每年5月17日係「國際不再恐同日」，個英文名好長 - International Day against Homophobia, Transphobia, and Biphobia，簡稱IDAHOTB。
如果你年紀有返咁上下，就會睇住呢日由 IDAHO 變 IDAHOTB，不過依家性別身份咁多元，比較欣賞香港區集會籌委改嘅「IDAHO+」多啲。
點解要有紀念日？
因為1990年5月17日世界衛生組織正式將同性戀（homosexuality）喺《國際疾病與相關健康問題分類標準》（簡稱ICD）中移除。同性戀同疾病脫鉤，亦都唔需要害怕會「患上」呢個病。呢個就係IDAHO一開始淨係叫 “against Homophobia” 嘅原因，你睇認識歷史幾重要呢～
30年前同性情慾被病理化。咩叫「病」？邊個有權力決定邊個有病？
醫療知識專業從來都係一種權力，醫生嘅決定彷彿無容挑戰...
快速回顧歷史
1952年美國心理學會將同性戀列入《精神疾病診斷與統計手冊》（簡稱DSM）第一版嘅心理疾病，描述同性情慾係一種「反社會的人格騷亂」；到1968年第二版再將同性戀歸類「性偏差」（sexual deviance）。喺50至70年代，當時外國對同志有乸型嘅刻板印象，以Fruit稱呼。政府曾經會跟蹤同志，收集佢哋聚集嘅地方。亦用一個叫Fruit Machine測試公務員嘅同性戀傾向：一開始展示普通男女照片，之後換做裸露嘅相，觀察受測試者瞳孔有無放大。測試不通過的話，輕則工作不保，重則可能會被拉去坐監，或者係注射激素等醫學治療。
以前喺香港出櫃真係好危險，喺1985年至1995年間，瑪麗醫院曾為最少20名男同志進行電擊治療，院方事後都承認根本無效。
隨住醫療與心理學研究發展，到1973年，美國心理學會宣布，將同性戀從DSM中除名。直到1990年世界衛生組織跟住表態，將同性戀者從ICD第十版中刪除。
拗直治療仍然存在，並無想象中遙遠
社會學者Michel Foucault喺《瘋癲與文明》一書提到醫療化社會（medicalized society）將人分為「正常」與「非正常」嚟對待。佢拎十八世紀精神科嘅個案分析，當年嘅醫生會使用厭惡療法，例如浸凍水、綁束身衣等各種方法去「醫好」佢哋，實際只不過用恐嚇嘅手段逼佢哋學習點樣改變行為，睇落似返個「正常人」。
有睇《American Horror Story》或《Ratched》應該都睇到相關畫面，有冇被嚇親？！唔好以為呢啲咁恐怖嘅情節只會出現喺Netflix，時至今日，喺！香！港！都有機構掩人耳目咁進行呢啲「拗直治療」，使用噁心嘅治療方法對付同志，過程會一邊向同志展示同性相片，一邊利用藥物令佢產生噁心以及嘔吐感，從而嘗試令當事人對同性互動畫面連結不安情緒。2017年亦有報告指出，中國大陸有醫院提供「拗直治療」，方法包括服用或注射藥物，仲有電擊等等。
促制定政策禁止「拗直治療」
香港心理學會喺2012年發表聲明，同性戀唔係精神病症，係人類性向正常現象；同時無科學證據指「拗直治療」有效及對人無害。聯合國、美國心理協會、澳洲心理學會等組織更加一致反對「拗直治療」，研究發現「拗直治療 」不但毫無效用，反而令當事人受到心靈傷害、更有引致抑鬱、焦慮以及自殺嘅風險。
一年又一年紀念5月17號國際不再恐同日，今日有同志可以活喺陽光下...
但唔好忘記，香港仍然有人喺暗地裡被逼接受「拗直治療」經歷創傷，而帶佢哋去治療嘅人，往往就係佢哋嘅屋企人。
加拿大、德國相繼通過法案禁止「拗直治療」，今年5月英女皇喺演說中有明確提到將會禁止矯正療法（“ban conversion therapy”）。可惜香港仍然未有制定相關政策。
要做到不再恐同嘅世界，需要大家同醫學專業人士一齊正視問題。
#pridelab #pridelabhk #BeTheChange #DareToBe #idaho #idahot #idahotb
#lgbt #LGBTQ #LGBTPride #lgbtcommunity #hklgbt #同性戀
#國際不再恐同日 #拗直治療 #禁止拗直治療 #性別平等 #性別平權 #性別多元
