難食嘅一餐都可以好浪漫
話說早幾日係我同老婆嘅相識十幾周年紀念日，如果响香港嘅時候，我諗我係「必須」要book枱食飯、送花、送禮物之如此類，留低阿女响屋企比工人姐姐照顧。
不過，今時唔同往日，阿女係一定係一齊，而節目亦一定係關佢事。不過重點並唔係我地一家人當日有乜節目，亦唔係做咗啲乜嘢。
最重要嘅係，最後我兩公婆（主要係我😅）決定去食咗一間Asian Buffet。我地其實响外國從來對亞洲食店都好大膽嘅，因為覺得每個地方嘅文化，都直接影響咗所謂嘅亞洲菜嘅味道，係好有趣嘅。我諗無乜人會去日本食中餐😝，或者法國去食日本拉麵😱。
我雖然對食係無乜要求嘅人，但係我從來都好照顧我老婆對食嘅諗法。作為一個港女，我深明佢响大時大節對食嘅要求😉。而且，我老婆的確係一個對食要求比我高嘅好多嘅人（所以去到英國，大家嘅廚藝進步得好快😆）。不過，去咗英國，大家都有所改變，唔再著重太多物質嘅生活。
本來我地係諗住去食一啲比較特別嘅嘢，不過因為某啲原因，結果揀咗一間Asian Buffet，諗住「玩下」。我咁大個人，自問乜嘢垃圾都可以食得落。結果係我食咗一碟之後就好反胃，因為真係難食到形容唔到🤢。繼而我就好內疚，極之自責😰。
從來都係因為我揀錯嘢食，而令老婆黑面。但係今次，亦係相識以黎第一次，係輪到我黑面😑。點知我老婆就講咗一句：「唔洗咁嘅樣嘅，好就一餐，唔好又一餐。」
聽到厘句說話，我真係好感動。原來大家都真係改變咗！深深覺得，愛同關心，係唔係用錢堆砌出黎嘅😘！
最後，唔知係難食還是心理作用，我真係病咗，瞓咗十幾個鐘。乜都無做，工作上嘅嘢停咗，inbox爆咗，Page得Schedule Post。最慘係，家務又係老婆做晒！
所以，我都唔知要多謝厘間嘢好，令我知道我有一個好老婆👩❤️👨。我都唔知要多謝佢好，還是要唱衰佢好，老老實實，我咁大個人都未食過咁難食嘅嘢🤮。
#難食嘅餐廳都可以好浪漫
#愛係可以唔洗錢嘅
#有啲嘢真係錢買唔到
