神偷家族（上）
我係神偷。
更準確地講，我未來會成為一個神偷。
我生於神偷家族，父母因車禍而死，已經退休嘅爺爺只好重出江湖，重操故業養大我。
作為家族傳人，除咗讀書之外，我亦要跟住爺爺嘅安排，苦練盜竊技術。
點樣可以喺不知不覺嘅情況下，偷走對方褲袋裡嘅銀包、用鐵線開鎖、聲東擊西......一切一切，都係神偷家族嘅必修科。
我努力跟住爺爺學習，我都曾經好崇拜眼明手快嘅爺爺，
但隨住我慢慢長大，我開始懷疑，21世紀嘅神偷，係唔係應該與時俱進？
依加入屋爆竊，先唔好講大廈走廊佈滿攝像頭，
就算搵到無Cam嘅大廈，再通過觀察監視，趁屋主出門後入屋，
屋內好多時都只有幾千蚊現金，甚至無現金，更加唔會有金銀珠寶。
計埋車費、風險......平均仲少過最低工資。
偷銀包算賺得多啲，但隨住電子支付愈發普及，銀包嘅現金都愈嚟愈少，而且周街都係Cam，風險上升。
偷手機，手機有太多防盜裝置，又有定位，又有密碼。
對科技一竅不通嘅爺爺，曾經偷過部iPhone，
佢都未搞清楚要去邊度賣機，就俾失主搵到佢，賠咗一大筆錢，人哋先無報警。
啲錢去咗邊？錢喺銀行、錢喺電子世界。
學習科技，掌握先機，先係新時代嘅神偷！
有咗方向後，我唔再咁有心機學爺爺嘅課程，而係自修IT，希望可以成為一個成功嘅黑客。
我對IT有基本理解後，都知道要破解一啲高級防衛系統，例如偷人哋銀行戶口嘅錢，係好難做到。
但係一般人嘅防範意識無咁強，盜用吓個人資料，就有機會做到，都算係「偷」掛。
爺爺話，我中學畢業後，就可以「執業」做神偷，繼承佢嘅衣缽。
我就想讀大學讀IT，爺爺唔同意：「做賊駛乜讀大學？嗰啲乜嘢電腦電子，都係旁門左道！」
我嘆氣：「爺爺，你都已經係神偷，但近年來，你嘅收入唔係少咗好多咩？」
「咁係因為我年紀大咗，無咁眼明手快。」爺爺答。
我又問：「係咩？有幾多次，你偷到銀包，但裡面大部份都係卡，根本無乜錢？」
「呢啲都係小事，總之神偷技術做到大事！我阿叔係民國神偷，偷盜過偽滿洲國嘅糧食券接濟災民，偷過日本仔嘅黃金......」爺爺囉囉唆唆咁講家族嘅光榮事蹟。
我打斷佢嘅說話：「日軍侵華嗰陣，無裝到周圍都係Cam掛？」
爺爺窒一窒：「你即係睇唔起我？」
「唔係，只係時代進步，我哋都需要進步啊。」我強調。
爺爺沉默咗一陣，然後問：「你係咪想進行『家主挑戰』？」
家主挑戰，係所有神偷家族都有嘅一個傳統。
家主同被挑戰者要住喺同一屋簷下，為期三個月，邊個偷到對方更多財物就獲勝，勝者可以做家主。
「依加我係家主，你要聽我話，但如果你做到家主，就到我聽你話。」
爺爺眼神堅定：「就用實力，嚟證明我哋邊個先係啱！」
雖然我哋呢個家族人丁凋零，暫時得番我同爺爺兩個，
但一諗起我有機會肩負起成個家族，我都熱血沸騰。
呢場挑戰，我一定要贏！
我同爺爺本來就一齊住，挑戰好容易開始，只係訂立咗一啲基本規則，
例如家中嘅共同財物（電視機之類），唔會被計算，只計個人財物。
為咗面對呢場挑戰，我連手機都賣埋，入晒啲錢落戶口，每日都只會袋住午飯錢，一蚊都唔會多。
就算係咁，我嘅午飯錢都經常不翼而飛，爺爺五十年偷銀包嘅功力，真係唔講得笑。
下集：http://bit.do/foBLo
將專頁設定為「搶先看」/ "See first"，最新故仔馬上睇！
我想做閃電俠：https://goo.gl/585hFA
妖魔搵食記：https://bit.ly/2Mp4vBW
#短故 #短篇 #小說 #陳美濤 #廣東話 #粵語 #tomatochan #神偷家族
