適者生存，香港人必將自動勝利
身為數碼暴龍撚，由細到大，聽親組曲都會好激動，睇返太空館外主題曲大合唱嘅片，大家一齊唱初代嘅歌，情難自控，我甚少流馬尿，都幾乎失守。以前冇特別留意呢首歌所承載嘅係乜嘢情感，直到呢一刻，我諗佢已經超越咗所謂童年回憶，而係民族回憶。
細個我好迷獸人加魯魯，好想好似哥哥咁cool咁型，斬妖除魔思想，上撚矖頭。大個回望，其實數碼暴龍真正嘅主題，係正義之士憑藉精神力量，同邪惡決一勝負，而要戰勝，同伴之間友愛同信任就係不可或缺。精神力量，可以追溯武士道精神，而光明黑暗之爭，則係普世價值，小朋友自細接觸呢種題材，長大成人之後，會成為而家嘅抗爭中堅，合理不過。
數碼暴龍嘅世界觀其實相當原始，相當恐怖，但故事結局話畀我地知，只要勇於冒險，一定可以打敗壞人。每次遭遇怪獸，主角群都唔會輕言放棄，而係一再激發潛能，不停進化，就係明證。數碼世界裡面正邪難分，連成年人都唔可靠，亦同我呢一代人所身處嘅香港相當相似——九七大限殺到，香港有難，有能者竟然紛紛移民，淨低手無寸鐵嘅香港人艱苦奮鬥落去。面對如此殘局，焗住自立，焗住堅忍，就成為無處可逃者嘅求生技能，佢地越練越剛強，到最後就成為馴獸師，負起拯救世界嘅責任。
數碼暴龍嘅誕生，源自成年人犯錯，收拾局面嘅理應係佢地，而非小朋友。具備人工智能嘅病毒因為黑客於網絡犯罪而擴散，吸收世界上各種數據，逐漸形成有自我意識嘅生物，亦即數碼暴龍，問題本應由成年人善後，但成年人無法應付現實世界破局，只知逃避。主角群走入虛擬領域，究其原因，只因惡勢力無處不在，而佢地心存希望，寧死不屈。
此之所以，「越搏鬥戰意便高企／自信碰跌了又再起」，要奮戰到底，只因「堅決相信／為戰友我定必勝利」。戰鬥路上，人性光輝日益閃耀，反映「越探索世界越優美」，而世界如此美好，就係要「奮鬥到廿六世紀」嘅理由。自由民主，香港獨立，一切都係因為離唔開自己土生土長嘅地方，同埋一切同居於香港嘅人，所以「堅決相信／為了愛我定必勝利」就成為小朋友嘅共同信念。
惡勢力並唔可怕，因為我地知自己為乜而戰，我地路線稍有分歧，但終極理想都係捍衛香港。中共壓境，我地無畏無懼，所以「只要出手／氣勢勁到飛起」，而為咗捍衛理想，分工合作，部署準備都毫無難度。能量自體內爆發，可以「即刻變大個」，係因為我地自細就已經擁有外人終其一世都無法理解嘅成熟意志，所以對手再蠻橫，我地嘅戰意都唔會熄滅，「一激起我就有火」就係香港人精神。
我成日講精進自身，意思其實正係「最好的／必須再練過」。只有保持倔強，同時三省吾身，至有可能「逐個反擊對方一個二個」，原因在於，其實每場戰爭都係同自己戰鬥——就算輸，都一定係輸自己未做得夠，冇得諉過於人。用遮擋唔住，我地用保鮮紙；保鮮紙都變成基本，我地用埋雪糕筒同蒸魚碟，源頭滅彈；中國軍警混入香港警察，我地都一定有方法拆穿佢地嘅詭計。精神力量無敵，任何怪物都唔會攔得住我地，全因我地真係輸唔起，好想贏，而且好好好好撚努力。
不論時代有冇揀中我地廿幾歲呢輩人，我相信，只要精進，只要團結，每個時代都可以係我地嘅時代，而香港都一定會自動勝利。物競天擇，適者生存，十年之後，香港人會唔會成為究極進化體，就睇我地心入面嗰團火可以燒得幾旺。
*原圖求出處，畀返credit
物競天擇適者生存出處 在 這個世界真的是適者生存嗎？淘汰一說從何而來？【LIS科學史 ... 的推薦與評價
這個世界真的是 適者生存 嗎？淘汰一說從何而來？【LIS科學史】(達爾文- 物競天擇 )(更新版) · Comments60. ... <看更多>