【醫護是如何被當成condom的】
公立醫院醫護計劃下星期一發起大罷工，抗議政府死都唔肯封關。港共軟硬兼施，一方面道德勒索，另一方面又威逼恐嚇，左媒甚至指責醫護欠缺使命感云云。未忘人倒想問一問，完成使命以後，政府又係點對待醫護人員呢？
經歷過沙士嘅朋友應該記得，當年政府不斷推崇醫護為抗疫英雄，但打緊仗就緊係撐啦，疫後又如何呢？未忘人就同大家回顧下，當年政府點對待一班佢哋口中嘅抗疫英雄。
免費治療承諾走數
截至2006年初，醫管局跟進嘅600至700名沙士康復者個案，大約有130個因為曾採用高劑量類固醇治療而患有骨枯。眾所周知，骨枯除咗造成行動不便，重會帶嚟難以忍受嘅劇痛，而且基本上係冇得醫。除咗生理病情之外，心理病亦不容小覷。2009年聯合醫院曾經做過沙士研究，90 名病人(當中包括27 名醫護，佔整體近三成)之中，疫症爆發兩年半後，有近六成病人患有某種精神病，同時有四分一人出現創傷後壓力症等精神情緒問題。
政府當時承諾為沙士康復者提供終身免費沙士後遺症治療，講得好聽，但實際上就係另一回事。2005年約有 300名康復者反映出現心律不正、視力衰退等問題，之前已經有研究指出呢D係類固醇嘅副作用，但醫管局就拒絕承認屬沙士後遺症，因而未有得到免費醫療。
曾經長時間協助沙士康復者嘅香港社區組織協會彭鴻昌喺2013年回顧時更指出，醫院管理層初期對康復員工唔多友善，覆診幾乎要行勻全港醫院，例如有員工要接受精神科、骨科同內科診治，就要分別去瑪麗、威爾斯同瑪嘉烈醫院覆診。幻想下患有骨枯，重要環遊全港咁去覆診就知有幾慘。翻查資料，醫管局足足去到2005年先設立7間家庭醫學專科診所，為佢哋提供一站式跟進。
強制復工
沙士期間，多達334名醫管局員工受感染，疫情兩年後只有約200名員工可以重投工作，去到2006年仍然有18人冇辦法重回崗位。《蘋果》引述政府中人就話，冇復工嘅員工只係冇信心踏出第一步，「佢哋應該嘗試，佢哋都未去試過」，重強調會繼續「鼓勵」佢哋重投職場。但實情係有瑪嘉烈醫院護士，疫後患上創傷後遺症、骨質疏鬆、脊骨退化、肺部纖維化、腎上腺素失調多種頑疾，雖然嘗試復工但身體始終支持唔住，然後甚至因為返工嘅情緒問題影響到個仔都患埋情緒病。康復者已經咁慘，政府重想佢「嘗試」到咩地步呢？彭鴻昌亦直言，部份員工嘅身體狀況根本唔理想，醫管局逼佢哋返工係不近人情：「佢哋有啲仲吸住氧氣，點叫佢返工啫？」得閒死唔得閒病唔單止係港人生活寫照，原來重係醫管局對沙士康復員工嘅要求。
阻撓索償
所謂講錢傷感情，無論平日醫管局班官講嘢幾得體都好，但一講到賠錢就即刻變臉。當年沙士涉及三百幾個員工，賠償金額當然唔講得少，醫管局見走唔到數，就一於奉行拖字訣。一拖拖足兩年，只有247名倖存醫護(包括公營同私家)獲安排判傷，當中獲勞工處簽發評定補償金額證明嘅更加只得70人。但協助佢哋嘅職工盟李卓人引述政府消息，醫管局其實早有符合工傷資格嘅醫護名單，但就偏偏唔公布。然後，第二日醫管局就話保險公司日前已經將承認屬於「工傷」嘅名單交俾勞工處，局方會喺嗰個星期通知員工。換言之，即係醫管局真係手執名單但刻意拖字訣啦。
不過咁都未算最無恥，醫管局重利用恩恤金誘使員工放棄民事索償。事緣醫管局被指喺疫症期間因為疏忽等原因令員工平白染上沙士，因為就有最少30名醫護興訟，誓要討回公道。但有入稟嘅醫護表示，局方會向經勞工處判傷並承諾唔循民事追討僱主疏忽嘅員工，額外發放一筆同賠償金相若嘅恩恤金。然而，對於由律師協助追討工傷嘅員工，局方就唔會發放恩恤金，令人不禁懷疑此舉係要懲罰民事索償嘅員工。
冷血涼薄
尤記得當年一班高官對於殉職醫護爭先恐後去悼念致哀，但相對於對死者致最後敬意，喺關懷生者方面，班官就似乎冇咁大熱忱喇。明愛醫院一位臨時服務助理因工感染沙士，喺深切治療部留醫23日，期間接受5次肺部手術，即使最後康復但肺功能只剩不足兩成，被診斷為完全喪失工作能力。但佢出院21個月以嚟，醫管局居然從來冇派人前來慰問，令佢都不忍唔住直斥局方涼薄。無他嘅，班官只係親身示範no photo no talk啫，冇記者影相咁點解要做？
不過未忘人必須澄清，班官實際上唔係涼薄，而係冷血。2006年《經濟日報》就引述消息人士，喺沙士聆訊期間，有醫管局高層卸膊話部分醫生及護士自行買口罩後受感染，責任不在局方。須知道當年物資匱乏不下今日，醫護自行添置防具根本無可厚非，如果醫管局能夠提供足夠裝備同資訊，或者根本唔會有咁多人受感染。講得出呢番說話嗰個官，根本就冇人性。
總結
講到使命，到底係前線醫護唔肯抗疫，定係班官冇做好本份，提供適切支援與保障？昔日政府當醫護condom用完即棄，今日陳肇始居然重夠膽講擔心醫護人員情緒，未忘人真係聽到打冷震。遠嘅唔講，剩係舊年流感高峰期，醫管局幫醫護打氣都只係派幾粒魚蛋燒賣，那邊廂黑警飯錢都已經洗咗1億啦。醫護人員如果有情緒問題，完全係班庸官一手一腳做成。
不過更重要嘅係，醫護罷工救嘅唔只係自己而係全香港，如果政府唔封關同埋準備充足防護裝備俾醫護，社區爆發指日可待，到時根本冇人可以獨善其身。前事未忘，後事之師，希望大家都合力，唔好俾沙士嘅悲劇重演。
為免個post淹沒於一片口罩post之中，share之餘順便幫手推下post啦😘
#前線唔係condom
#小背心眼鏡娘
#不能只有我看到
#LikeAndShare
