我要娶灰姑娘個繼母（下）
上集：https://bit.ly/2HsDQps
我將阿珠帶番城堡，準備一場盛大嘅婚禮。
但冇幾耐，父王怒氣沖沖咁出現喺我面前：「你要娶一個殘花敗柳？」
我解釋：「唔係殘花敗柳，佢結過婚，但佢老公已經過咗身，佢目前都係一個單身女性。」
「你將王室嘅威嚴置於何地？」父王嬲到面容扭曲。
我答：「王室嘅威嚴唔應該建基喺我娶邊個度，愛情自由，婚姻自由。」
父王咁樣講：「嗰個女人係呃你㗎。我查清楚啦，你喺宴會上鍾意嘅女仔，係佢個繼女，只係嗰個女人禁錮咗個繼女。」
我心諗，我早就知道劇情啦，問題係我想改變命運，唔想跟劇情嘛。
父王揮揮手：「我已經搵到佢個繼女啦，等佢親自話你知，佢繼母有幾惡毒。」
一個靚女行入嚟，唔係，係一個好靚好靚嘅靚女行入嚟。
我目瞪口呆，我從來冇見過灰姑娘，我一穿越過嚟，就已經拎住一隻玻璃鞋尋緊人。
雖然阿珠都幾靚，但佢同灰姑娘，係「生活中會見到嘅靚女上司」同「電影中以靚聞名嘅女星」嘅分別。
「王子！」灰姑娘楚楚可憐咁叫我，嘩，我個心都要融化啦。
我小鹿亂撞咗一陣，然後又諗起阿珠，佢始終係我嘅同鄉，我唔想對唔住佢。
「要娶，就娶個清清白白嘅靚女。」
父王冷哼一聲：「如果你仲係想娶嗰個寡婦，得，咁你就唔好再做王子啦，反正我唔止一個仔。」
唉，如果我冇咗王子之位，喺呢個人生路不熟嘅時代，我同阿珠都唔會過得好啦。
一邊係王子之位加絕色灰姑娘，一邊係同鄉阿珠，其實我哋都係啱啱識，唔算太熟㗎啫。
我問：「如果我娶佢，可唔可以放過佢繼母？」
「你只要唔娶嗰個寡婦，邊個得閒搞佢。」父王嗤之以鼻。
之後，我點揀大家都估到，我娶咗灰姑娘，繼續做王子。
我唔知點面對阿珠，所以我冇再見過佢，只係叮囑灰姑娘唔好報復佢。
原來做貴族嘅生活真係好爽，有奢華嘅享受，人人都對我言聽計從，仲有個咁靚嘅老婆。
從此，王子同灰姑娘幸福快樂咁生活落去。
講到呢度，大家應該發現，我冇改變到劇情，充其量只係令繼母冇受到報復。
啱啱穿越嗰陣，我的確一心係改變命運，但我漸漸發現，做王子嘅生活咁爽，我點解要改變呢？
好多人都話，要主宰自己嘅命運，其實大部份人想改變嘅，只係不幸嘅命運，講到尾都係想生活得更好。
如果已經生活得好好，大部份人根本唔在乎命運係自己主宰，定被人操控。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我要娶灰姑娘個繼母
