七個月。
三月二十日，係我正式失業嘅第一日，咁樣就過咗七個幾月。
失業頭一個月，芬蘭返嚟隔離嗰14日入面，前前後後總共寄咗30幾封CV，申請做Graphic Design/ Marketing Assistant/ Social Media，封封都石沉大海，連一個面試嘅機會都冇。
既然冇路行，就自己開條路出嚟。同自己講，馬死落地下，試下全職做呢個page睇下搵唔搵到食，試半年唔得就去做保險或者考個保安牌乜都好。
呢七個月入面，試咗好多新嘢，試過拍廣告、有品牌搵我畫插畫、去做分享嘉賓、有品牌搵我拍片介紹產品等等。除此之外，又幫人做埋平面設計，總之就乜都試、乜都做，為咗爭取到一個機會，我厚面皮到差啲唔認得呢個係自己。
喺啱啱轉型嗰陣，我對外宣稱我唔再係一個空少，慢慢傭仔已經冇再著住空少制服，嗰陣見到啲followers每日百幾百幾咁跌……都明嘅！曾經我嘅主要觀眾係航空業呀嘛！但原來當我唔再畫航空嘢嘅時候，就算畫咗五年，一個unfollow嘅掣係撳得係何求咁輕易……
但係，一個已經離開航空業嘅人點樣一直畫航空嘢畫到老。所以，我知道我唔可以再停留，我必須要move on，我必須要轉型……
後來，機緣巧合養咗勿演，我嘅插畫又搵到個新題材，然後又有一啲新嘅人開始認識我。之後，又越嚟越來人畀機會我，搵我做嘢。到咗而家，已經冇好似一開始咁憂柴憂米，基本上日日一擘大眼都有好多嘢等住我去做。
前幾個月，又遇到白紙市集，由零開始去策劃一個以旅行為主題嘅市集，於是又開始咗日畫夜畫嘅幾個月。
好多謝你哋，無論係新follow我定follow咗我好耐，多謝你哋睇我畫嘅漫畫，聽我講嘅故事。一直follow我嘅人，好多謝你哋冇離棄過我，陪我行過呢個艱難嘅2020年。
呢度並冇好高超嘅畫功，亦冇好高潮疊起嘅橋段，只有一個微不足道嘅小伙子、默默耕耘嘅追夢故事。
聽日係第一次以我嘅插畫為主題嘅市集－《疫市旅行日記》，到時仲有機會聽到我嘅登機廣播。
See you tomorrow💛
白紙 市集 申請 在 White Market | Tsuen Wan - Facebook 的推薦與評價
(◍•ᴗ•◍)想入場嘅朋友記住買定飛! 有興趣參加我哋今次高雄市集嘅香港檔主們✨ 報名傳送門： ... ... <看更多>