我等你等到永遠（下）
上集：https://bit.ly/3oIyXcG
但老公嘅家庭好保守，應該話，佢哋身處嘅成個城市都好保守，從來冇聽過男人會愛上男人，簡直天方夜譚。
成個城市嘅人都好似機械人，去到某個年紀，就要同合適嘅對象結婚生仔。
隨住年齡嘅增長、職位嘅提升，佢哋面對嘅壓力愈嚟愈大。
阿康同父母講，自己係獨身主義者，頂住父母嘅壓力，死都唔結婚。
而我老公雖然喺感情裡面係攻嗰一方，但佢嘅內心遠遠冇阿康咁堅定。
終於，有一次佢老豆重病，佢抵受唔住老人家殷切嘅期望……結咗婚。
我沉默咗一陣，問：「你Gay㗎？」
「我本來鍾意女人。」老公嘅眼神迷茫而溫柔：「但後來我鍾意咗佢，冇辦法再鍾意其他人。」
我又問：「咁我呢？」
老公曾經無數次同我講「我愛你」，但呢一刻，阿康嘅死訊好似擊潰咗佢心底嘅圍牆，佢避開我嘅眼神，一言不發，畀出最誠實嘅答案。
我不斷追問佢哋之間嘅細節，老公send咗兩條link畀我，係兩本小說。
阿康係一個作家，筆名康起，佢哋一齊嗰陣，阿康寫咗一本小說講佢哋嘅生活點滴，甜蜜而又帶住一絲對未來嘅惶恐。
老公結婚後，阿康寫咗另一本小說，講分開後嘅日子，話自己要等佢等到三十五歲：
「我比這世上任何一個人都更加熱切地盼望他能幸福，只是，想起這幸福沒有我的份，還是會非常的難過。」
後來，被抑鬱症折磨嘅阿康，喺二十八歲嗰年，投江自殺，屍身順江漂流十五日，先被打撈起嚟。
阿康話會等到三十五歲，但佢去唔到三十五歲，所以……佢想永永遠遠等落去。
我淚如雨下，我曾經想像過一萬次，如果我見到嗰個「前女友」，我要點樣勸佢放低我老公，佢唔肯嘅話，我要點鬧佢……
但呢一刻，我終於知道佢嘅身份，仲知道我老公冇愛過我，我偏偏無法對阿康生出一絲嘅怨恨，反而有一種奇怪嘅心痛。
或者，我根本冇咁愛我老公，我都只係到咗適婚年齡，搵個唔太差嘅人結婚啫。
我冇比佢哋高尚，冇比佢哋深情，冇比佢哋正確。
我只係比佢哋幸運，我鍾意男人，而社會咁啱接受我鍾意男人。
我係一個幸運兒，但有好多好多人，冇我咁幸運。
之後，日子照舊過，我哋冇再提起阿康，亦冇離到婚。
去到呢個年紀，同現實生活相比，乜嘢愛唔愛根本不值一提。
我永遠都唔係為愛投江嘅阿康。
所以，當我個仔出世，老公話幫個仔改名做「意起」，希望個仔將來「意氣風發」，我同意咗。
儘量我心底清楚，「意起」唔係「意氣風發」，而係「憶起」，「憶、康起」。
我哋一家三口，去影樓影咗輯家庭照，笑得幸福，又有邊個會知道，老公根本唔愛我。
你看街上來來往往的人群，每個都行色匆匆，遇見了，淡漠的看上一眼，
誰也看不穿別人身後的故事，誰也不知道別人的心裡，是不是住著這麼一個人。
—完—
真人真事改編自「南起白康」自殺事件。
南起白康與男友「張先生」確定關係後，曾同居，有作品《浮生六記》，記錄兩人的日常，文筆清新溫暖。
2006年，張先生結婚，南起白康撰文《我等你到三十五歲》，字裡行間十分憂鬱，疑患抑鬱症。
2008年，南起白康於長沙投湘江，屍身順江漂流十五天後，被發現並打撈，時年未至二十八歲。
2009年，有人刪除了南起白康的Blog，理由：「斯人已逝，何堪回首」。
「所以很多時候，不是願意等下去，而是不得不等下去—知道能讓自己這樣喜歡著的人，這輩子都不會再遇到第二個了。」
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我等你等到永遠
