「唔落筆猶自可，一落筆就把幾火。屌那星，點寫呀？求人呀家下，語氣豈不是要死狗舐鞋底咁款？尊敬的徐副校長⋯⋯乜鑒話？鈞鑒？大鑒？我忽然覺得我應該一早死入中資銀行，學嗰啲書寫公函畀乜總物總嘅技能，養兵千日，用在一朝呀頂。多年來都係 “Dear Sir/Madam” ，而家中文落筆，真係自斷半臂。
「鑒」想完一輪，終於要講小兒申請入學，解釋點解咁仰慕呢間學校嘅辦學理念，做咩事想個仔入讀呢間學校。呢啲位又係慘過西，讀書嗰時寫議論文，正反立論都係一段起、兩段止，但係人哋嗰啲議論可能有公共性、有爭議性丫，而家要刷校方鞋，仲要懶係了解間幼稚園嘅教學方法，認同到入心入肺，我未寫到第一個逗號已經有啲反胃嘅感覺。」
