【我】
你，睇咗啲乜？
趁講開農場呢個話題，不如講下我呢條華僑或者移民死Agent又或者偽中產，點搞呢個咁嘅灰塵咁細嘅Page。每分鐘全世界有幾百萬個post，大家有幸見到任何主頁或者親朋戚友嘅post，肉麻啲講係緣份，坦白啲理解就係FB就著你嘅嘅興趣同喜好「塞」落你個戶口到。無錯喇，正所謂物以類聚，又即係乜人睇到乜嘢。咁各位好勵志咁緊返工嘅時候，轆著部手機，點知會唔會睇到我每日嘅廢人廢話呢？
係唔知，比錢都未知。好似我呢啲文筆唔係好，表達能力唔係高，觀點唔係精闢，又孤寒可以點？都係唔知！我只係知道，要做一個page有人留意認同，那管FB改到有幾貪錢，有幾刁轉，不外乎勤力同內容。呢個係性格缺陷，就算完全唔識或者唔熟（中文如是，寫作更加衰），就算玩都追求自己能力內嘅極致（所以腦都壞埋），因為為興趣都唔湯唔水好難對得住自己。其實每日一至三個post點黎嘅呢？
老老實實，係人肉Organic Contentious Farm，即係日常自己睇睇埋埋嘅新聞，政治，歷史，無無謂謂資訊，然後夜闌人靜，裝一炷香標童出黎嘅。咁緊係有個人立場啦，做人無立場同個人獨立思考睇法，咁同條金魚有乜分別？我唔係大家肚裏面條蟲，亦無匿埋响你地床下底，我只係講自己腦裡面嘅嘢。如果唔好彩大家覺得有同感，恭喜你，可能你同我一樣諗法有相似，即係開始有點儍。
至於聽講我係借呢個Page幫人移民咁仆街，其實都覺得好好笑。講咗九千幾次，移民與否係個人嘅事，移去邊我管不著。有朋友咁啱咁唔好彩想知移民去沒落皇國嘅嘢，乜我平時分享嘅有收錢咩？我都幾肯定，如將呢啲資料轉做簡體放上微博，有紅包添啦。再者，利申咗好多次，認埋係死Agent都唔鐘意都幾有趣？
最後想講嘅就係，我唔知大家鐘意睇乜，亦無辦法知，只係知呢度同本人都會繼續「係咁㗎啦，唔係點喎！」。
#又係長文
#自己睇都覺得反眼
#鏢童寫完直出
#無返睇
#唔改錯
#係任性
#又如何
#如果覺得Maintain個Page咁易
#不如自己試下囉
