巴基斯坦 - 過百萬豪華婚宴
經過連場婚禮前嘅慶祝活動，終於到正式婚禮嘅呢一日，先同大家分享一下巴基斯坦婚禮洗費。一對新人正式婚禮嘅今晚大約用咗超過一百萬巴基斯坦盧比，呢個費用只包括租用場地同埋供應比大約600個賓客嘅食物。而呢個婚宴場地係算佈置比較豪華而且夠大，現場亦比較多侍應提供服務，食物方面亦都係我去咁多個婚宴之中最好食嘅，餐單係由男主人（新娘嘅舅父）去決定所以特別好味😛。當然相比起香港嘅婚宴洗費巴基斯坦嘅消費仍然係好平，但係以巴基斯坦人平均嘅收入來講已經係算豪華，聽講仲有啲更豪華嘅婚宴場地要比呢度貴三倍價錢，真係想去見識吓😝至於大家最關心嘅人情問題，平均來講一個人會比五千盧比做人情，亦會是乎同新人嘅相熟程度而再有所增加，最親嘅親戚當然要額外送他們首飾或服飾等禮物。不過最有趣嘅地方，原來可能當晚係有超過600個賓客，因為巴基斯坦人好鍾意去飲又會叫埋其他自己嘅朋友或者鄰居，而且現場無人點算人數，亦都無預先劃位座位賓客喜歡坐邊度都可以，所以實際出席人數係無人知道。
講番婚禮當晚都係夜晚九點開始，由於婚禮係咁多個活動之中最隆重嘅場合，所以差唔多全場六百個賓客都係著得好靚好閃，好似睇緊台慶咁，以我嘅專業眼光去判斷，當晚係冇一個人有撞衫，因為大部份人都係度身訂造。而且女士們去飲之前都一定會化妝set頭，關於化妝嘅事可以睇返之前嘅分享 https://www.facebook.com/227075223978040/posts/2852905768061626/ 好彩我真係有買新衫去化妝set頭，唔係又失禮人🤣
當然新娘當晚係着得特別靚，全身紅色加金色刺繡嘅長裙加埋好重嘅飾物，而且當晚嘅燈光係最光猛，我特別容易影到新娘嘅靚相。所以當晚特別攰，我幾乎無坐低過，而且成日有人過嚟叫我影相，我好似變咗婚禮攝影師🤪其實現場係一隊專業嘅攝影師在拍攝婚禮的😊
由於當晚場地十分之大，自助餐食物嘅部份就係場地嘅後面，令到影相嘅空間更加大，不過一到左食飯時間，大部份人都沖去自助餐區，又因為食物真係特別好味，非常之誇張咁好快全部俾人攞晒！好彩工作人員特別預留左食物飲品俾一對新人嘅家庭，所以唔使去迫去搶我都可以有得食。特別要講通常婚宴會提供一種特別嘅粉紅色奶茶(Kashmir Tea) 加咗玫瑰水同埋唔同嘅香料又靚又好飲。仲有在入門口位置會提供大量paan(巴基斯坦燈籠），非常受長輩歡迎。通常在婚禮提供嘅檳榔唔係吐出來有紅色口水嗰種，裏面係加咗椰絲香料，不過我都覺得唔係太好食！
巴基斯坦嘅婚禮同香港嘅婚禮好多唔同嘅分別，其中一樣係冇婚禮司儀，所以你永遠都唔知道究竟發生緊乜嘢事，所以突然間新人就會進場，而且會有一班小朋友喺前邊阻住攝影師影相但係冇人控制，又或者突然玩緊一啲傳統嘅遊戲又冇人會講，所以我成日都要密切留意住究竟周圍發生緊咩事以免錯過任何情景。
巴基斯坦婚禮冇播放新人成長嘅環節亦都冇婚紗相，賓客除咗係食嘢之外就係不斷影相自拍，同所有親戚朋友招呼傾計。而且一對新人全晚都唔會特別講任何野，佢哋進場之後只係會坐喺台上面任由拍照，賓客如果想同佢地影合照，你只需要自己上去台坐埋一起攝影師就會同你影相，同樣地因為無人控制台上面嘅所有事，小朋友最鍾意衝上台玩，拍攝場面經常混亂搞笑。
另外巴基斯坦嘅婚禮亦都滲入左唔少印度元素，例如新郎嘅長輩會送一啲好大塊用巴基斯坦盧比組成嘅花牌代表祝福，我每次見到新郎拎住嗰塊花牌影相都覺得好搞笑。同埋你細心留意新郎嘅裝扮，其實係屬於Balochistan style ，所以其實每一個巴基斯坦婚禮都會因為新人係唔同嘅種族而有唔同嘅地方。
通常香港嘅婚禮都係朝頭早玩新郎嘅時間，巴基斯坦係差唔多夜晚12點幾開始玩新郎時間，新娘嘅妹妹會用手指尾勾住新郎隻手指，而新娘嘅朋友或者女家嘅親人會收埋新郎嘅其中一隻鞋，然後開始講數要新郎比利是，有滿意嘅利是先會放手同埋俾返隻鞋佢走，而當中新郎嘅屋企人會幫手盡量講價比少啲利是，呢個遊戲同香港嘅開門利是差唔多。
玩完遊戲已經差唔多半夜一點，新郎同新娘準備起身離開，首先新娘要同佢嘅長輩擁抱講多謝照顧佢長大，呢個同香港婚禮同長輩敬茶有啲相似。之後新娘就眼濕濕由佢嘅父母最親嘅屋企人同埋兩個妹妹送一對新人去婚車上，由今晚開始新娘正式就會住喺新郎嘅屋企成為夫婦。每次到咗呢個時間都好感人，因為通常新娘嘅屋企人都會喊，大家都唔捨得佢離開屋企，見到咁多個人都咁錫新娘，我都好戥佢開心，衷心祝福佢結婚之後永遠要幸福😍
婚姻的意義不在乎婚禮的豪華，兩個人真心相愛互相扶持才是最重要的事。
連日來的婚禮活動我真係好攰，但係成件事仲未完，婚禮之後第二日仲有一個由男家宴客的Reception Day ， 在巴基斯坦參加婚禮預留兩個星期無死的！
正式婚禮完結時間半夜兩點！
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
