仲有九日Jasmine就2歲🎂喇，昨日同公公婆婆去食buffet慶祝珊瑚婚，姨姨都幫Jasmine攞咗個心太軟寫名影相呢❣️
雖然未夠兩歲，不過呢個小朋友真係好老積，前兩晚我去咗返學爸爸陪佢瞓😴，爸爸話佢係咁捵嚟捵去，之後講咗句「我瞓唔到呀」聽完我真係覺得好好笑呀，一個兩歲都唔夠嘅小朋友竟然講句咁嘅嘢🤣
未夠兩歲嘅佢真係好多嘢講，1-10廣東話+英文，A-Z，分辨顏色，動物，交通工具，基本對答都冇問題。而且成日跟我哋口水尾講嘢同唱歌🎤，我講電話嘅時候佢就係咁跟我講嘢😂
不過有優點當然有缺點啦，佢仲未自己識跳，成日要我扶住佢跳；極度黐身，連我去一去洗手間🚻都要黐住哂；佢仲超級硬頸，好似琴日去咗誠品Cafe飲杯野☕️，佢就已經嘈咗好多次，大家都知誠品係書店，隔離啲人都喺度睇緊書📚，搞到我哋鬼死咁尷尬。
到晚飯時候我單拖湊住佢+推BB車等位及等爸爸泊車🅿️，短短十五分鐘我已經頂唔順喇😡！因為佢唔肯坐車仔，咁我抱住佢啦，抱佢又要落地，落地又要坐喺地下，再抱起佢又趴喺地下，由於佢而家好大力，我真係搞佢唔掂，點氹都冇用，最後爸爸嚟到又有位，可以入去食飯先冇事。
睇嚟 #trouble2 未夠兩歲都已經展開，如果大家有咩好方法可以對付以上問題嘅請話我知啦，因為我有預感好快會有下一次架喇😢
