Search
【受保兒童 快樂無窮】
生仔要考牌，除咗要識得又唱又跳 Baby shark ，仲要計一計小朋友 touch wood 大病時，你係咪負擔到佢嘅醫療開支。
小朋友嘅身體狀況通常較為唔穩定，好容易就會病，小病小痛可以靠爸爸媽媽份公司醫保去 cover，但不幸有嚴重疾病，就可能會為成家人帶嚟財務負擔。市面上有部分危疾保險係針對嬰幼兒而設計，會保障一啲比較常見嘅兒童疾病，例如自閉症、嚴重哮喘、川崎症等。假如受保人喺指定嘅歲數前患上保單列明嘅兒童疾病，就會獲得賠償。不過要留意，呢類兒童疾病保障嘅賠償一般係保額嘅指定百分比，而相關保障亦會喺受保人達到指定歲數時就會終止。
#生仔要考歌舞牌 #BabyShark #識唱嘅一齊唱 #燕嗦日常 #蓋世保鑑
【醒下啦！公主病唔包㗎！】
公主病發固然無得保，就算公主真係病到入院，都要睇返佢買嗰份係咩保險先知claim唔claim得到。如果鬧完一輪先發覺自己買錯保，咁就唔止公主癌，仲會尷尬癌發作呀！
好多人都分唔清醫療保同危疾保，以為有病就是但claim一種都得。事實上，醫療保同危疾保係兩種完全唔同嘅險種！
危疾保一般係保障嚴重疾病，例如癌症、中風、心臟病等，一旦受保人確診保單內列明嘅指定受保疾病，就會獲得一筆過賠償。危疾保單會詳細列明唔同受保疾病嘅定義，包括具體描述有關疾病嘅醫療狀況。一啲早期嘅癌症或者心臟病，都可能唔符合受保疾病嘅定義㗎。投保人投保同索償前都應該了解相關保單嘅條款，確保自己買嘅係自己需要嘅產品。
至於醫療保係以實報實銷嘅形式賠償受保人嘅醫療費用，之前都有講過兩者嘅分別嘅，冇聽書嘅朋友可以睇返：https://bit.ly/30sUrBb
#停一停 #諗一諗 #係咪了解保單性質 #危疾保險 #醫療保險 #燕嗦日常 #蓋世保鑑
【強化升級登場】
有得玩支援4k嘅遊戲，唔通仲玩8-bit嘅手提遊戲機咩？遊戲upgrade都係為咗帶畀用家更好嘅體驗，其實呢個都係保險公司嘅心聲！
為咗配合社會發展，保險公司不時會推出新嘅保險產品，例如將一啲新嘅疾病或者治療方法納入保障範圍，為投保人提供與時並進嘅保障。
所以呢，投保人唔好疊埋心水諗住一份保單保到老，記得要定期審視自己份保單嘅保障範圍，睇吓有無嘢係當年保唔到但而家可能保得到。有需要可以考慮upgrade一下，確保自己嘅保障同你手上嘅遊戲機一樣咁update！
#保險進化論 #強化版 #燕嗦日常 #蓋世保鑑
