短講令人淚崩嘅《跨越八年的新娘》
「為咗一個承諾，你可以去到幾盡？」
（有劇透，小心啊～）
—
一年之中，總有幾套戲可以令我忍唔住喺戲院痛哭流淚，而呢啲戲又唔知點解大多數都係日本戲。繼上年年尾《明天，我要和昨天的你約會》之後，《跨越八年的新娘》係我今年第一套失守嘅日本電影，由中段開始崩潰，之後斷斷續續將情緒一直維持到完場，日本純愛電影真係天下無雙。
—
話明純愛電影，就當然係老土，唔洗劇透都會知道，又係絕症囉，又係不離不棄囉，又係靚女靚仔囉，日本純愛電影勁嘅地方在於，縱使一切都係千篇一律嘅元素，日本人總係可以用新嘅角度切入呢堆舊嘢，然後煮成一碗濃濃嘅雞湯，未必係大團圓結局，但你又總可以拎到啲嘢走。
—
《跨越八年的新娘》，戲名都講咗你聽，大概係兩公妻相守八年嘅故事吧？電影最大嘅命題就係「承諾」。男女主角尚志同麻衣識唔夠一年嘅時間，就決定喺佢哋相識一週年果日拉埋天窗，點知女方突然惡疾纏身，變咗植物人，果八年時間就係女主角由發病到康復嘅過程。
—
佐藤健為咗娶土屋太鳳嘅果個未竟嘅承諾，喺唔知未婚妻會唔會醒番嘅情況之下，仍然不辭勞苦咁照顧咗佢幾年。呢個情況其實喺老年人嚟講算普遍，因為老夫老婦相依多年，照顧生病嘅伴侶係天經地義。而《跨》就將呢個情況搬咗去兩個年青嘅男女主角身上，如果你係個男主角，你會唔會為咗照顧認識未夠一年嘅未婚妻，奉上自己寶貴嘅青春？
—
喺輕視婚姻價值嘅現代社會，呢套戲嘅訊息就嚟得更珍貴，拍拖係情侶互相了解，磨合嘅時間，而結婚就係兩個人互相向彼此立吓誓言嘅「儀式」。
—
喺結婚誓詞入面，我哋成日都會聽到人話不論貧窮、順逆、健康或疾病，都會永遠愛對方，但現實又有幾多人會做到？尚志認識麻衣未夠一年，甚至未正式結婚，但佢就為咗兩個人嘅承諾守護住病到唔郁得、痴肥、失控嘅未婚妻，「我會愛你一生一世」得八個字，用三秒就可以講完，但到真正出事嘅時候，又有幾多人可以「信守承諾」呢？
—
信守承諾，但唔迷戀承諾，唔會沉溺於過去嘅美好。麻衣喺醒番之後，發現自己完全唔記得尚志呢個未婚夫（反而記得佢父母），於是佢強迫要自己要記番起以前同個男仔開心嘅時光，點知愈強迫自己要記番起個承諾，就愈痛苦。
—
但去到最後，土屋太鳳發現自己迷戀住過去，而唔記得活在當下，今時今日嘅佐藤健唔係一樣對自己好好咩？舊嘅美好會被遺忘，好多嘢都會隨住時間而退色，但不變嘅係兩個人如昔嘅對望，不變嘅係愛，既然唔記得舊事，點解要選擇放棄，而唔係揀去創造新嘅回憶呢？
—
「一起走吧。」相愛嘅具體行為就係陪伴，就係不離不棄。人生會面對好多艱難，但最重要係有人願意扶住你一步一步一齊行，你慢佢會停低等你，你快佢會盡力跟住你，無話命運無遇到你就點點點，因為你就是我的命運。
—
Sundream Motion Pictures 驕陽電影
