[方以文問兩句][魏焌皓]
喺《不懂撒嬌的女人》裡面，差唔多每個角色都喺愛情同埋事業之間徘徊，唯獨是鐵仁對Molly一條心，等足4年。今晚嗰集鐵仁知道佢嘅女神Molly要結婚，佢個衝擊係幾咁大。有觀眾話鐵仁咁做好傻，又有人話佢為咗一棵樹放棄成個森林。不如等飾演鐵仁嘅魏焌皓講兩句啦。記得follow佢嘅facebook page 魏焌皓 Nathan Ngai。
****************
問：有人覺得《不懂撒嬌的女人》裡面嘅鐵仁專一，又有人覺得佢咁等Mall姐係戇居。你點睇佢等足Mall姐4年？你又會唔會等一個鍾意嘅人4年？
答：我就覺得一啲都唔戇居，每個人鍾意嘅嘢同需要嘅嘢都唔同，而且現實當中都好多姊弟戀嘅成功例子。如果我認為呢個人係值得我去等嘅話，我都一樣會等，但喺現實生活中，又邊有咁容易遇到一個對的人～
****************
問：點樣去準備鐵仁呢個角色呢？
答：雷鐵仁呢個角色其實同觀眾睇到嘅一樣，簡單鮮明，非黑即白。演嘅時候要話畀自己知唔可以放棄，就算明知故事結局鐵仁追唔到Mall姐，但係每一場戲都要同自己講最後一定追到佢！（按：好壯烈﹗）
****************
問：鐵仁點解會金毛中分？呢個髮型係咪你自己設計呀，如果係點解咁設計呢？你覺得鐵仁襯唔襯呢個髮型？有人話你呢個造型似江華，好可能係似金蛇郎君。
答： 其實髮型嘅野，最緊要啱返個角色，我嘅職責係盡力將戲演好，梳頭化妝當然係交返畀劇組處理，其實我覺得都幾襯啊😆（按：一邀請魏焌皓講兩句，佢就問我係咪講個髮型，睇嚟佢都收到好多意見，哈哈～）
****************
問：之前拍《使徒行者2》隻手骨折，發生咩事呀？依家情況如何？
答：拍戲嗰陣跌親囉～意外嘅嘢冇人想嘅，依家拆咗石膏，做緊物理治療。
****************
問：好多觀眾認識你都係由《On Call 36小時》（2012年）嘅張一康開始，之後同觀眾密集式見面就係《愛‧回家》（2015年）嘅Henry，跟住就係《不懂撒嬌的女人》（2017年）嘅雷鐵仁。你對呢三個角色有咩感想？隔兩三年先有一個角色爆出，對於演藝路途嘅發展同成長，你心唔心急？
答： 張一康無疑係我最難忘最喜歡嘅一個角色，因為其實人物性格同我本人都好相似，當時劇本都加咗好多我本人嘅元素落去，而我都好畀心機去演。當時開劇前2個月，我問劇組借咗輪椅返屋企練，成日坐住個輪椅周街去，想體驗殘疾人士嘅日常生活，而街上面亦都真係會有好心人幫手上上落落過馬路。 而《愛‧回家》嘅Henry，就帶畀我好多磨練，無論演技上或者心境上面，我都感覺到有所成長。 鐵仁呢個角色我都有好大嘅期望，依家有咁多觀眾留意同埋支持鐵仁我都好感謝、好感恩，希望大家會鍾意鐵仁啦。
對於演藝路上，話唔心急就呃人嘅，08年踏入TVB，一直堅持到依家，都唔係一段短時間，經歷嘅嘢都唔少，慢慢學會自我調整，學會當發生事情嘅時候用另一個角度去睇一件事，時也命也，學會用感恩嘅心看待自己嘅人生。 哈哈，好似越講越遠～
****************
問： 除咗以上呢三個角色，你有冇一啲自己演過好鍾意嘅角色呢？點解咁鍾意？
答：除咗以上三個角色，我都真係仲有好多好鍾意嘅角色，包括《結‧分@謊情式》入面嘅Perry，同埋《神鎗狙擊》入面嘅狙擊手林伯榮，可以同張兆輝輝哥一齊拍戲，學到好多野。仲有《戀愛季節》入面嘅嗰個薑啤，同糖妹有一段似有還無嘅感情線。《飛虎2》入面嘅古惑仔船長，暗戀鍾嘉欣。《醋娘子》入面嘅捕快英明，同卓羲杏兒一齊開工好開心，亦都學到好多嘢啦。同埋《性在有情》嘅層敏俊，一人分飾兩角。
啊……重有微電影《愛神搭錯線》入面嘅泰國愛神，人生第一次出國，劇本非常有趣，非常吸引，好可惜放映時間太短只有大約40分鐘。（按：《愛神搭錯線》係2013年喺J2播嘅微電影，有梁烈唯、苟芸慧、楊秀惠等演員。）
****************
問：你咁強橫嘅腹肌，要花幾多時間去keep呀？依家好似套套劇都要你剝衫喎。
答：健身呢樣嘢，其實真係要付出好多時間同努力，不過對我嚟講最重要係訓練到我嘅意志力同埋耐性。
****************
問：之後會喺咩作品見到你？最近又忙啲咩呢？
答：嚟緊上映嘅《使徒行者2》將會有我嘅演出，係我入行以黎最有挑戰性嘅一個角色，好希望可以得到大家認同。目前我仲係工傷狀態仍未復工。
****************
問：最想挑戰啲咩角色？
答：入行咁耐以嚟，都係做好人居多，其實我好想試下做大反派。
****************
按：原來一康呢個角色準備咗兩個月﹗畀心機做，觀眾會睇到。希望魏焌皓佢愈做愈好愈多機會。最緊要係快啲好返，入返劇組﹗
#方以文問兩句 #魏焌皓 #無綫 #TVB #不懂撒嬌的女人 #OnCall36小時 #愛回家 #結分謊情式 #神鎗狙擊 #戀愛季節 #飛虎2 #醋娘子 #愛神搭錯線 #性在有情 #使徒行者2
