【on.cc 東網專訊】無綫藝人張振朗（Owen）、謝東閔（Brian）、王卓淇及陳松伶（松松）日前於將軍澳一間酒店拍攝無綫新劇《全職沒女》搶花球戲份。
搶花球場口緊張刺激
飾演婚禮化妝師陳松伶「手下」的Owen及Brian，為了幫助「沒女」松松奪得花球瞓身博到盡！「畀女圍」的Brian、成功靠其身高擊敗姊姊團眾對手「跳出」重圍，他搶到花球後就「殺波」畀張振朗，呢個時候玩水玩到濕晒嘅張振朗，就飛身撲落地救「波」，最終將花球送到High爆的松松手上。事後滿頭大汗的Brian就獲劇中女友王卓淇擦汗，畫面sweet爆！
卓淇阻Brian轉移視線
問到飾演情侶的卓淇及Brian有否「撻着」？曾與卓淇拍攝咀戲的Brian口花花地說：「撻着咗啦！」卓淇聞言後即反斥對方「亂噏」，又笑稱要踢爆Owen及Brian的「HeHe」情！她說：「雖然劇中我同東閔一齊，但劇外我係佢同振朗嘅第三者！今日振朗帶埋私家相機嚟演攝影師，本來以為佢會幫我影靚相，但相機入面竟然全部都係謝東閔！」Brian就搞笑表示想與Owen扮演「HeHe」情侶：「最好不過啦！我哋咁夾又friend。」Owen則笑言自己不時被導演錯認為Brian：「導演成日叫我做東閔，又叫佢做振朗。最搞笑係有次我哋被合體，導演叫咗我哋做『振東』！」
