【面對無恥強敵，弱國只能強硬應對：陪你讀《廉頗藺相如列傳》】
宋詞、散文，好似好輕鬆，今次嚟到篇幅好長嘅《廉頗藺相如列傳》（節錄），不過唔駛驚，文章篇幅雖然長，但大部份都係細緻嘅描寫，只要掌握重點，理解文章內容，都可以好輕鬆。
▍篇文主旨想講乜？
《廉頗藺相如列傳》原文講過好多人，但節錄嘅主角就只係藺相如。篇文主要讚揚藺相如嘅才智，以及佢忠心耿耿為國效力，甚至以必死決心向祖國貢獻嘅高風亮節。其實簡化地講，《廉頗藺相如列傳》（節錄）只有兩大重點同三段劇情，分別係：
兩大重點：
1. 藺相如係難得嘅忠臣，值得學習
2. 秦國強大但無恥，弱國趙國要以才智同計謀先有機會取勝
三段劇情：
1. 藺相如持和氏璧出使秦國，後完壁歸趙
2. 藺相如陪趙惠文王到澠池見秦王，避免趙王受辱
3. 藺相如同廉頗交惡，到成為生死之交
▍劇情一：
完壁歸趙咁出名，大家應該都識，其實就係出自第一段劇情。話說趙國得到舉世無雙嘅玉器「和氏壁」，而秦國想用15個城池同趙國換，但秦國咁唔守信用，好明顯攞到玉之後唔會交城出去；但唔同秦國交換，又驚直接比佢攻打，結果陷入兩難，唔知點算。
輾轉之下，就由藺相如帶和氏壁去秦國，結果真係發現秦王無意守信用，於是藺相如就以性命威脅，將和氏壁攞返手上，並偷偷地派人將和氏壁完好無缺咁帶返去趙國，於是就係「完壁歸趙」了。藺相如離開秦國之前同秦王講：「如果秦國先將15座城交比趙國，趙國又點敢唔交出和氏玉呢？放心比我返去啦！」於是藺相如亦都順利離開左秦國，但結果秦國都無同趙國交換城池，大家就當無左件事lu，無再講過，即係唔存在啦～
▍劇情二：
後兩段劇情相對短啲，第二段劇情講到藺相如經過完壁歸趙事件後已經上位，當時秦王約趙王到澠池（地名）見面，去嘅話趙王驚死，但唔去又好似向人示弱咁，結果都係要去，但就由藺相如陪同。
澠池之會期間，秦王叫趙王演奏樂器，但就比秦國史官寫成「秦王命令趙王奏樂」，於是藺相如再次以必死嘅決心同聰明才智，要求秦王為返趙王奏樂，比趙國史官寫返做「秦王為趙王奏樂」，兩邊打和，Super！
之後，秦國群臣叫趙國送15座城嚟賀秦王壽，之後藺相如即刻話請秦國以咸陽（秦國首都）為趙王賀壽，結果又係兩邊打和Super，亦順利避免趙王受侮辱。
▍劇情三：
劇情三呢，同劇情二都幾有關，事關澠池之會完左之後，因為功勞大，藺相如再比趙王升官，官位甚至高過廉頗，於是就引來廉頗不滿。藺相如出身寒微，又係文人，廉頗作為將軍，認為佢得把口，唔似佢有戰功，當然不滿。
藺相如因為咁，之後見到廉頗就迴避，但就比藺相如嘅門客質疑佢竟然怕左廉頗，但藺相如連秦王都唔驚，又點會驚廉頗？其實，藺相如認為秦國咁強大都唔敢向趙國郁手，純粹係因為藺相如同廉頗兩位坐陣。藺相如相信，假如自己同廉頗交惡，只會益左秦國，以國家為重，佢唔可以同廉頗反面。
廉頗知道左呢件事之後，非常自責，於是走去向藺相如負荊請罪。結果，兩位就成為左惺惺相惜嘅生死之交。
▍時代背景係乜？
《廉頗藺相如列傳》發生於戰國時代，當時秦強而趙弱，弱國為求生存空間可以話相當為難。
面對無恥嘅強敵，只有強硬應對，弱國先可以爭一口氣。為趙國呢個弱國效力相當唔容易，但作為忠臣、愛國者，藺相如可以話係鞠躬盡瘁，死而後已。
《廉頗藺相如列傳》出自西漢司馬遷嘅《史記》，本書寫成於西漢，咁係儒家思想背景下，當然要讚揚高風亮節嘅忠臣，因此大力推舉藺相如嘅功德，可以話理所當然。
▍重要句子：
1. 「秦以城求璧而趙不許，曲在趙；趙予璧而秦不予趙城，曲在秦。均之二策，寧許以負秦曲。」
2. 「大王欲得璧，使人發書至趙王，趙王悉召羣臣議，皆曰：『秦貪，負其彊，以空言求璧，償城恐不可得』。議不欲予秦璧。臣以為布衣之交尚不相欺，況大國乎！」
3. 「顧吾念之，彊秦之所以不敢加兵於趙者，徒以吾兩人在也。今兩虎共鬥，其勢不俱生。吾所以為此者，以先國家之急而後私讎也。」
▍小知識：
《廉頗藺相如列傳》入面多次提到秦強而趙弱，但其實趙國唔係真係咁弱。普遍認為趙國係戰國七國之中數一數二嘅軍事強國，亦長期係秦國嘅最大敵人。
最為人稱道嘅，係趙武靈王（趙惠文王阿爸）推行既「胡服騎射」軍事改革。為左對抗敵人，只能by any means necessary：從此，趙國人要著胡服，學習騎馬、射箭，最終組成左一隊強大嘅騎兵軍團，戰鬥力之高，令其他六國刮目相看、聞風喪膽。文中提到嘅「秦強趙弱」，某程度上只係相對上嘅強弱，千其唔好因為咁就睇小趙國啦。
============================
#DSE範文 系列：
#1【賄賂敵人只會令自己滅亡：陪你讀《六國論》】
https://goo.gl/xnpwiV
#2【想溝女定為國為民？辛棄疾《青玉案•元夕》】
https://goo.gl/mwBBty
#3【如果有得打三國無雙，蘇東坡一定會用周瑜：陪你讀《念奴嬌•赤壁懷古》】
https://goo.gl/sNNxWV
#4【如何情緒勒索你老細：諸葛亮《出師表》】
https://goo.gl/dsxGXM
#5【面對無恥強敵，弱國只能強硬應對：陪你讀《廉頗藺相如列傳》】
https://goo.gl/3Pjvz4
============================
"Oh Readly?" - Flip a page everyday.
#一班鐘意睇書又想荼毒大家睇書嘅90後
#多多指教
============================
有文學野想分享？
歡迎各位Reader Inbox我地🐱
