【Quote of the Day】#朋友只得兩個字所以只有兩個知 #MrBusiness
「我們的朋友比想像的少，卻比我們認識的多。」— 霍夫曼斯塔爾
正所謂患難見真情，相信過去大半年，大家都認清邊個係真朋友，邊個只係過路人。
我有個組仔叫Frank，讀大學時夠Social，又有玩最Chur嘅Hall莊，入親校園打招呼都無停手，社交平台「朋友」更加過千人，佢經常以「識得人多」引以為傲。上年佢大學畢業，寄咗幾個月CV無回音，眼見嗰嗰都有offer，屋企人亦旨意佢幫手養家。Frank唯有寄望拉攏關係，甚至喺社交平台發牢騷，睇吓會唔會R到Job，可惜每次只收到類似回覆。
「呢期我比較忙，過咗Peak Season再傾吖！」
「我公司都大地震緊，有機會再幫你留意吓喇！」
「不如你WhatsApp組媽Julia問問，我自己都係岩岩先入職。」
Frank明白時勢艱難，大家都想保住自己份工，所以佢唔奢望一個WhatsApp就得到份工，只係希望「朋友」可以對自己多啲關心，就算吹多兩句講無聊野都好，而唔係有事相求就馬上落閘。Frank開始回憶返讀書時識落每個人，有幾多係真友誼，又有幾多係過眼雲煙。
「Yo~我公司最近請緊人，你有無興趣想見？如果有就Send CV俾我！」有日晨早未夠7點，Frank收到無儲存聯絡人嘅WhatsApp Message。
「Sorry，我之前唔見咗電話，無晒所有聯絡人，介唔介意話我知你係邊個？」Frank講咗一個大話。
「我係Year 1同你玩Hall OCamp同組嗰個阿聰！」
Frank立即打開Facebook，Search返「阿聰」嘅關鍵字。一睇，原來係當日自己嫌人又摺又毒，早已遺忘嗰位阿聰。
