《忘了忘不了》
♂：早晨
♀：早晨
♂：葉曉如佢早兩日搵過我
♀：點啊，你地交流寫作心得啊？
♂：初初都係，但佢係搵我算八字
♀：女人真係又塔羅又算命太迷信喇掛
♂：佢問我佢會幾時死
♀：下……你地話題咁跳脫既
♂：我有少少後悔答左佢
♀：你答佢咩？
♂：詳情我唔講喇，但係一個可以預期既時間內，佢今日又搵我再問佢老公
♀：咁緊要……你係唔係真係識嫁
♂：佢問左幾個師傅喇，人人都係答同一個時間，我個答案都係一樣……
♀：有冇咁邪啊……我家姐知唔知？
♂：唔知佢，但你唔好同佢講，我相信當事人想講一定會講
♀：我做呢行唔會亂講野，咁佢問佢老公既咩
♂：佢問我佢老公會唔會再婚
♀：咁你睇到既結果係點？
♂：再婚就應該唔會，但應該都會有人係身邊，但我講左前者，無講到後面
♀：算命既人真係問少句都唔得，你仲要咁識語言偽術
♂：我思考緊一個問題，如果我答佢會，佢會唔會有唔同既路
♀：以我所知佢同老公感情都幾好，如果佢真係命不久矣，咁咪珍惜咁行埋呢段路
♂： 到底係佢知道條命先至會珍惜，定係佢唔知都會珍惜呢？如果我同佢講老公係佢死左之後會有第二個，咁個珍惜又會唔會減少？
♀：人都害怕失去，如果知道即將失去就會想盡辦法去留住，但呢個行為並唔係真實既自己，只係一種錯覺
♂：我覺得呢種感情都係真實既
♀：感情係真實既，但係建構係錯覺之上，無左呢個情境，呢種感情就唔存在，即係有條件地愛，對我講，有條件地愛並唔係真實既愛
♂：你啱
♀：咁葉曉如打算點？
♂：佢話想為自己呢段婚姻寫最後既故事
♀：所以我唔想算命就係咁，因為我唔希望因為時日無多既錯覺而愛上唔係真正愛既人
♂：或者你會認清自己真正愛既人呢
♀：我希望我係死之前真正愛過一次
♂：乜愛係你心目中真係咁難？
♀：唔係我覺得難，而係其他人太易，係我心目中葉曉如既都唔算係純粹既愛
♂：你一個未愛過既人去質疑一個結左婚既人，真係少d自信都唔得
♀：所以我覺得我唔會愛
♂：你喜歡啦，我覺得愛係難得，但你唔相信愛，就更無可能得到愛
♀：上次我問你既問題你有答案未？
♂：未，比多少少時間我
♀：好，我有野做，再講，晚安
♂：晚安
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
