【嶼論生成器】撐大嶼共識是如何煉成的
林鄭北上取奏，打手在港吹奏。以往政府大推政策為咗自圓其說都會搵班打手出嚟扯貓尾，近排見到一班「吹奏師」出嚟盲撐明日大嶼，相信明日大嶼又會再度出現喺今次施政報告之中，分分鐘諗用咩方法硬推明日大嶼就係林鄭今次北上取奏嘅其中一個目的。
透過翻查Wisenews 時事資料庫，由2020年起，共有50篇支持發展明日大嶼嘅報導或專欄。輿論勢頭由9月起明顯加強：單計9月已有起碼22篇，而10月頭到今日(16號) 就更有14篇，差唔多每日都有一篇。「吹奏師」來自工商界、經濟學者、鄉議局、建制派及政府御用智庫不等，共同任務係鋪天蓋地式吹捧明日大嶼，製造「社會共識」。等林鄭喺施政報告 (if any) 推明日大嶼，「回應民間嘅訴求」。
隨著民間打破政府「土地供應不足」論述，大眾早已看穿「香港冇地」呢個迷思，填島支持者難以單從「增加土地供應」說服市民，所以而家配合打「告急牌」，話政府一路以來覓地受到重重阻礙，進度緩慢，現時需要加快進度。分析其篇章內容，我地留意到多達13篇嘅文章中大叫「需要加快進度」，不斷催政府快啲上馬填島【註一】，又唔考慮下其他土地選項，只幫政府塑造「緊急」，set好個舞台，只差林鄭上台宣布就可以邀功。
即使今年預算財赤已高達2900億，市民更擔心填島會將庫房清空，但為咗硬推明日大嶼，出現咗好多講法話填島係個投資發大財嘅方法，多達14篇專欄同報導，仲放風話以「賣地花」、「發債」、「私有化」等融資模式去做。政府御用智庫都講到明「明日大嶼項目私人住宅及商業賣地收益料達9,700億至1.14萬億元」【註二】，不諱直認係用嚟賣地賺錢，同造地畀市民嘅預期大相逕庭。有建制派仲講到只要政府發債就必賺，仲話打算學「三跑模式」【註三】。唔好忘記當年三跑又係發債，最後因為填海原材料問題差唔多超支原來嘅造價一倍。呢啲投資發大財嘅論述其實喺將巨額成本直接轉嫁至市民，耗用香港將來幾代人嘅資源同未來，發大財嘅永遠都唔係市民。
即使中途殺出「桂山島」，但政府仍冇放棄明日大嶼，有人講到明「兩個計劃並不排斥。」【註四】，仲見到呢班「吹奏師」繼續對明日大嶼造勢，估計明日大嶼不久可能再次出場，民間需要更大嘅聲音去抵抗呢班「吹奏師」，拆解佢地土地供應不足、投資發大財、打「緊急」牌等各方面嘅論述，同時做好準備迎戰明日大嶼。
#講明必賺十足騙局
#明日大伏
--
【註一】香港經濟日報：明日大嶼莫蹉跎 免淪「後日大嶼夢」 https://bit.ly/3dzF8uJ
【註二】香港經濟日報：明日大嶼倡6模式融資 效益高於成本 團結基金建議 「賣地花」等混合模式發展 https://paper.hket.com/article/2774070?lcc=ae
【註三】香港經濟日報：【明日大嶼】議員憂財政壓力 鍾國斌倡參考機場三跑發債模式 https://bit.ly/377rnSY
【註四】經濟通：《本港樓市》房地產協會：桂山島與明日大嶼，兩者並不排斥https://bit.ly/3j8AVPP
--
🏝 反對強推明日大嶼 支持民間土地研究工作
https://liber-research.com/support-us/
🖥Facebook: https://www.facebook.com/localresearch/
📸IG: https://www.instagram.com/liberresearch/
🎧 Podcast: https://apple.co/3ly0yfw
🖨TG: t.me/liberinfo
🐦Twitter : https://twitter.com/LiberResearch
🎥Youtube: https://bit.ly/2WOIKTk
🧠研究義工報名申請表
https://bit.ly/2SbbyT3
明日大伏 在 香港01 | - Facebook 的推薦與評價
【轉自01深度】內有脫毒建議全文：http://bit.ly/2TWK0Uv #明日大嶼#黃偉綸#01 ... 要說服市民支持明日大嶼政府必先去除兩大「思想毒素」 ... 上-次基建中太大伏。 ... <看更多>