【狼少狼笑｜狼少製作】作歌不能唯有打文 乜真係有嘢係「冇討論空間」？
無心機作歌⋯⋯只因香港今日發生咗太多事，但又唔想自己谷住肚氣，不如借大家幾分鐘發洩吓打吓文。
是日發生嘅指定選舉主席、監警會交Report、首名「暴動」人被判監、再加「香港的真相」吹水會⋯⋯等，當中有一單，小弟認為足以總結咁多件事嘅核心，就係教育局局長阿楊生要求考評局取消DSE歷史科嘅題目，而理由係：「冇討論空間，答案只有弊唔會有任何利」。
睇番題目，「根據試題上的資料，解釋是否同意『1900-1945年間，日本為中國帶來的利多弊』」，年期涉及日軍侵華，令唔少人「愛國心起」，故然無可口非，小弟作為一個讀過歷史、睇過歷史片段嘅人，假如我係應屆考生，亦會寫上令楊局長安慰嘅「弊多於利」交卷。但唔係因為呢條題目無討論空間，相反，正正係因為同自己、老師經過無數嘅討論、批判，自己反覆搵齊不同答案嘅可能性同合理性，最終由自己衡量出呢個答案。相畀起聽完楊局長一句「冇討論空間」後按章填充嘅「弊多於利」，文字相同，但本質相反。
依賴一個所謂嘅權威，去話畀人知咩叫對或錯，叫洗腦；從一啟蒙者提問，去令其他人識思考，最後畀一個答案自己，叫教育。呢樣嘢唔係小弟吹水，萬世師表孔子都要每事問。問，係因為有懷疑、好奇心，問完等人答，人哋答完再追問，問到人都唔識答，就自己消化最後成為學識，呢個過程唔係討論係乜？而且問都唔止，仲要「每事」問，死人冧樓都問，只係問之餘要尊重、「非禮勿言」，唔係叫你唔好問，而係要認真、無機心咁為學而問同諗，叫討論；問完嗄嘻呵唏當算嗰啲，叫八卦而已。楊局長竟敢對學術上講出「冇討論空間」一句，企圖令孔子萬世芳名毀一誕，真係好笑之餘，更令人嬲。
嬲，係因為當一個地方主宰教育嘅人能將洗腦當成教育，非教育界嘅人就更可想而知，最明顯例子，莫過「Yes Sir」、「No Sir」、「Sorry Sir」呢三大金句，完全唔會問問題，所有嘢煮到嚟就食，慣性唔思考，習慣咗之後仲要怪責問問題嘅人煩、唔守規舉，怪責到咁上下就躁，繼而想反擊，但又因為慣性唔思考而無招可使，唯有用唔使靠智慧嘅武力，用完仲要覺得唔經思考嘅招式令自己所向無敵，誰不知自古同無敵有關嘅名言，都係「無敵是最寂莫」、「人無恥，便無敵」等悲劇收場。
唔識用腦，繼而動武。呢種暴力喺呢近一年嘅時光以權力、制度同武器嘅方式一直用喺大家身上，時至今日，連一份試卷都用上呢種武力，小弟只能夠提醒各位講⋯⋯爭取時間學習韓國文化喇～唔係Kpop嗰啲，北韓嗰種呀！
#要飲住涼茶打文降火
