瑞士童話鎮[龍疆]
龍疆小鎮真係好細，遊覽小鎮完全靠步行根本唔需要攻略。雖然係咁但都要講幾句嘅。上次就講向左走，今次講向右走。
琉森開往因特拉肯嘅火車下車後，你可以向左邊往山上走，亦可以向右邊下坡到湖邊。 從火車站往下走，經過一層一層民居就到達湖邊。 基本上每個地方都會見到湖水所以唔會迷路。湖邊有一個迷你水上樂園，夏天可以游泳划船滑水梯。今日只有20度，勇敢嘅歐洲小朋友竟然暢泳，真係厲害。 如果水上活動啱嘅 (⭐可以坐纜車上Turren 觀景台從置高點俯覽整個龍疆湖) ，從火車站向湖邊方向走路二十分鐘就會到達纜車站。坐纜車到Turren 可以飽覽整個伯爾尼茲阿爾卑斯山脈Bernese Alps 包括： 艾格峰Eiger、僧侶峰Mönch 、當然仲有大名鼎鼎少女峰Jungfrau及龍疆鎮全景 ！纜車開放時間冬夏不一，確實開放時間請參閱官方網站
https://www.turren.ch/
(⭐如果揸車嘅朋友可以去到另一個觀景台Viewing Point Schoenbuehel 都係可以飽覽整個龍疆全貌) Bahnhofstrasse 24, Lungern 6078, Switzerland
(⭐呢度除咗欣賞湖光山色仲有一個好靚嘅童話式湖邊教堂， 依山而建簡直好似一副巨大的風景油畫。有興趣的朋友可以走走) 。純樸嘅龍疆村莊碧水湖畔嘅風情 ， 街上遊客只有兩三個。這樣的瑞士童話鎮每走一步都是風景。實在令人迷醉純凈之美。
值得一提嘅係，往返琉森嘅火車係一個小時一班。 呢度有兩條路軌 (月台1 月台2)，我仲懶醒以為來回係用不同嘅路軌。(正常呀, make sense) 。臨走嘅時候我無睇到邊個月台..... 嗚嗚嗚..... 火車終於嚟喇(僕你個街亞視嚟嘅, sorry 係僕你個街對面路軌嚟嘅) 。我九秒九衝過地下隧道跑過對面月台， 只差一點點，火車就咁頭也不回地走咗。 就係咁，我鳩等多一個鐘。
呢一個鐘我學咗三樣嘢！⭐第一 ，月台嘅廁所係要畀五毫子瑞士法郎。淨係收一個五毫子嘅瑞士法郎硬幣， 如果冇硬幣就真係幫你唔到喇。⭐第二，呢個月台只有兩三部零食售賣器。如果肚餓就要去鎮仔嘅餐廳which is 火車站對面嗰間，which is 我行咗一個鐘都唔見到有第二間 ！⭐第三，呢個月台真係鬼影都冇隻，冇人工售票窗口，所以緊記要自己買定來回車票！
了無人煙嘅龍疆小鎮，雖然對遊客帶來不方便，但正因為咁才更能保留佢純潔寧靜嘅塵世美貌！
#一個人的童話 #瑞士 #龍疆 #瑞士龍疆 #龍疆湖 #瑞士童話小鎮 #瑞士 #童話 #童話小鎮 #阿爾卑斯山 #童話教堂 #瑞士教堂 #現代塵世美 #塵世美 #寧靜山村 #純樸美 #瑞士山區肺 #lungern #lungernsee #Alps #艾格峰 #Eiger #僧侶峰 #Mönch #少女峰 #Jungfrau #龍疆鎮 #ch #switzerland #summer
