【Kongner編輯室】
瘋子愷：廿年光陰終成王 童年就此完結？
「我係純白鎮嘅小智，夢想要成為小精靈大師！」相信呢句說話都陪伴住唔少90後成長，可以話係我哋呢代人嘅童年回憶。
唔知有幾多人有睇過本人之前出過嘅一條片，就係講呢一個世代—Pokemon日月嘅動畫。
(Link: https://youtu.be/B58UkyEBLlM)
無論係喺條片入面定係唔同嘅場合，本人都多次講過其實本人真係好鐘意呢一代嘅動畫。隨住11月即將發售最新系列嘅《劍/盾》，咁姐係意味住Pokemon又一個世代即將完結，而動畫亦進入最後階段：阿羅拉聯盟決賽。
對於整個阿羅拉聯盟嘅發展，基本上無乜可能三言兩語就可以喺度講得晒，因此本人會考慮一下遲下會唔會出片同大家總結一下。
而就係琴日，日月最新一集播放之後，「サトシ優勝」（小智奪冠）呢個關鍵詞亦都曾經登上Twitter Trending首位，所以大家都應該知道首屆阿羅拉聯盟嘅冠軍係邊個㗎喇。不過以防有未睇過最新世代嘅觀眾唔知發生咩事，本人喺呢度都用最簡單嘅方法講下啦。
小智障「排除萬難」終於再次成功打入決賽，面對嘅係中二病格拉吉歐，都算係阿羅拉入面嘅強者。但經過之前一系列嘅晉級賽，其實大家都唔會期望今次聯盟會有媲美神奧或卡洛斯聯盟嘅精彩程度㗎喇。因為作為一個世代嘅頂上之戰嚟講，只係得一場3on3嘅比賽實在係有啲無癮。無辦法啦！而到咗最後，小智障作為第一主角都唔齊6隻Full Team呢個情況都可以話係開創先河。
經過一輪互有攻守嘅戰鬥之後，格拉吉歐明白到只有打敗保安局局長比卡超，先有望可以擊敗小智障，所以佢都毫不猶豫咁用一場只能用一次嘅大絕—Z招式，嘗試推比卡超落台，而小智障都以Z招式應對，最後比卡超就同索羅亞克兩敗俱傷收場，而去到呢個時候，雙方最後一隻Pokemon都係鬃岩狼人。
令人感到可惜嘅係，喺嚟到呢場戰鬥嘅最後階段，成個戰鬥局勢都無變得更加白熱化，而且播歌嘅時機亦都十分奇怪。面對住擁有成熟戰術嘅格拉吉歐同紅狗，小智障同佢嘅橙狗被單方面壓制。雖然都有幾次成功突破對手嘅反擊，但整體來講都只係佔下風。喺失去左使用Z招式翻盤嘅機會之下，觀眾都好想知小智障點樣逆轉戰局。但最令人意想不到嘅就係，佢最後居然只係靠毅力就唔知點解一下KO左紅狗啦！小智障亦都就係因為咁而贏得呢場3on3決賽，得到阿羅拉初代聯盟冠軍，亦都係佢人生第一個聯盟冠軍。
其實當初本人得知小智喺經過廿年嘅努力以及一班同伴嘅支持之下終於贏到冠軍之後，都覺得十分之感動。可惜嘅係當完整睇完呢一集之後，反而就有啲五味雜陳，有種略有遺憾，不完全燃燒嘅感覺。
之後本人搵返呢兩集動畫嘅Staff 列表嚟睇，睇睇下發現，原來編劇係藤咲淳一，而藤咲啱啱對上寫果集就係極具爭議性，小智障打贏哈烏果一集。但本人再睇返佢之前寫過嘅集數，__！本人就發現佢之前寫過唔少都係相當優秀嘅集數（呢度當然係我嘅主觀同偏見嘅角度啦），甚至包括本人出過片讚過嘅其中兩集。藤咲筆下嘅集數唔少都係喺創作方面比較大膽、唔按章出牌以及好玩得嘅單集。因此與其話藤咲淳一唔識寫劇本又或者唔識寫對戰，倒不如話佢筆下嘅小智障嘅對戰風格同大家認識多年嘅小智實在有一定嘅分別。另外就係藤咲喺劇情節奏嘅把握上都唔太理想，有進步空間，例如該熱血嘅時候唔夠熱血；該感人嘅時候又唔夠感人，的確係俾唔到聯盟決賽應有嘅激情俾啲觀眾。
事實上雖然阿羅拉聯盟喺製作質素上面係無得同卡洛斯聯盟比較，但係咪代表阿羅拉聯盟真係咁差？當然唔係啦。呢次聯盟嘅比賽入面都有幾場令人印象深刻嘅對戰，好似瑪奧果場同卡奇果兩場都相當唔錯，甚至古茲馬果幾場都好突出到人物特色，可惜嘅係全部都同小智障無關。
不過無論如何點都好，純白鎮嘅小智終於拎到佢人生入面第一個聯盟冠軍。雖則佢重未做到真正嘅大師，但係對於見證佢成長嘅90後來講，都意味住我哋呢一代人嘅童年真正完結，而童年嘅完結，可能正正先至係追逐夢想嘅新開始。
恭喜你，小智！
當然，Pokemon都無可能就此完結，畢竟係一隻識生9999千足純金蛋嘅雞嚟嫁喇，而官方都已經流出咗下期動畫嘅消息。就現時嘅資訊來講，唔少Fans都擔心下期動畫會有一個好大時轉變。當然，暫時流出嘅消息重係好有限，小智障重有無得做主角呢樣嘢，呢層就真係要等官方正式宣佈先知喇。
（本欄逢周一、四更新。敬希讀者垂注）
