*嚴禁劇透估劇情*
*粗口自行過濾*
*可瘋狂話戲屎但免人身攻擊*
[1230隔夜超短劇評][無綫][降魔的 第20集]
[讚]
尾嗰幾集每晚都死人，到尾二呢集我以為石敢當都要死，依家畀咗個水晶真身畀小馬，係第二種犧牲推動劇情，叫做有啲轉變。為咗谷呢一段，仲有石敢當始終認為自己嘅降魔天命係最緊要嘅訊息，成集都差唔多畀晒石敢當去做，喺大結局之前再用行力講畀觀眾知大家都要負起自己應有嘅責任，唔好避，唔好沉淪係幻象之中欺騙自己，對小馬、對觀眾都係一個好嘅交代嚟。
到今時今日仲有人問點解仲未降魔，依家編劇答到你好明白，全套劇唔係講降魔，係講人要擔負起自己嘅使命。
成段幻象都係石敢當最希望見到嘅世界：自己係豪仔有媽媽仲可以同啤啤一齊。有為叔叔變咗做大學研究特別力量嘅教授，同晶晶繼續生活。小馬唔再行衰運成日中六合彩仲要同芷若拍拖。莉莉同啤啤唔只係姐妹情深嘅主人玩具而真係一對好好感情嘅姐妹。世界好美好，直到石敢當見到啤啤畀小馬鍚嗰吓，佢冇嬲仲覺得佢哋好幸福之時先至醒覺係幻象，要破咗佢。呢度轉折位同成套劇所講「愛」嘅力量係好配合嘅，啤啤同埋有為最後都係因為對小馬同晶晶嘅愛意，而選擇離開幻象，都係符合返成套劇嘅訊息。
[彈]
幻想世界呢個設計係好嘢嚟，雖然唔係咩新鮮嘢。唔少觀眾留言都話諗起《我和殭屍有個約會3之永恆國度》，尾段馬小靈喺自己嘅幻象裡面嗰一段：況天祐唔係殭屍，況天涯係乖女，馬大龍馬小虎又冇死，開開心心生活。係似嘅，但係唔夠《殭屍3》嚟。點解咁講，就係因為見唔到石敢當嘅內心掙扎。
全套劇不停話魔係所有人心裡面嘅反射，石敢當有咁嘅幻象我就覺得真係佢所想，但佢一直知道自己嘅使命，所以冇講過亦都覺得唔應該去講。但係去到自己所想像嘅美好世界，陷咗入去又唔同玩法。一開始佢唔醒覺喺裡面生活，係幾好嘅，我睇到覺得佢好慘，因為呼應咗小馬成日話「我係個普通的士佬，想好似普通人咁生活落去」，覺得佢哋咁生活都真係幾好。
不過成段太平鋪直敍，呢個明明係好位好設定嚟，石當敢終於可以做人，佢應該係覺得好開心，但胡鴻鈞仍然做到好冷漠，就算係對住幻象中嘅未婚妻啤啤都係一樣，真係浪費。如果佢一開始好投入，例如變咗做一個暖男，好實在咁做返佢幻象嘅角色，覺得呢個生活好正好多愛。到佢開始發現呢個幻想世界有唔妥時，就可以做到個轉變，同埋可以有掙扎，例如係對魔之外嘅幻想人物好似晶晶講話真係好多謝佢嘅養育之恩（同佢返返嚟現實先講個效果差得遠），對莉莉講話佢對啤啤真係好好多謝佢，我淨係寫出嚟都覺得好感動。而且冇咗石敢當好投入幻象生活，就冇咗佢決定離開時嗰種痛苦，成段嘢就好平面平淡。成集咁用咗去，令到成套劇喺推大結局高潮時斷咗道氣咁。
但最慘係馬明喺幻象裡面做到大浮誇。有觀眾留言話馬明咁做係要同現實唔同，我諗諗吓，都係唔認同咁嘅處理。首先係馬明handle唔到，浪費咗咁多集而嚟佢演得好嘅累積分數。第二係呢一段係sell溫情係sell畀觀眾同埋石敢當覺得呢段幻象生活真係烏托邦，咁嘅浮誇演繹對呢一個重點只有反效果。無咗呢個設定，對於佢有錢有女有家人有好運其實一啲都冇支持力。或者會係因為編劇想話畀大家知人有錢會變？如果係呢個目的，馬明個演法內心啲都一樣係得啫。我係可惜馬明咋，依家扣返分。
[演員表]
馬國明 飾 馬季 / 胡鴻鈞 飾 石敢當 / 黃智雯 飾 莊芷若 / 黃子恆 飾 郭展明 / 劉佩玥 飾 Bear Bear / 謝雪心 飾 梁晶晶 / 蔣志光 飾 莫有為 / 金剛 飾 力哥 / 小儀 飾 力嫂 / 趙永洪 飾 些粉 / 何遠東 飾 龍茂 / 余子明 飾 黃小旦 / 陳榮峻 飾 黃良德 / 馬海倫 飾 李翠 / *曾守明 飾 彭應材 / 劉江 飾 郭永城 / 譚嘉儀 飾 莉莉 / 韋家雄 飾 嘟嘟sir / 林凱恩 飾 張佩玲
#1230隔夜超短劇評 #無綫 #TVB #金禧台慶劇 #降魔的 #馬國明 #黃智雯 #胡鴻鈞 #黃子恆 #謝雪心 #蔣志光 #趙永洪 #何遠東 #余子明 #陳榮峻 #馬海倫 #曾守明 #金剛 #小儀 #劉佩玥 #劉江 #韋家雄 #林凱恩
