《我係窮郵差，專門幫陰陽相隔嘅親人送信》（1)
陳師奶激動到鼻水眼水飛到成檯都係，喊晒口咁話：「我⋯⋯同我老公分開咗已經兩年啦，哩兩年嚟我每一晚都好掛住佢⋯⋯每一晚都夢見佢⋯⋯」
「最掛住呢⋯⋯係佢把磁性又迷人嘅聲音⋯⋯」
我望住陳師奶抹面張紙巾，紙巾好唔情願咁畀佢蹂躪，由乾爽潔淨捽到濕潤霉爛。
「你係咪真係有方法可以畀我同佢傾計㗎？」
「哦⋯⋯可以，陳生嘅名係？」
「佢叫陳小黑。」
「好，妳等等⋯⋯」我開始起勢Chok張枱，Chok到地震咁：「陳小黑，陳小黑⋯⋯⋯⋯魂兮歸來！去君之恒干，何為四方些？」
「老公⋯⋯你係咪返咗嚟呀，我好掛住你呀！老公！」
「我已經感覺到陳生返緊嚟。好強烈嘅感覺，嚟緊⋯⋯嚟緊！」
呯！
我個頭好大力咁轟落張枱度，凹咗少少⋯⋯個頭。
「⋯⋯老⋯⋯公？」
「老公，你係咪返咗嚟呀？係就講句野啦⋯⋯」
「老公！？」
「喵～」
「哎呀，老公真係你，我認得你把聲呀！」
「喵～喵喵～喵～」
「老公！我好掛住你喔！」陳師奶好激動咁攬住我。
「喵喵喵喵～喵～」
「老公～老公，啜啜啜～」
陳師奶啲口水鼻水開始流到我成身都係。
做我哋哩行無奇不有，將貓當成老公，都唔算係啲咩新鮮奇怪事。
試過有一個客，都係師奶嚟嘅，姓黃，話要搵返隻牛。（師奶客人特別麻煩）
「牛唔可以係family呀？」佢好理直氣壯咁兇我。
「可以⋯⋯當然可以啦。」
5分鐘後⋯⋯
「哞哞哞哞哞哞哞哞哞～」（翻譯：我過得好好呀，住嘅地方夠晒凍。）
凍？即係唔喺香港啦。黃師奶本來覺得，搵到外國一戶好人家都唔錯嘅，好過住喺香港受苦。
黃師奶掩掩心口，一臉安慰嘅樣話：「Well，咁baby你而家live喺where ar？Iceland定Norway？」
「哞哞哞哞～」（我喺雪櫃。）
「雪⋯⋯吓雪櫃！？」
「哞哞哞哞哞哞哞哞～」（我而家係一盒$7.6嘅維記朱古力奶）
講返正題先。
接落嚟嘅三十分鐘，我都不停咁喵喵喵，等陳師奶同佢「老公」傾餐飽。
「多謝你呀南門先生，我終於知佢過得好好，我安樂啦。」陳師奶臨走前，好滿足咁同我講。
「唔洗客氣。最緊要幫到妳。」
我抹一抹汗，強裝笑容咁講。
陳師奶擺低封利是就走咗。
我有一秒認真諗過，陳師奶係咪真係識聽貓話。
一秒之後，我已經無再去諗，因為有人連牛話都識聽。
事先聲明，我並唔係問米。
因為動物嘅魂，同人嘅靈係兩種system處理，去嘅地方好唔同，人係去另一個地方。
至於點解我知，事源喺我十五歲嗰年，全世界都發現我好瞓得。
企企下喺操場集會會瞓，考考下試會瞓，連過過下馬路都會瞓。
我只能夠坐校巴返學，因為搭巴士無人叫一定會瞓過龍，明明又一村落都會變咗杏花村。
用今日嘅醫學標準，我係患有極嚴重嘅發作性嗜睡病，即係渴睡症。
「瞓夠未，南門亮？同我企係度！」
「係⋯⋯」
「日日上堂就瞓覺，小息瞓都算，你連跑跑下九分鐘都瞓著？！你到底夜晚有無瞓覺㗎？我真係要叫你媽咪嚟⋯⋯喂，你仲瞓！？我鬧緊你㗎！你仲瞓！？」
老師發覺罰我面壁思過係無用，因為我思思下都會瞓咗，所以漸漸地佢都放棄咗我。
直到有一次，我拎簿落去教員室時，毫不意外咁，我又抱住成班啲簿瞓咗。
喺嗰次瞓覺，我發咗一個夢，夢入面嘅我去咗一個不知名嘅地方。
嗰個地方好寧靜。
無現代嘅高樓大廈，只有十九世紀嘅汽車、人力車，周圍都係古舊日式和室嘅屋，古色古香，混合住英式殖民地風格嘅建築，仲有一個奇大無比嘅夕陽同一條流到邊際嘅長河。
就喺我沉醉喺風景之際，有個紅裙、扎馬尾嘅女仔突然出現喺我眼前，同我講：「你係未死嘅人，做咩會嚟咗陰間？」
我唔識應佢，佢眼神閃過一絲頑皮同奸邪，轉眼間就已經搶咗我手上拎住嘅簿，跑走咗去，無論我點追都追唔到佢。
到我醒返之後，我竟然發現我抱住嗰堆簿，真係唔見咗。
「你點可以因為無做功課就收埋同學嘅簿㗎？」
老師認為我係為咗逃避責任而講大話，其他人都覺得我係講笑。
「現實嘅野又點會帶到去夢入面呀，你係咪太攰分唔清現實？」
「但嗰個世界好真實⋯⋯」
即使嗰日，我被人罰留堂，我依然覺得，係有另一個世界嘅存在。
因為我感覺到，嗰個女仔係一個真實存在嘅人嚟。
我決定再試驗多一次。
我選擇咗喺一個月黑風高嘅晚上，臨瞓前，攬住我阿妹隻米妮公仔瞓覺（因為唔見咗都無咁心痛）。
如果真係有另一個世界，咁我喺夢入面放低隻公仔，返到現實真係唔見咗嘅話，就證明我真係無估錯。
結果，醒返之後，我張床真係唔見咗隻公仔！
真係有嗰個世界嘅存在！
我好激動咁衝去同細妹講哩個咁驚人嘅消息：「細妹！真係唔見咗呀！」
佢第一個反應唔係慶祝我成為陰間哥倫布，而係一巴摑埋嚟話：「衰人！唔準再拎走我隻米妮！」
佢摑咗我一巴之後，我先發現米妮就喺佢手上⋯⋯
不過咁，自此以後，我瞓覺抱緊嘅野，偶爾都會唔見。
哩件事畀媽咪知道咗後，佢一直都好擔心，帶我四處去走訪名醫。
途中有一位年紀好大、白髮長眉嘅伯伯中醫，佢話佢識少少『哩啲嘢』，就同我媽咪講：
「夢可以係一個神秘嘅渠道，有足夠時間進入更深層睡眠，通去『另一個世界』都唔係咩奇事。」
伯伯話，有時人會喺夢誤闖『另一個世界』，但即使個夢幾奇怪，大部份人醒咗之後都會唔記得，只不過一般人嘅睡眠時間都唔足以進入『嗰個世界』。
佢對住媽咪講：「因為你個仔天生有渴睡症，比人更容易進入深層睡眠，人哋瞓八個鐘，佢兩分鐘就得，所以天生有能力接觸『另一個世界』。」
媽咪望住我嘅眼神，我到今日都仲記得，係好憂心嘅目光。
「不過要小心運用哩個能力，否則佢二十歲之後會有一場大災。」中醫伯伯最後警吿。
可惜，我從來都唔覺得哩種係咩超能力，反而渴睡症對我生活帶嚟種種不便。
老師：壞學生，又瞓覺！
同學：怪人睡魔，好奇怪！
M記經理：點解你可以將啲薯條炸到變黑色！
做地盤唔得、做文員唔得、做司機更加死得。
「南門亮，你係咪真係鍾意我㗎？」
「Zzzzzzzzzz⋯⋯」
「喂！南門亮！！」
我人生好似玩完咁。
當你以為畢業搵唔到工，人生玩完之時，仲有更弊嘅事。
喺我二十二歲嗰年，我返到屋企，發現所有屋企人都唔見晒。
媽媽、細妹，喺一夜之間消失晒，無再返過嚟屋企。
亦喺嗰年，我遇上前輩。佢問我：「有無興趣運用你天賦？」
「吓？」
「你可以一邊搵親人，一邊返工。」
「⋯⋯吓？」
「有無興趣做郵差？」
就係咁，我做郵差嘅故事就開始。
FB：https://www.facebook.com/coooooolicecream/
鍾意就LIKE & SHARE~
畢業搵唔到工 在 剛畢業搵唔到工？ 我地可以係加拿大幫你搵到NOC B... 的推薦與評價
剛畢業搵唔到工？ 我地可以係加拿大幫你搵到NOC B 類工（管理級）加埋移民？ 申請到PR 後，直接可以申請埋父母移民過加拿大！！！把握加拿大最後黃金機會⚠️申請 ... ... <看更多>