🌅日落前交換日記🌅
6月6日
今日嘅日記係有關於百變小櫻clear card。
星期一至五 5-6 叱咤903 阿檸 - 毒檸王國
親愛嘅會長：
今年對於我哋呢代唔受社會重視嘅人嚟講就好似係重光嘅一年，spotlight打番落我哋度咁💡💡。
《數碼暴龍大冒險》用番十年前嘅主角出新一季同埋出育成遊戲🐥，《美少女戰士》出重製版Crystal👧🏻，《寵物小精靈》出實境遊戲🐺，《全職獵人》居然仲復刊添🏃🏻！而上星期五，我就睇咗《百變小櫻》🌸新連載clear card系列，係古羅咭呀，睇嘅時候居然小小生疏感都冇，小櫻同小狼仍然係兩個你好熟悉嘅朋友，卡名當然同一眾數碼暴龍一樣倒轉都背到啦😌。
不過當你心懷感激嘅時候，睜大眼望清個真相👽，你就會發現所有你成長階段最珍貴嘅回憶湧曬番嚟，其實係代表你已經老到進入一個商家可以推出大量產品呃你錢嘅階段😱😱😱。你以為係我哋呢代人被重視？其實只係我哋呢代人嘅錢被重視💵💴💶。
所以我好努力咁㩒住自己買呢啲動漫嘅週邊產品嘅慾望。變老都算，我接受唔到自己變老仲要比人呃錢！所以我決定將啲錢花喺新一代，打開我嘅新世界！我打算買隻妖怪手錶嚟玩吓，唔再糾結於回憶，要向前望👀！
P.S. 你支sailor jupiter 變身棒唔見咗真係唔關我事。
動漫新人類 Oscar
