死咗八個仔（下）
上集：https://bit.ly/2WXQght
之後嘅事，好似魔咒一樣。
馬太生咗第四個仔，唔夠半個月，個BB就死咗，醫院將死因列為SIDS（嬰兒猝死症，指嬰兒喺一歲前突然無預期死亡）。
馬太生咗第五個仔，半年後又死咗，死因依然係SIDS。
第六個仔出世兩個月後，馬太抱住佢衝入急症室，話BB癲癇發作。
由於搶救及時，BB嘅病情逐漸穩定，可以出院。
但出院唔夠一個月，馬太再次抱住佢衝入急症室，BB已經腦死亡。
第七個仔，三個月後停止呼吸。
第八個女，四個月。
開始有人懷疑，點解每一次，BB夭折或者出事嘅時候，都只有馬太喺佢哋身邊呢？
於是，醫院開始對BB嘅屍體進行詳細檢查，但冇搵到原因。
所以，社會普遍認為，係馬生或馬太嘅DNA內，含有某種致死基因，令嬰兒容易夭折。
呢個時候，馬太已經四十幾歲，經過多次生育，佢身體亦出現咗問題，醫生診斷出佢應該好難再生育。
所以，馬太收養咗一個叫米米嘅孤兒。
我哋都為馬太而高興，只要米米平安長大，相信可以彌補少少馬家嘅傷痛。
但米米兩歲嗰年，馬太抱住佢嚟到醫院。
馬太話，米米瞓咗好耐，一直都冇醒。
結果大家都估到，米米已經死咗。
呢件事終於引起所有人嘅懷疑，既然米米同馬家冇血緣關係，就唔會有致死DNA，點解又會猝死？
同時，有人舉報，喺馬太嘅親生仔女猝死後，佢哋去慰問馬太，見到馬太好平靜咁食緊早餐，好似已經唔再悲傷咁。
喺醫方嘅審問下，馬太終於承認，喺BB喊嘅時候，佢用枕頭焗死咗BB。
原因呢？
馬太自細就係一個平凡嘅女仔，家境普通，本人普通，大個之後亦嫁咗個普通嘅老公。
終其一生，佢都冇受到咩關注。
直到阿花死於腦膜炎後，所有人都嚟安慰馬太。
馬太發現自己成為焦點，俾好多人愛護、安慰同保護。
雖然阿花的確係病死嘅（出世後都冇離開過醫院），但呢場意外令馬太受到好大啟發。
從此，每當佢寂寞嘅時候，就會將隻手伸向自己嘅BB……
佢太過享受呢種被關注嘅快感，即使唔再生仔，都特登領養一個小朋友。
事後，我不斷諗，點解咁多年嚟，都冇乜人懷疑馬太呢？
如果你謀殺同事，無論手段有幾高明，殺到第二、三個，一定會有無數人懷疑你。
但馬太殺咗七個親生仔女，都冇被懷疑。
因為佢係一個母親。
我哋總係假設某啲身份就係善良嘅，虎毒不吃兒，母親就係偉大，母親就唔會傷害自己嘅仔女。
殊不知，你嘅母親好偉大，唔等於所有母親都偉大。
世上冇100%嘅好人，亦冇100%完美嘅身份。
—完—
真人真事改編自Marybeth Tinning謀殺案，1987年，Marybeth因謀殺四個月大的女兒而被定罪，亦涉嫌與之前八個孩子的死亡有關。
但第一個死亡的孩子（死於1971年）從未出院，死於腦膜炎，應非Marybeth所為。
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #死咗八個仔
死咗八個仔 在 艾菲斯劇團《斑馬》演員#黃婉華－ 人每日都要面對林林總總嘅決擇 的推薦與評價
... 8時2022年12月25日上午11時30分｜ 下午4時2022年12月26日至27日下午3時動物園明星 ... 仔救咗個動物保護主義者…… 無休止的遊擊戰中，幾個軍人討論應唔應該詐死，同時 遇 ... ... <看更多>