有飲食集團話要加入年青新血，
八卦睇吓招聘賣點係咩，
不外乎人工高，升職快，福利好。
你話呀？
唔係呀，佢話架。
我成日覺得搵工同拍拖有啲似，
邊個SELL邊個都好，
條件幾好幾差又好，
唔試過唔知夾唔夾。
時間耐咗，
你想要嘅同對方俾嘅又會唔同，
行到幾遠係需要天時地利人和。
一份工同一份感情一樣，
都係give and take。
當中總係有啲野係糖，
有啲野係屎。
糖同屎嘅比例就因人而異啦，
畢竟每個人接受能力都唔同，
甚至咩係糖咩係屎都有唔同準則。
喺我心目中，
有一樣野係揀一份工當中好緊要嘅「糖」，
而係好少公司會將佢攞嚟做賣點，
就係一個「好／唔衰嘅老細」。
可能呢樣野好主觀啦，
同埋一間公司又好難保證你阿頭做到幾時，
實在係好難實牙實齒講出嚟做賣點。
況且佢寫出嚟，
你都唔信啦。
但點解呢樣野重要？
因為我聽過真係好多人唔係嫌間公司啲咩，
而係因為頂唔順個上司而辭職。
咁咩係「好／唔衰嘅老細」？
我相信所有打工仔都講得出一大堆條件：
唔當下屬係下屬，將心比己；
指示明確；賞罰分明；
教到你野⋯⋯下刪一萬字⋯⋯
如果再宏觀啲睇？
一個「好／唔衰嘅老細」，
其實係可以令一個員工以至一間公司，一個集團傳承到咩嘅文化。
你老細手勢係點，
做細嘅特別係FRESHMAN不期然會受影響，
唔係個個都可以出於污泥而不染，
或者經驗少，
都分唔到染缸嘅水質係點。
久已久之，
辦公室政治自然會留低合乎「老闆」準則嘅人。
有一班咩嘅上司，
就有咩嘅員工聚集，
從而洐生咗一個點嘅工作環境同文化。
所以，
一間公司可能可以sell嘅唔止係人工/福利/晉升，
仲可以強調「定時重整高層架構」。
除咗鞭策一眾年資、經驗值高嘅上司唔好成為OLDSEAFOOD之餘，
又確保員工去到邊個部門都有一個優質上司，
唔會跟錯奶媽，
而將來員工亦會潛移默化做到一個當年佢佩服嘅恩師。
所有野都係一個循環嚟，
要員工飲水思源，
不妨由「源頭減廢」做起。
而我地千千萬萬嘅打工仔，
唔係剩係搵一個上面望落嚟覺得你OK嘅老闆，
而係你望番上去，
你都覺得自己將來想成為一個同佢一樣咁OK上司♡
#2021 #三五成群 #圍爐日常 #圍爐散文集 #圖為我老細擺靚靚 #我知咁多字無咩人會睇 #所以攞老細幅美圖嚟呃like等自己覺得有人會睇
