關於 畫重點人應該凌駕於錢之上而唔係被錢操控 ，我們在網路上蒐集到這些相關的討論、資訊與評價

有段時間冇做人物專訪，今日想同你哋介紹一個我認識多年嘅朋友 - 嘉盈。
嘉盈係 DE BON TON 嘅創辦人，依家嘅時勢創立一個品牌好困難，究竟點解佢會有呢個決定？

以下為對話節錄

問：嘉盈，其實識咗你咁耐都唔知道你成長背景，可唔可以同我分享下？

當然可以，我係頭一批90後，元朗屋邨出身，典型處女座，內向慢熱，父母為咗養活屋企長時間都外出做嘢，基本上整個童年我都係放養長大。

當時家庭經濟比較有壓力，記得啱啱上中學嘅時候唔敢買新書因為太貴負擔唔起，同媽咪走去二手(應係幾手)書店拎住學校書單逐本逐本格價嚟買。即使有啲課外活動想參與，基於學費要額外再比嘅情況下怕父母有壓力主動講唔想再學。

依家回想返，其實我非常感激有呢個經歷。

當時同學們都擁有最新款嘅Nokia電話(相當於依家人手一部iPhone)，真心講當時自己十多歲年輕氣盛亦會想擁有，喺一星期只有100蚊午飯錢(當年一碗永年三餸車仔麵係20蚊，一碗台式炸雞扒麵係30蚊)又唔想攤大手板問父母攞錢嘅情況下，第一次嘗試喺網上做生意，當時問媽咪借咗兩千蚊，入咗一批colour con喺Yahoo!拍賣度賣，買入賣出幾轉就已經可以還返本金俾媽咪，再額外賺到錢可以買新電話。漸漸越來越多賣家都參與咗呢門路，利潤越來越少後來就冇繼續做了，但係呢個經驗令我踏進左網上世界同做生意嘅大門。

問：咁你畢業之後做過咩工作㗎？點解會想做一個時裝品牌？

大學期間喺電訊公司做兼職賺生活費學費，畢業後做過唔同嘅工作，基本上都圍繞唔開網絡、扮靚、時裝、美髮、美妝、珠寶、公仔、營銷推廣等。記得啱啱出嚟做嘢第一次出糧第一件事就係買衫，後來見得多咗就知心中想要嘅野動輒萬萬聲，想像即使自己月薪10萬個月都唔會捨得買。

腦海入面突然彈出個念頭，點解我唔自己整？？？經歷過無數次失敗，吸取經驗之後再嚟過再失敗再嚟過下刪千次，用上乘嘅材質再加上頂級手工，所有女人都值得擁有同負擔得起嘅作品誕生左喇，DE BON TON終於面世。

問：創業總有一定門檻，你係點樣克服嘅？

喺創立之際當然會遇到重重困難，投資成本更加係大難題，為咗盡量減少不必要嘅支出，社交媒體、網頁、拍攝、推廣、搵廠家、存倉、物流等等都由自己一手包辦，以往嘅經驗終於派上用場。

講咗咁多其實係想比而家嘅年輕人知道，我明白依家社會風氣偏向每個人都要有好背景好學歷，學習知識固之然係重要，但家境唔好讀書唔叻嘅你亦唔需要怯，返學只係一個微型社會預先俾你學習點樣同人相處，即使長春藤系列嘅畢業證書都只係踏入社會嘅一張高級入場券(在此並沒有貶低學歷好嘅人)，入場之後可以行到幾遠先係考驗你實力嘅時候。問清楚自己內心真真正正鍾意乜嘢想做乜嘢，自己又有幾多能耐，行行出狀元，心地好識做人做事心理質素高已經佔咗成功一半，時刻保持謙卑嘅心，感激每一個幫過你嘅人(包括害過你嘅人)，經驗需要無數失敗嚟建立，困頓令你破釜沉舟，老土啲講跌低唔緊要，最重要學識爬番起身，堅持令你強大，遇到機遇嘅時候能夠有力捉得住，幸福唔係必然，珍惜每一樣你擁有嘅嘢。

唔需要羨慕人哋有富爸爸，金錢只係一種令生活相對舒適便利嘅工具而已，人應該凌駕於錢之上而唔係被錢操控，亦唔需要同其他人比較，自己只需要同自己交代，好好分析自己有啲乜嘢，可以點樣運用，願意付出幾多(時間、努力、心理同生理健康等)，簡單啲講即係你可以去到幾盡，每一個人都有自己特別嘅經歷而成就今日嘅你。

-完-

#創業唔容易
#畫重點人應該凌駕於錢之上而唔係被錢操控
#再畫重點唔需要同其他人比較，自己只需要同自己交代
#再再畫重點每一個人都有自己特別嘅經歷而成就今日嘅你
#DEBONTON