終於睇完魷魚遊戲，說實話，我比較喜歡今際之國。
不過，今日突然間收到小學同學嘅電話，寒暄了幾句，佢話睇咗呢部劇之後諗返起我哋以前小學做嘅衰嘢，我小學同中學都成日做好曳嘅事，搞到被見家長。
被整蠱同整蠱人，我可以小學、中學各列兩項例子。
小學：
朋友叫我去佢嘅生日會，我儲咗好耐零用錢，終於儲夠錢買咗一份禮物俾佢，去到佢屋企，原來嗰日唔係佢生日，純粹係整蠱我。頂佢個肺，搞到我期待咗一個月，因為佢屋企有遊戲機，當時我屋企太窮，買唔起遊戲機。
我六年級嘅時候，我隔離位摷咗女同學包M巾出嚟周圍傳，真心，當時我哋並唔知道依包係M巾，搞到我哋被佢話我性騷擾。見家長嘅時候，老師話我滿腦子黃色思想，點解淨係見我？因為我隔離嗰位同學係好曳但係讀書好叻嗰啲學生（我依家都係滿腦子黃色思想）
中學：
中學嘅時候讀觀塘瑪利諾，都算係一間出名嘅男校，特色係同對面嘅男女校相差只不過10米距離。印象中有位班長好乞人憎，同學夾手夾腳買了四本鹹書，摺紙飛機飛去對面學校，抬頭寫「吳鎮宇」（唔震乳），飛機上面寫晒個班長個名。
又試過有位同學超級變態，好鍾意去廁所撈屎，放入保鮮袋入面，去天台高空掟落去係小食部食飯嘅同學張枱上面，我冇參與，不過喺樓下睇，其實喺樓上掟更加壯觀。
去到澳洲，我都仲係好頑皮，有機會再分享。
相信大家都有個呢啲咁不堪回首嘅童年回憶，可以分享吓。
