(最後3篇倒數)《或者存在的不存在職業–真相抹殺人》
如果……世界上冇存在過恐龍
如果……世界上嘅歷史書都只係一個虛構故事
如果……世界上，死亡之後存在另一個世界。
如果你知道太多事實，對現實就唔係一件好事。
人類，只要遵重一個故事設定，做好一個角色，已經足夠。
但總有啲人……會誤打誤撞，知道咗一啲「真相」。
可惜，「真相」並不可愛。
一個男人氣急敗壞，高聲大叫：「救命呀！！！！有冇人呀。」
我喺佢背後閃出，對準太陽穴，一槍了結咗佢嘅生命。
「任務完成。知道埃及金字塔秘密嘅人已經死亡。」我向總部匯報情況。
又點會有人估到，金字塔並冇4000年歷史，只係300年前製造，
用意係一個旅遊推廣。
清理現場之後，一個隊員同我講：
「死後有另一個世界，如果有一日到我哋死嘅時候，呢班人會唔會搵我哋報仇？」
我笑一笑：「咁遠嘅事，到時再算啦。」
數數手指，我殺嘅人，冇100都有90。
只係身為「真相抹殺人」，殺人都係等閒事。
或者你都有諗過，咩先係真相？
有時我哋心中嘅「真相」只係社會偽造出嚟。
如果我話你知，植物唔會釋出氧氣，反而係釋出毒素，令人類壽命控制喺80-120歲之間，即係話冇植物，人類會更長命。
咁你會點？當然係全數砍伐，令地球再冇綠意。
不過，如果人類壽命太長，醫療同土地加上天然資源嘅消耗量，根本唔足夠。
所以，有班人決定將植物定義為「生物生存嘅必需品」。
點解你會信植物會釋出氧氣？
因為本書係咁教，人人都咁講。不過，呢種唔叫「證據」，只係一種「宗教」。
但人類呢種生物，正正需要「信仰」去維持生存嘅動力。
根本上「人類」呢個生物定義，本身就係一種信仰。
唯一，只有生死，係必然真確。
突然間，一把聲音響出：「死係好遠嘅事？唔遠呀！今日就係你死期啦！我要幫一班受害者報仇！」
我清楚聽到，聲音由我腳下嘅屍體發出，屍體之中有發送器。
似乎一切都係佢嘅報局。
完全無聲嘅子彈擦出火花，我僅僅避過。
對方身份未明，情況不利，我命令各隊員四散，我需要知道子彈嘅位置。
我躲到暗角，拎起「生物探測器」，方圓百里嘅熱量都會被偵察到。
果然，我已經搵到佢。熟練戰鬥嘅我，用最短時間繞到佢身後，射出致命一槍。
一槍過後，對手倒下，但似乎又是一個陷阱。
「傻仔，呢個假人嚟架，熱量探測器我五年前都唔用啦！」
聲音再度出現。
對面明顯都係專業殺手，但我無懼，因為我身體比一般隊員有更大嘅改造，具子彈抗性，一般衝擊性傷害只能對我做成皮外傷。
我刻意中計，只為引佢現真身。
濃烈嘅殺氣從身後逼近，係機會啦！！！
我知道，佢會開槍射我，但子彈對我冇效。
一轉身，就係我反擊嘅時候。
可惜，一陣激痛傳遍全身，我雙膝跪下，血從背部如湧泉噴出。
「你竟然用刀？」我氣若游絲。
殺手終於露真身：「唔好以為得你知道真相，你哋有子彈抗性，我都調查得一清二楚，畢竟我係專業嘅。」
血就快流光，殺得人多，都會得到一項知識－「就係流幾多血會死。」
不遠矣。
有人錯誤認為，高手過招，總係鬥到天昏地暗，要大戰七七四十九個回合。
但高手過招，往往都係一招定輸贏。
我喺鬼門關來回往返咁多次，今次終於回不了頭。
我問佢：「你係為邊個人報仇…」
殺手冷道：「一個醫生朋友。佢似乎知道咗所有控制人類感情嘅藥物，所以畀你哋滅口。」
瞳孔開始放大：「我記得，嗰個人的確係我殺嘅。我總算唔係枉死……」
離開死亡，只剩3分鐘。或者係命運、或者係一個解脫。
我哋呢班「真相抹殺人」，原本都係將死之人，獲救並受改造，代價就是成為爪牙，成為工具。
好多覺得錯嘅嘢，都要照樣執行。
不過呢一分鐘，我似乎可以做一件啱嘅事。
「殺手先生，我想講啲嘢畀你聽，或者，你可以阻止到人類滅亡。」死亡只剩2分鐘。
「遺言？你想就講啦。」
「你個醫生朋友，整咗部機器，可以將控制情緒嘅藥物隨空氣傳播。佢最危險嘅地方係，連絕望嘅心情都製造到。如果劑量夠大，人類可能會出現自殺潮。我知有人諗住利用佢。令人類滅亡。」死亡只剩1分鐘。
「即係點？」殺手依然未捉到重點。
「如果你阻止到佢，或者人類就有救。有冇興趣做一次英雄？我電話有晒所有資料。如果你答應，我送多一個真相畀你。」死亡只剩20秒。
殺手笑咗兩聲：「好，我冇興趣做英雄，但有興趣聽真相，你講啦。」
「凍奶茶，係唔會令人肥。放心飲。」
我講完，佢聽完，大家都一齊大笑。
望住呢個有半分輕挑嘅人，我都估唔到佢下一步會點做，而且……我已經停止思考。
究竟，剝奪公眾嘅知情權，抹殺真相，係為人類好，定只為一班權力者好？我要先到奈何橋……再搵答案。
＝＝＝＝＝＝＝＝＝＝＝＝＝＝＝＝＝＝＝＝＝＝
大家好，我係一個殺手。喺我眼前發生咗一件頗奇怪嘅事。
我剛才殺咗個男人，拎起咗佢部手機。但呢個時候，一個帶微笑，白衣素服嘅男人無聲無色咁出現。
我嘅殺手觸覺話我知，呢次瀨晒嘢。
「你好，我係長期喺奈何橋服務嘅一位哥仔……我實在唔想有人阻攔我嘅計劃。不如，你就乖乖哋……見證人類嘅滅亡啦，好嘛？」
機器嘅運轉聲音已經啟動，絕望嘅空氣開始傳送……
希望，我仲有飲凍奶茶嘅機會……
（只剩最後兩話）
= = = = = = = = =
PS. 原來不知不覺，呢個系列寫咗成7個月，都係時候要完結啦。心水清嘅朋友都知道，雖然篇篇都獨立，但有啲又暗地裡交集。
剩返2篇，會盡量將故事連結一齊。多謝大家有時仲會Like下睇下！
其他不存在的職業系列Album：https://goo.gl/xh4bbt
如喜歡可以輕輕一Like~
其中推薦：
《賣情感的人》：https://goo.gl/ffjnfy
（就係機器嘅創造人，抹殺人亦同時出現）
《Online殺手》https://goo.gl/ZOERZR
（殺手當時已經出現）
《不幸者》：https://goo.gl/zWKl4A
（冇錯，就係奈何橋哥仔真身）
《防止自殺專員》：https://goo.gl/Ke99Mg
（自殺潮開端）
Ig:cheungson88
*會慢慢Up嘢上去
植物定義 在 芳香精油分享交流天地- 室內植物定義與照顧 的推薦與評價
室內植物定義與照顧，有哪些淨化空氣植物可選擇？ （十種推薦室內植物種植說明） 取自iGarden 花寶愛花園/ 星期五, 4月18, 2014 Q.請問哪一種植物適合養在室內， ... ... <看更多>