我在大台短暫的日子
七，大台演員印象
暫時咁多篇文，以下呢篇表面上最唔關PA工作事。但其實我地接觸得最多係演員，我地同演員嘅關係可以話仲緊要過我地同導演(導演通常會對工作有更深入了解，識自動波)。感恩我有份嗰套劇入面所有演員都好負責任同專業，某程度上減輕咗好多我地嘅工作壓力。
今次所寫嘅觀感都係喺好耐之前，即2014年之前積落。我諗呢幾年間，好多人(包括我)對大台演員嘅睇法都改變咗好多，特別係比較出位嗰堆。我只係做過一段短時間，我對佢地面對面嘅印象都係嗰陣時接收。我都唔敢想像如果而家仲喺大台做，日日對住啲表晒態嘅演員同事，究竟點可以好愉快順利咁合作。
演員當中，我接觸得最多係嘉欣同Jason，皆因佢地係套劇嘅主角。嘉欣畀我嘅感覺係一個好認真嘅演員，成個拍攝佢特別用心，特別想做得好（即使呢套唔係咩「演技大挑戰」類型嘅片種）。我相信係由於男主角Jason經驗較淺，所以嘉欣認為自己需要負起更大責任。不過認真還認真，佢平時畀我嘅感覺都幾平易近人，日常工作時都係有講有笑。佢幾信任我地幕後，同佢一齊工作係開心、輕鬆，同埋順利。而Jason 就係一個幾Chill同埋easy going 嘅男生。果次佢係第一次擔正做主角，睇得出佢幾興奮。基本上，佢地無帶畀PA任何麻煩之餘，亦好幫到我地減輕工作量(例如係佢地會自己記返自己嘅造型)。再加上兩人嘅友好嘅態度，對成個劇組工作氣氛都好有幫助。
除咗一對主角，對我黎講最有印象嘅演員係羅蘭姐同鄭子誠，因為兩位前輩唔只演技出色，而且戲外亦實在太好人。正如上次所講，羅蘭姐演出無得頂，而戲外嘅佢都好關心後輩。佢見我(地)有壓力，又或者可能有時做得唔係咁開心，佢會主動同你傾計，開解你。大家可能都知道佢係虔誠信徒，我記得有次佢有同我分享佢嘅信仰，好感激佢無私分享。子誠都係，大奸大惡嘅背後(笑)，佢係一位好關心周圍同事嘅大好人。記得有次我地開通宵，休息時唔知點解講起我對大台工作嘅唔適應，佢話可能港台嘅製作會更合適我，提出介紹我過去港台。作為一個渺小嘅PA仔，我實在無言感激佢對我(地)嘅關心（應該係無陰謀嘅！）。
至於同自己差唔多年紀嘅，當時有較多機會同偉洪、天欣相處。偉洪有種傻氣，我覺得好討好，如果放喺今日呢個注重偶像性格嘅氛圍，可能會吸引到幾多觀眾注意。天欣係一個有想法嘅女仔，我覺得佢好有潛質。好可惜佢喺大台嘅發展唔順利，而家退出咗演藝界。另外，我地套劇拍過一場夜總會戲，有幾個襯托住子羚嘅舞小姐小角色。嗰時我地喺一班新演員入員揀咗四位金花，幾位都喺外國返黎，(似乎)對演藝呢行都充滿憧憬嘅女新人。呢幾位演員過去幾年可能有啲大大小小、無關痛癢嘅八卦新聞，然後今日佢地不經不覺咁離開咗呢行(只有一位仲係度，不過無乜好嘅演出機會)。我仲記得同佢地試衫著旗袍時，佢地第一次著傳統中式服裝，覺得好新鮮嘅表情。我相信曾幾何時,佢地都係充滿夢想成為明星嘅年輕人，只可惜轉眼間佢地就消失晒, 可見現實始終殘酷，尤其係娛樂圈呢行。反而佢地之後一兩年出道嘅女新人，好多而家都有唔錯嘅發展，又或者聚集到多少人氣。唔知如果佢地遲兩年先出道，又會唔會有不一樣嘅命運。
另外，因為係單元劇嘅關係，我有幸同好多有實力嘅演員合作。電視台演員每日都開工，而且佢地好多時都會做返相近嘅角色（呢點有好有壞啦），所以佢地（特別係老戲骨們）對每日工作同演出可謂駕輕就熟。佢地好熟知拍劇時應該要釋放嘅能量。有時你睇電影，見某啲「好演技」演員成日好搶戲，演出好誇張，好可能佢地少拍電視。做開電視嘅個個都識遷就大家，恰如其分，有佢地嘅能耐。好似阿蔣(真人都有種智者Feel)、子羚、樂瞳、囉囉攣、Madam、周驄叔等都係好戲、好負責任，同埋對工作人員好嘅同事。即使係而家大家都反感嘅唯唯，我對佢嘅印象亦唔錯。其實唯唯對工作人員好好，有禮貌，唔係鏡頭前嗰隻寸咀款。而且我好記得佢係會睇完劇本，消化咗之後，會設計自己演出嘅演員黎。喺電視台入面佢嗰一輩演員當中，我認為佢係較努力同有天份嘅一位。不過有時咁係咁，有啲演員幕前幕後兩個人，明明幕後形象好但幕前形象好鬼差，呢啲就係觀眾緣。當然，近年佢做咗佢嘅選擇，有因有果，就再無討論空間了。
下回應該係最後一篇，講吓離開大台前後同埋後記吧。
利申：以上都係好個人、好片面、好短暫，而且歷史久遠嘅經歷，並不代表所有PA嘅立場。
(圖片攝於n年前，喺大台嘅大台)
