世上最 top 的 top sales，不但能夠劏你於無形，還可以在你最憤怒，憤怒到你本來不想再給他生意的時候，依然心甘命抵地給他再劏一次，而當佢劏完你之後，你仲會想跪喺佢面前多謝佢。
如此驚天地泣鬼神的銷售故事，一定要分享一下。
當然，除了那個 top sales 的轉數真是十分之高超之外，故事的客戶角色 (即是被 sell 嗰位)，當然都要有番咁上下無賴同豬兜，方可達成交易。
話說，我有個 friend。
強調，唔係我，係我個 friend。
很久之前，在某一個時空裏，我個 friend 開著他那部引以為傲的名貴跑車，駛入一個停車場裏面，既為泊車，也為洗車。
是的，是某些停車場內的外判洗車服務，即是洗十次打蠟十次就唔知收你幾多千幾多萬嗰啲。其實對於很多人來說，這等收費換來這等服務是白癡才會上檔的；洗完一陣咪又係舖塵，同埋洗還洗，唔使一定乾淨到發光先叫洗咗嘅。
但像我個 friend 一樣的異類偏偏認為，買架車返嚟威，梗係要威到發光先叫做威，所以這個錢，他是很樂意付的。
上個星期，我個朋友先至畀咗萬幾蚊去續咗個 package。
然後，就在這個時空裏，弔詭的事情發生了。
他如常把車停在洗車處附近，如常地交低車匙，如常地準備往升降機的方向離開。
「葉生，」洗車公司的主管叫住他，「請等等。」
「係？點樣？」
「唔好意思，」這位平時收慣葉生貼士的主管面有難色，「你個 package…… 冇咗。」
「冇咗？」葉生不解，「唔係上個星期先續咗咩？」
「係...... 但係......」主管隻手開始震，「你個車牌噚日畀人勾咗出嚟，換咗第二個車牌。」
這個洗車的帳戶本來有兩個登記車牌，一個是我朋友的，一個是我朋友前度的。
「畀人勾咗出嚟？」他激動的聲線在停車場內產生刺耳的回音，「畀邊個勾咗出嚟？」
「楊小姐......個朋友......」主管低著頭說。
楊小姐是我朋友的前度，楊小姐的朋友其實不是朋友這麼簡單，是她的現任。
「楊小姐個朋友勾咗我車牌出嚟，再擺咗佢自己個車牌上去？」
「係......」
「楊小姐畀佢咁做？」
「楊小姐冇阻止囉......」
「楊小姐冇阻止，咁你哋唔阻止？莫講話我做咗你哋個客咁耐，你老細仲係我朋友，我而家就打畀你老細投訴你！」
「葉生，我哋梗係知老細係你朋友啦，所以我哋點敢亂嚟，我哋當時即刻打畀老細，問佢應該點做，佢話......照做。」
「佢話照做？得！」他立刻拿起電話，把運行全身的怒火瞬間轉移到這個老闆身上。
電話很快接通，而對方未等我的朋友開口，他已經說：「得，我知你打嚟做乜，你唔使咁嬲，你而家喺邊，我過嚟搵你飲杯咖啡。」
洗車公司老闆很聰明，選了一家高檔咖啡室，因為他知道在一家高檔咖啡室內，我的朋友不敢提高聲線。
老闆絲絲然坐下，望著嬲爆爆的他。
「我見你唔係畀機會你解釋，係同你求證；如果頭先你伙計講嘅嘢係真，我一定寫衰你公司，一定。」
「大哥，平時你都唔會攞枝筆嚟兇人，今日做咩咁冇品，畀 Danielle 知道點算？」
「你仲敢提佢個名？而家你夾埋外人剃我眼眉，仲話我冇品？」
「我剃你眼眉？葉公子，我幫緊你喳。」
「我生得靚仔，唔代表我係......」
「唔代表你係白癡吖嘛，我知，你點會係白癡啫，就係知你唔白癡，講個故事你聽，有冇聽過『有條窮撚帶咗個仔去住大屋』嘅故事？」
從前有條窮撚。
他是一位超級富豪的園丁，每天都看著超級富豪如何享受著住大屋的生活。
隔了一段時間，超級富豪把大屋賣掉了，由於新屋主還有一星期才搬進來，園丁決定帶他的兒子在大屋內住一個星期，希望兒子現在體會到有錢人的生活，將來便會發奮努力做個上等人。
園丁在大屋過了非常愉快的一個星期，以前夢寐以求的都終於能享受了。要搬走的一天，自然是依依不捨，反而他的兒子是急不及待的跑回家。
窮撚問個仔，你唔掛住間大屋咩？
「一啲都唔掛住。」
大屋裏面嗰啲飯碗一跌就爛，我哋屋企嗰啲碗跌極都唔爛；佢哋個泳池咁細，我平時游開個海咁大。瞓喺嗰張大床上面，我望到嘅係吊燈；瞓喺我張吊床上面，我望到嘅係星星。
洗車老闆看著我的朋友，期待著他的反應。
「你想講咩？」我的朋友說。
「擁唔擁有唔係最重要，擁有可以唔開心，擁有唔到都可以好開心，係心態問題。」
「咁我而家擁有唔到，可以點樣？」
「雖然你擁有唔到，但有樣嘢你可以控制，就係你喺佢心目中嘅感覺：你想你喺佢心目中係一個 pok guy，定係 nice guy？」
「Nice guy 又點？」
「想做個 nice guy，好簡單，你而家即刻幫佢個 account，買多 25 次，然後我叫同事 send 個 SMS 去佢電話，同佢講，葉生驚你哋唔夠用，幫你哋加大咗個 package。」
我的朋友沉思良久。
終於說：「買多 25 次會唔會太少？」
係囉，都係嗰句。
緊握著拳頭，你什麼都捉不住；張開了雙手，你擁有的是全世界。
新屋 洗車 打 蠟 在 采亮專業車體美研 - Facebook 的推薦與評價
精緻洗車專業打蠟內裝保養臭氧殺菌玻璃刮傷車體鍍膜327 桃園市桃園區新屋區中華南路一段96之1號. ... <看更多>