鮮嘅材料……」程叔初初都未懷疑到嗰一步，直到佢見到我當刻嘅眼神，「妳……」
　
「我有冇同你哋提過我以前大學讀咩科？」我隨便將杯水放喺鞋櫃上面，然後慢慢行去大門前，「係病理學。」
　
「阿芙……」Steven聽完瞬間恍然大悟，即刻將手指放入喉嚨裡面想扣喉，「嘔……大家，快啲將啲食物嘔出嚟……入面有老鼠藥！」
　
「唔撚係嘛！？」
　
眾人反應都好非常，程叔本來想第一時間衝過嚟。但我趕得出係腰間抽出一把短刀，嚇到佢即刻停低落嚟。
　
「啲飯餸裡面唔單止有老鼠藥，仲有好多你哋唔識、亦都想像唔到嘅嘢……只係為咗可以一擊即中。」
　
講到呢度，我已經退返出走廊，然後一手閂返埋大閘。
　
「但妳明明自己都有食……」
　
「因為每樣餸我都係煮兩次，一次有落一次冇……然後小心翼翼咁擺好碟，等我可以食安全嗰部份……但其實你哋頭先食咁快，應該都冇留意到我根本冇點食過。」
　
「可惡……」程叔撳實自己個肚，強忍住痛楚問：「妳……點解要咁做？」
　
「我本來都冇諗過會行到呢一步，只係儲定啲原料未雨綢繆，等你哋真係越界先落手……但結果，前兩日嘅事改變咗我。」
　
「妳知道咗真相……」程叔馬上理解過嚟，「Steven……今次真係要多謝你……啊……」但佢都阻止唔到一切，終於痛到跪喺地上面，迫於無奈要跟住其他人一齊扣喉。
　
嘔、嘔、嘔……
　
明明成個畫面應該係好噁心先係，但我卻反過嚟有種復仇嘅快感，好想好好記住成個過程。
　
「喂！阿志，唔好瞓低呀！頂住！」見其中一位同伴終於忍耐唔住瞓低，程叔即刻大喊道。
　
「你顧掂你自己先……時間冇多喇。」我冷冰冰咁講。
　
「我同妳講，外面嘅喪屍殺唔死我哋……妳落嘅毒都唔會……啊……」
　
「放心……我會喺度睇，直到結束為止。」我冷笑一聲。
　
「阿芙……」Steven痛到蜷縮住身體，用盡最後一口氣抬起頭同我講：「我對妳唔住……」
　
「呢句說話……你自己留返同Adam講。」
　
「八婆！」程叔一拳用力敲落鐵閘。但呢一下，已經係佢最後可以做到嘢。
　
就係咁，我一直盯實佢哋，直到佢哋每個人塊臉都由蒼白變成紫色……最後一個又一個咁瞓低，再冇起返身。
　
回過神嚟，我已經返番去自己屋企。飲杯水冷靜落嚟後，我開始收拾行裝，準備下一個行動……
　
雖然係親眼睇住佢哋瞓低，但都難保會有意外。而且佢哋屋企人遲早都會發現到呢件事，然後矛頭肯定會指向我身上……
　
所以，由我下定決心要為Adam報仇嘅一刻，我已經諗好咗要離開呢座大廈。就算結果係死，至少呢個都係我嘅選擇。
　
啪、啪啪！
　
然而，當我執到一半嘅時候，大門居然傳嚟拍門聲。我當然係嚇一跳，拎起把刀慢慢行到大門前，透過魚眼望出去。
　
係王伯，點解佢飲完碗湯會冇事？係份量唔夠？抑或……佢根本就冇飲到？
　
我曾經有一刻諗過唔應門，咁照道理佢見冇人應該係會自行離開。但一望到佢嘅表情，一臉笑淫淫咁樣……咁其實有好大機會，佢根本就未知下面嘅情況，上嚟只係為咗一個單純嘅目的。
　
「冇人嘅……唔通未上嚟？」王伯喺門外面自言自語。
　
既然係咁嘅話，係咪可以反過嚟利用呢點……「處理」埋佢？
　
因為，王伯肯定唔係無辜，佢一定都有份害死Adam。
　
諗到呢度，我再次鼓起勇氣。先衝返入房將打包到一半嘅行裝收埋喺床下底，再將把短刀攝喺床嘅邊緣位。搞掂好晒先返過去打開大門。
　
「哈，妳果然喺度……」王伯一臉歡喜，「點解咁遲先應門嘅？」
　
「哦……見有啲攰所以恰咗陣。係呢，你唔係老婆叫到今晚要留喺屋企咩？」我邊開門邊問。
　
「嗰隻老虎乸呀，食完飯之後就話肚痛走咗入廁所……佢出名去得耐嘅，我咪趁呢個機會偷偷上嚟搵你囉。」
　
唔通，碗湯係俾佢老婆飲咗？如果係咁嘅話實在係太可惜……
　
「總之，冇咩時間喇。」王伯入嚟之後即刻幫我閂門，睇得出佢非常心急，「今晚要速戰速決……」
　
佢本來想即刻錫過嚟，但我反射性咁避開咗。
　
「做咩避開啫，上次都唔係咁㗎？」
　
「上次我刷咗牙……啱先又食完飯嚟，所以有少少唔好意思……」為咗唔想惹佢懷疑，我即刻拉住佢手，「嚟啦，我哋入房繼續。」
　
「傻婆……我點會介意呢，嘿嘿。」
　
咁多個客人嚟講……王伯應該算係我最討厭嘅一位。因為佢一直都係要求多多，只要一唔順佢意就會即刻黑臉。如果要我估防衛隊裡面邊一個會先違反我嘅條件，呢個人一定係王伯……
　
「你坐低先……我先入廁所洗個手。」我講。
　
「其實唔需要啦，不過妳鍾意。」王伯坐低之後即刻急不及待除衫除褲。
　
入到廁所，我先洗個凍水臉。然後用最短嘅時間擬定計劃……當心態已經準備好之後，我都跟住除去上衣，再慢慢出返房……
　
「咦，今晚居然係著粉紅色內衣……睇嚟妳真係開始習慣呢種生活喇？」
　
「咁都係因為有你哋關照……王伯，不如你先瞓低，等我幫你按下摩？」
　
「唔……」王伯思考咗兩秒，可能都係驚時間唔夠，「好喇，反正都上得嚟，唔理個老虎乸點諗喇，享受咗先。」說罷就背脊朝天咁攤喺床上面。
　
我先坐喺佢側邊，然後用雙手開始幫佢按膊頭。其實呢個已經算係一個絕佳嘅落手姿勢。但如果突然鬆開一隻手嘅話，佢好可能會有所懷疑，所以過程一定要好迅速……
　
「喂，小芙……我都已經幫趁過妳幾次，今晚係咪應該可以試下其他嘢呢？」
　
「吓？」我本來已經想拎刀，但俾佢呢句打窒咗，「即係咩……」
　
「嘿……妳咁都唔明？用口呀，我細佬已經好耐冇俾人用口服侍過。」
　
「咁……好似唔係幾好嘅。我始終冇呢種經驗，驚整傷你……」
　
「妳又係咁喇？經驗呢啲嘢，試得多就熟㗎啦？小芙呀，妳要識多啲玩法，啲客先唔會咁快玩厭……唔係遲早會有第二個人取代妳。我都係教精妳咋。」
　
一聽完佢呢句，怒意又再一次湧上心頭。
　
「啊……爽呀，就係呢種力度……」
　
「等我幫你按下腰？」我邊講邊縮走右手，但其實係移去床邊攝刀嘅位置。
　
本來只係剩低幾吋，但王伯突然擰轉頭望向我……
　
「妳做咩仲著住胸圍？唔係到而家都仲咁怕羞呀？」王伯即刻撐起身，「等我嚟幫妳啦……」
　
見先機錯過咗，我下意識收返埋拎刀嘅手。但呢一步……卻錯誤咁被王伯發現到。
　
「妳……」佢好順手咁解開背扣嘅同時，雙眼卻移向床邊位置，「係咪收埋咗啲咩？」
　
我冇回應，當刻已心知不妙，搶喺佢發現之前拎出短刀。
　
「你去死喇！」
　
我用盡最大嘅力度想一刀直插落王伯嘅心口，但佢竟然反應得切捉住我握刀嘅手腕。雖然我已經出盡力，但最多都係形成僵持狀態……
　
「八婆……妳竟然想殺我！？」佢用另一隻手一把用力摑落我塊臉到。
　
「吖！」因為力度太大，所以我即刻痛到瞓低，刀亦都從右手甩落床。
　
「我當年係做警察㗎……想殺我！」王伯咆哮道，同時執返起把刀。
　
當我以為萬事皆休。但就喺呢個時候，大廈外面突然傳嚟某人嘅大喊聲。因為呢度係七樓，所以聽得非常清楚……
　
──就快……頂住呀！
　
「外面搞咩……呀！？」
　
我趁住王伯呢下遲疑，想博最後一鋪將把刀搶返過嚟。
　
──快呀！
　
「妳仲嚟！？」我用兩隻手同時捉住佢手腕，今次王伯顯得好吃力，「可惡……」
　
王伯企圖用另一隻手扭返開我隻手，而我就重新起身想方便發力，之後嘅發展相當混亂……
　
……而呢場搏鬥，終將會迎嚟一個結果。
　
──嘶。
　
一陣好似俾冰劃過嘅刺痛感喺喉嚨傳過嚟。我一開始都未意識到狀況，直到開始感到有暖流喺痛楚嘅位置流出嚟……
　
「啊……出事……」見我鬆開咗手，王伯成個人呆住咁望實我，可以見到佢腰間染上咗鮮血，「……點解要搞到呢個地步呢？」
　
呢一刻，好似所有嘢都突然改變我好快咁。下一秒我已經開始有種頭暈嘅感覺，感覺成個世界天旋地轉、身體亦慢慢變凍……
　
但我用盡最後一口氣起身，腳步浮浮咁衝入廁所，然後望向玻璃鏡……
　
我嘅喉嚨俾刀劃傷咗。因為血不斷流、環境又黑、所以睇唔到傷口有幾深。我嘗試發出聲，但下顎只係郁少少已經傳嚟劇烈嘅痛楚……我伸手去拎起洗手盤旁邊件衫止血，但只係撳咗一陣就瞬間沾滿血。
　
「今次真係大獲……」我依稀聽到王伯喺外面講，但佢並唔係指緊我。呢刻佢企埋喺窗邊望緊大廈外面，「到底係邊班人引成班喪屍過嚟？」
　
下一秒，佢重新望過嚟。
　
「妳唔好怪我呀……所有嘢都係妳自己攞嚟！」說罷，佢即刻行埋去打開旁邊嘅櫃，然後喺裡面拎出一包又一包食物，「反正妳都用唔著，就當益下我。」
　
呢刻，我已經無能為力作出反抗，只可以眼白白睇住佢搶走我嘅嘢。如果佢唔係太心急，應該早就注意到床下底嘅行裝，然後就可以拎走更多……
　
「再見喇……我會故意唔閂門，等班喪屍嚟搵妳。」王伯笑住講，然後就轉身跑走。
　
結束了。
　
呢刻我已經全身軟弱無力，冇辦法行返出廳閂門，只可以過去輕輕推返埋廁所門。然後，跨過浴缸，成個人坐喺上面……一種熟悉而又溫暖嘅感覺重新蓋過一切痛苦。
　
終於結束了。
　
其實，當日遇到第一隻喪屍嗰刻我就應該要死……只係命運鍾意作弄人，先故意留我到而家，成為一班男人嘅玩物。
　
而我到最後，都係冇辦法離開呢座大廈、冇機會見返自己嘅父母。
　
天啊，點解到我認真想為自己作出選擇嘅時候，最後卻係得到咁嘅結果？
　
我雖然唔甘心，但至少……我有嘗試過。
　
「小芙……其實比起好多人，妳已經算係好彩。」意識朦朧間，我見到阿豪企喺浴缸外面同我講。
　
「我冇出過去……又點會知咁多呢……」我無奈咁笑住講，慢慢合埋雙眼。
　
「小芙……我知道妳為咗我，已經盡咗力。」接住輪到Adam把聲響起。
　
「……可惜……仲差一個人……」
　　
「夠㗎喇，既然班喪屍入咗大廈……佢遲早都會得到應有嘅下場。」
　
「希望……係咁……」
　
「所以……妳就好好瞓喇。」
　
　　
　
「瞓醒之後，我哋約定好喺另一個地方再見面。」
　
嗯……
　
一言為定。
　
（完）
　
點解呢章拖咁耐，因為過程諗到兩種發展方式。如果書展延到十二月有機會出《屍人屋苑》實體版嘅話，我會喺書入面試下寫埋另一種嘅發展。
　
下一章，換個角度講下大廈以外。不過，無異之局先。
　
睇完又鍾意呢個故事嘅，記住幫手分享開去呀！
　
　
《無異之地》實體版，網上預訂有折同各種禮品！
https://www.ideapublication.com/products/unusual-region
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart

【屍人屋苑】病毒變種、喪屍橫行，一個屋苑困獸鬥的故事……（３）
　　
為咗兩日後可以搭直升機離開呢座大廈，我同阿俊決定預先上去廿五樓暫避。經歷完後樓梯嘅一場追逐戰之後，我哋總算喺千鈞一髮之間趕得切入屋。
　
然而，就好似我之前擔心過咁，呢間屋裡面果然仲有人住緊……
　
「你哋……到底係咩人？」少女一臉恐懼咁問。
　
雖然唔敢話好靚，但喺今時今日呢個環境，已經唔係剩低好多後生而又活生生嘅女人。何況佢俾人感覺楚楚可憐咁，好容易令人產生保護欲。
　
「我係屋主個仔。」阿俊舉起雙手講：「呢間屋係我老豆好多年前租畀陳生，所以我先會有呢度嘅鎖匙……妳係陳生個女？」
　
少女點咗下頭，但手依然係握緊刀柄，未敢放低戒心。
　
「Sorry，我哋本來諗住呢度唔會有人住，所以先打算上嚟避下。」阿俊繼續講：「放心，我哋唔會留喺度好耐，兩日之後就會上天台搭直升機走……」
　
「直升機？」少女皺起眉頭。
　
「係我老豆派人嚟接我哋……」
　
我不禁反咗下白眼，其實阿俊根本無必要咩都講晒出嚟。就算少女外表睇落幾弱幾冇威脅都冇，始終都係陌生人。而根據我以往嘅經驗，俾陌生人知道自己嘅事絕對係弊多於利。
　　
－－－－－－－－－－－－－－－－－－
《屍人屋苑》前三回：
https://www.facebook.com/pg/Echo.of.Heart/photos/?tab=album&album_id=1935947799870360&__tn__=H-R
－－－－－－－－－－－－－－－－－－
　　
「兩日就會走？」少女確認。
　
「嗯……係嘞，陳生陳太呢？佢哋喺唔喺度？」阿俊禮貌咁問。
　
我注意到少女聽完之後望咗一眼廚房。正打算回應嘅一瞬間，大門外突然傳嚟一下強烈嘅撞擊聲。隨即聽到喪屍嘅嚎叫同腳步聲──睇嚟班喪屍終於撞冧咗道防火門，入侵咗廿五樓嘅走廊。
　
……嗚嗚……嗷……
　
我用最細嘅動作起身，再透過防盜眼望出去，即刻就見到一張蒼白而腐爛嘅臉孔經過門外，及後仲有更多喪屍接二連三咁出現。簡單一數已經接近廿隻以上，呢個量係絕對冇可能突破到。
　
「咩情況？」阿俊用口形問。
　
我搖搖頭表示唔樂觀，然後就慢慢行埋去梳化嗰邊坐低。過程係刻意俾少女見到我手上把刀，話俾佢知我根本就唔驚佢。
　
雖然早就預計過會出現咁嘅情況，但事實比想像真係惡劣太多了。除非諗到方法又或者有其他人引走班喪屍，唔係兩日之後我哋肯定係上唔到天台。
　
所以，而家根本冇心情考慮少女嘅情況。就算佢同我一直幻想嘅女主角好吻合，而家都係應該要面對現實……
　
阿俊睇完門外情況之後都跟住過嚟，再同少女講：「門外面有好多喪屍。如果妳堅持要我哋走，可唔可以等到佢哋散咁啲先？而家出去嘅話，肯定係死路一條……」
　
因為有雨聲做掩護，所以呢個聲量係唔會吸引到外面嘅喪屍。但就算吸引到都冇所謂喇，反正情況都已經夠晒惡劣……
　
可能係見阿俊夠真誠，又或者純粹貪佢靚仔，少女總算垂低握刀嘅手。
　
「你哋可以留喺度……但兩日後一定要走……然後……」佢指向廚房嗰邊，「……你哋唔可以入廚房，又或者去其他房間……」
　
「當然冇問題。」阿俊轉身向少女展示自己嘅背包，「我哋有食物，應該夠捱埋呢兩日，肯定唔會打擾到妳。」
　
「你哋想要水嘅話就用廁所水喉……如果仲有其他需要，就去最近嘅房拍門叫我。」
　
說罷，少女本來轉身就想入房，但阿俊卻叫停佢問：「我都未知妳叫咩名？我叫阿俊，佢係老超。」
　
「琪琪。」
　
「琪琪……」等到琪琪入房閂埋門之後，阿俊即刻坐喺我旁邊，「睇嚟佢父母唔喺度，唔知係失散定已經死咗？」
　
難怪佢頭先冇追問落去，因為驚會勾起人傷心回憶。不過都合理嘅，如果琪琪嘅父母仲喺度，點可能剩係得佢一個人面對我哋兩個？
　
「佢父母係點唔得閒理喇，重點係我哋兩日之後應該點上去。」我回應。
　
「兩日咁耐，應該有機會散啩？」可能見死過返生又暫時安全，阿俊好快就放鬆咗心情，「喂，老超，而家咁樣唔似你喎，你唔係成日都想趁呢個時勢搵個伴咩？」
　
記得有一晚就係放鬆過頭飲咗兩枝酒，結果唔小心提到呢件事……估唔到阿俊居然仲記得。
　
「有女都要有命享先得。」我重新望返去大門嗰邊，感覺雨聲好似已經再遮唔住喪屍嘅叫聲。
　
但到底係雨落細咗，定係外面喪屍嘅數量越嚟越多？只希望答案會係前者……
　
留喺度嘅第一日算係相安無事，但走廊嘅喪屍並冇減少嘅跡象。至於琪琪，除咗需要整嘢食嗰陣要入廚房同埋去廁所之外，幾乎係冇離開過自己間房。
　
「班喪屍……係咪就係你哋引入嚟大廈？」一整日時間，佢只係問過我哋呢條問題。
　
「係，但我哋真係冇心……」阿俊回應：「我哋當初只係諗住入嚟避下……」
　
「有冇心都好，你哋都已經害咗好多人……」
　
琪琪講完就行入廚房。其實我注意到佢每次出入廚房嘅時候神情總係特別古怪。好在我哋嘅食物同水都唔係佢負責，唔係我肯定會覺得佢係諗住落毒……
　
「落毒？你諗太多喇。」阿俊聽完我嘅疑慮先係一笑，但突然好似諗起啲嘢咁睜大雙眼，「咪住先……」
　
佢開著自己部電話，然後喺圖片庫裡面搵出一張相，驟眼睇落應該就係呢座屋苑嘅平面圖。
　
「我哋係A室，然後廚房係同H室連住。老超，我好似諗到計聽晚點走喇。」阿俊起初仲係興奮，但下一秒又收返笑容，「但係……呢個計劃一定要同埋琪琪一齊商量。」
　
「吓？」我不解，「點解？」
　
「等我叫佢出嚟。」
　
阿俊起身行埋去拍門。等琪琪出埋嚟之後，佢即刻開口問：「琪琪，妳會唔會考慮同我哋一齊搭直升機走？」
　
「吓？」琪琪聽完當然好驚訝。而我都係一樣，呢件事同計劃又有咩關係？
　
唔通，佢係見我好似對琪琪冇興趣，所以終於露出二世祖本性，想將琪琪追到手？只要帶佢離開呢個人間煉獄，再保證佢去到安全島之後唔需要捱苦，應該大部份女仔都會願意上釣……
　
「我有個計劃。」阿俊拎出一張佢手畫嘅平面圖，「我注意到呢座大廈A室同H室嘅廚房係相連嘅。即係只要小心啲嘅話，我哋絕對係可以喺廚房開窗爬過去隔離屋……琪琪，妳知唔知H室仲有冇人住？」
　
「應該……」琪琪又望咗下廚房，「……冇。」
　
「咁就好。跟住你哋望下H室嘅正門，啱啱好就喺走廊另一邊，而且一出去就係另一邊嘅後樓梯。」
　
「我明喇。」我聽到呢度終於恍然大悟，「只要聽晚我哋諗辦法將喪屍集中喺呢一邊走廊。再爬過去隔離屋，就唔需要面對呢班喪屍……」
　
「有個更保險嘅做法，就係乾脆開埋呢間屋嘅大門，再將班喪屍引入屋。總之將走廊嘅喪屍數盡量減到最低……去到可以應付嘅數量。」
　
「但要點做先可以將喪屍引入屋？」琪琪問。
　
「我電話仲有少少電。」阿俊拎起自己部電話，「到時只要較定鬧鐘，預先將部電話放喺呢間屋最入嘅房，最後開門……等到鬧鐘一響，就可以引班喪屍入嚟。」
　
越諗就越覺得呢條橋行得通。當然仲要面對好多問題，譬如點樣安全咁爬過隔離屋，之後仲要解開廚房嘅窗花。而且，隔離屋始終可能仲有人又或者喪屍喺度……
　
「但係……確定要咁做嘅話，其實今晚就要開始做好準備。」我回應。
　
「冇錯，所以我先問妳。」阿俊望向琪琪，「琪琪，我知道咁做就等於要放棄呢間屋，所以先建議妳跟埋我哋一齊走。」
　
「但如果……我唔想走呢？」琪琪反問。
　
「我哋都會照過去隔離屋，再留低部電話吸引班喪屍。雖然佢哋仲會留喺走廊，但至少我哋都有機會……之後部電話就俾妳用啦，反正都就冇電……」
　
「即係你哋點都要入廚房？」琪琪追問。
　
其實我當時已經覺得呢條問題有啲古怪。但因為諗緊點樣完善呢個計劃，所以就冇再深究。
　
「嗯。」
　
之後係短暫嘅沉默，過咗大約一分鐘，琪琪終於回應：「可唔可以……畀多少少時間我認真考慮下？」
　
老實講，佢唔當場拒絕我已經覺得係萬幸。話晒係由兩個識咗都唔夠廿四個鐘嘅人提出嘅計劃，本來就唔知可唔可信，仲要犧牲埋自己嘅安全室。換轉係我嘅話，肯定第一時間就拒絕，根本唔洗考慮。
　
「明白，但妳最好……今晚畀到答案我。」阿俊誠懇咁講。
　
但無論佢嘅決定係點都好，呢個計劃都係勢在必行。
　
結果，琪琪入返房之後，足足四個鐘都冇出過嚟。而阿俊堅持要等琪琪有答案先行動。所以喺準備好晒攀爬用嘅繩同爆窗工具之後，我哋兩個就只可以喺度呆等……
　
老實講，呢種等時間一分一秒過嘅感覺並唔好受。
　
「你想去邊？」見我企起身，阿俊即刻問，佢已經第四次確認條布繩穩唔穩陣。
　
「廁所。」
　
本身我真係諗住去廁所的。但行到門口嘅時候，我突然心血來潮想試下去說服琪琪。然而，就喺我行到去房門前，準備拍門嘅一刻……
　
……咦？
　
「媽……如果我走咗嘅話，妳一個人點算？」雖然聲音好細，但確實聽到琪琪講緊嘢。
　
媽？原　來陳太一直都喺屋裡面？為咗確認清楚，我慢慢將耳湊到門前……
　
「但……萬一佢哋係呃緊我……好似王伯咁嘅話……」
　
王伯？邊個係王伯？點解我完全聽唔到陳太講嘢？係佢真係冇出到聲抑或有其他原因？
　
「妳話……殺……殺死佢哋？」
　
突如其來嘅一句說話不禁令我背脊發寒。但都未調整好心情，突然有一隻手冷不防咁拍向我肩膀……
　
「哇！？」我當場嚇一跳。
　
「你搞咩……」原來係阿俊，佢過嚟嘅時機可以話係非常差。
　
我正想拉佢走，但房門偏偏喺呢個時候打開。不過只係開咗少少，剩係夠見到琪琪嘅左半身，睇唔到佢右手嘅情況、亦都睇唔出房入面到底有冇人……
　
「你頭先……係咪偷聽我講嘢？」琪琪問，語氣就好似冰一樣。
　
「我冇偷聽！我只係想搵妳商量……」
　
「你講大話，你肯定係聽到……」
　
「好呀！妳要迫嘅話我咪直接講囉！」我望向阿俊，「我頭先聽到佢同阿媽講嘢，佢提到一個叫王伯嘅話……仲話要殺死我哋！」
　
「吓？」阿俊驚訝。
　
「我冇……」琪琪否認。
　
「今次到妳冇喇？」我盯住琪琪，手已經放喺腰間準備隨時拔刀，「咁妳開門呀，等我同陳太直接講！有咩不滿就趁而家傾掂佢！我仲未想死住呀！」
　
琪琪聽完唔單止冇開門，反而將左手放喺門邊，好似驚我會推門咁。
　
「老超，你細聲少少先，唔係班喪屍……」
　
「比起喪屍，我更加驚呢個女人！」我加重咗語氣，「妳係咪唔開門！？」
　
琪琪依然唔肯放手，當然我都唔敢亂推門，因為驚佢右手係拎住刀……推門嘅話就會俾佢有落手嘅先機。
　
「好，妳唔開門嘅話……」我一個轉身行返出廳，行埋去台隔離一手拎起布繩、另一手拎起爆窗用嘅工具，「阿俊，我唔會留喺度等俾人殺……我要過隔離屋先！」
　
「喂！你冷靜先……琪琪，頭先到底發生咩事？」
　
「我……」
　
我冇再聽落去，氣沖沖咁推開廚房門，可以見到裡面係改裝過多咗一間細雜物房。就喺我開始綁繩準備一陣爬過去嘅時候，竟然聞到旁邊雪櫃傳嚟一陣血腥味。
　
轉身望過去，唔單止血腥味，雪櫃底仲有乾咗嘅血潰喺度。出於好奇心，我戰戰兢兢咁打開雪櫃門……
　
一開，即刻見到一個老男人嘅斷頭，佢嘅雙眼已經被挖咗出嚟，頸部有被咬過嘅痕跡，臉仲有幾處刀痕。而斷頭下面就係佢嘅殘肢……
　
見狀，強烈嘅噁心感瞬間湧上心頭，我下意識退後幾步，正好退到雜物房嘅門前……
　
……嗚……
　
曾經有一瞬間，我仲以為自己係聽錯屋外面嘅喪屍聲。直至雜物房門一下撞落我背後，我先意識到自己大錯特錯……
　
「吼啊啊啊啊啊啊！」
　
我猛地轉身，眼前係一隻中年女喪屍。佢雙手一下蠻力將我撲落地，張開血口準備咬過嚟……
　
（待續）
　
　
越長越發現多嘢可以寫，不過下集真係會完結了。之後會繼續出短篇故事，各位要繼續支持呀。
　
睇完記住幫手留個嬲同分享出去！
　
p.s. 留言有個大廈平面圖，以免大家唔明個結構。
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
　
－－－－－－－－－－－－－－－－－
　
IG：echoofheart