《報怨以德、以直報怨、十倍奉還》
上一篇文講到歧視，有網友留言話我提倡以德報怨，就算香港人死清光都要以德報怨，一睇到呢個留言時，我真係好想回佢：「試從文中找出以德報怨之論述，30分」，最後我決定由自己去解釋一次，靜咗一陣，我諗起三種說法，以德報怨、以直報怨、以及十倍奉還。
喂，講真，當有人得罪你，你要佢十倍奉還，係幾爽既，電影同小說世界入面，快意恩怨，以牙還牙，以眼還眼，以命賠命都幾令人大快人心。
但講返現實世界，有咩事，係仇恨到要人十倍奉還，而且你又真係做到十倍奉還呢件事？
你覺得自己係Liam Neeson定John Wick？定係你叫半澤直樹？
每日你都會遇到唔同既人同事，有開心亦有唔開心，特別係網上世界，有種人係專搵你開心，係你痛苦上面狂呼，報仇？你點報？先唔講網上呢種咁難搵既世界，現實之中，有個人搵你笨實，你可以點做，報警？打獲佢？呃返佢轉頭？
十倍奉還，比起想像中難，或者只存在係幻想世界入面，令你覺得呢個世界，好人有好報，壞人要仆街，有天理，有天道循環，有報應，有因果之類。
好多人會搞錯，孔子提出以德報怨呢個概念，但孔子係《論語 憲問》之中講到，何以報德？以直報怨，以德報德，而提出報怨以德既，其實係老子《道德經六十三章》。
以德報德，好清晰我就唔講了，以直報德係咩意思？都係後人去推斷，大致上講，以你覺得值得既方式去處理，以你認為公平方式去處理。咩叫值得，就好似有人踩親你，你覺得佢道歉就可以接受，呢種係值得；有人踩到你，你踩返人，呢種叫公平，更甚係，你既方式，對於對方來說亦係公平。
就好似，有人罵你一句，你要殺人全家，咁算唔算係公平同值得呢？我就唔知喇，而孔子佢無講到好清晰，好似耶穌咁舉埋例子，所以，標準係你身上，而做唔做，亦係你決定。
你問我有冇仇恨過，有冇憎過人？當然有，仲唔少，而我有冇報仇？有d都有，有d根本報唔到，通俗講句，你咬佢唔入。當你籌備一輪之後，報仇成功，你會得到咩？咁要細分少少情況，我相信你地報仇唔會去到殺左對方咁厲害啦，咁即係你仇家都仲存在，咁你報仇既方式係對方知情，定唔知情而受害先？如果對方知你報仇，你好自然會擔心佢又再次同你報復，當佢唔肯定係你做既話，你又會覺得唔夠爽，未夠皮。
但最終你得到咩？無，因為你報仇之時，只不過係令你覺得無咁蝕，你受傷你損失已經係事實，當然如果有錢銀上既問題，你可以用法律去令對方賠償更多係另一回事，但通常講到法律去解決的話，又好似同以直報怨有少少唔同感覺。
而最後講到老子，佢提出報怨以德，其實唔係單單講報仇呢件事，而係一種人生哲理：
「為無為，事無事，味無味。大小多少，報怨以德。圖難於其易，為大於其細；天下難事，必作於易；天下大事，必作於細。是以聖人終不為大，故能成其大。夫輕諾必寡信，多易必多難。是以聖人猶難之，故終無難矣。」
前文提到，做人最好咩都平淡看待，為無為，事無事，味無味；後文提到凡事由小開始，由難開始，用面對難題之心去看待問題，最後就會覺得無咁難。
而報怨以德夾係中間，可能係老子佢睇人生之中，報德以怨，係最平淡同安心既做法。
或者咁講會有少少阿Q精神，有人得罪你，你原諒左佢了，你係個好人，然後過得心安理得，繼續朝目標進發。
三種做法，有冇話邊個先正確？無，三種都可以係正確，你可以挑戰自己喜歡既方式，但我提提你，你揀完之後，發現自己做唔到時，你就會有心結，會有怨恨，會令你本來生活更煩躁。
我建議，如果你係John Wick的話，你想點就點啦；如果你係個恩怨分明既人，你就用你方式去解決；如果你係個普通睇化左既人，不如做個阿Q等自己舒服D。
