#夜麻麻先寫文 #hi好耐冇見 #有冇掛住我寫長文 #如果冇嘅唔使講我知
千頌C x BossMind 專欄 👈🏻幫我like咗佢
國泰（293）周三公佈至6月止半年業績，差就梗㗎啦，不過到底有幾差，我覺得唔應該同上年同期比，要比較就要同沒有疫情嘅情況下比。
1：單計今年上半年，就勁蝕75.65億，雖然比上年同期嘅98.65億蝕少咗廿幾億，但比2019年同期賺13.47億，只能用慘烈去形容。
2：其實國泰都真係唔好彩，2017、18年嘅半年業績都好蝕錢，好難得19年扭虧為盈，但就預肺炎。
3：講收入，今年上半年收入有158.54億，比上年同期少超過四成，比2019年上半年嘅正常發揮535億少七成。
4：上半年國泰運載乘客只係得15.7萬人，平均一日得868人，對比2019年上半年，係1826.1萬人，聽到個數都怕佢會執，但放心，一定唔會。
5：不過你話國泰份業績，係咪冇樣好呢。正所謂擁抱正能量，就係正好樣！
6：國泰嘅乘客收益率，達94.5港仙，即係話每運載一名乘客1公里所產生嘅收入，就係94.5港仙啦，對比起19年上半年54.9港仙，可以話係大躍進！原因，好易明啦。
7：人飛唔到啫，但貨就四圍飛。集團貨運收入比疫情前仲多咗，2019年上半年114.98億，今年上半年係127.02億。
8：計貨物運載率，如果100%就即係full晒機位，今年上半年係81.4%，係歷史新高；2019年上半年係63.4%。如果計貨物收益率，就有3.37元，比19年嘅1.87都要高。
9：仲有，大家一向好關注嘅「國泰賭油」戲碼，今年上半年，錄燃油對沖收益6.25億，係收益呀！有得賺！唔係蝕啦！係自2014年以來，第一次半年冇炒燶油啦！以全年計，自2014年起燃油對沖一路勁蝕，到2020年全年，7年輸足287.87億元，今年呢場蝕錢嘅賭局，或者有望因為疫情而終結。
10：國泰正能量，就係希望第四季可載客量最高調整至疫情前水平嘅三成，期望今年餘下時間，每月燒錢10億以下。頌C都正能量，我希望今年第四季，可以返鄉下飛日本⋯嗯，諗吓好。
By千頌C
