回到過去，發現阿媽嘅缺點（下）
上集：https://bit.ly/3v8ENHr
我已經無言以對。
阿媽又講：「最近呢，有個讀緊HKU嘅男仔，成日嚟超市搵我，一見到我就面紅。我同佢傾過計，知道佢家境幾好，人品又好。」
阿媽拎張相畀我睇，正正係後生嗰陣嘅阿爸。
「我嫁畀佢嘅話，就一世都唔洗做啦。」阿媽嘅表情已經變咗心心眼。
就係咁，我睇住中三學歷嘅阿媽，憑住美貌同愛情手段，輕易地征服咗雖然讀HKU，但喺感情方面仲係好單純嘅阿爸。
過程中，我完全冇幫過阿媽。
應該話，我都唔知應該點幫佢好。
後來，阿爸阿媽舉行婚禮，我都有參加，仲真誠地祝福咗佢哋。
我知道，佢哋嘅婚姻會好幸福。
阿媽得到夢寐以求嘅顧家金龜婿，阿爸得到賢妻良母式嘅好老婆。
只係，諗起阿媽以前對我嘅「教誨」，我條氣有啲唔順啫。
婚禮過後，我就穿越番去屬於我嘅時代。
我一睜開眼，就聽到阿媽把聲：「勤勤，起身去補習啦。」
「我想瞓多陣。」我下意識答。
床邊嘅阿媽開始嘆氣：「我細個成績好好㗎，可惜屋企窮，冇錢繼續讀書。依加有錢畀你補習，我真係好想……」
「咪住！」我忽然問阿媽：「你唔係唔鍾意讀書，所以中三就輟學㗎咩？」
阿媽有少少慌亂：「邊個同你講呢啲嘢？」
我問：「你記唔記得，你後生嗰陣，有個朋友都叫勤勤？」
阿媽諗咗一陣：「係，我結婚之後，就同佢冇聯絡，但佢同你有咩關係？你哋只係有少少似樣。」
穿越番到九十年代之後，我嘅外貌自動都產生咗改變，所以阿媽先冇發現我就係佢當年嘅朋友。
「我仲知道，你諗住嫁一個家境好，又叻仔嘅好男人，下半世都唔洗做。阿媽，你成功咗啦。」我衝口而出。
呢次到阿媽呆咗。
阿媽好似接受唔到「我知道晒佢嘅過去」嘅現實，匆匆行出我間房，冇再逼我去補習。
我沾沾自喜，以為自己已經脫離咗怪獸家長嘅掌控。
點知第二日，阿媽又出現喺我床前，叫我去補習。
「你又想講，你以前好勤力，內在美係最重要？」我用一副「洞悉一切」嘅表情望住阿媽。
「唔係，我想講……」阿媽清一清喉嚨：「你唔起身補習，我就扣你零用錢！」
我呆咗。
「仲有你年尾咪約咗同學去旅行，你唔畀心機讀書，就冇得去！」
被識穿之後，阿媽徹底放低咗佢嘅大道理，而係用零用錢同自由威脅我。
我都試過笑佢，後生嗰陣想釣金龜，但佢慚愧咗唔夠五秒，就理直氣壯咁壓迫我。
甚至阿爸聽到呢件事，都係一笑置之，佢同阿媽結婚咁多年，夫妻恩愛，點會再在意阿媽當年嘅動機。
壓迫你嘅人，總有冠冕堂皇嘅藉口。
重點係「佢想壓迫你」，而唔係藉口本身。
即使你破解咗個藉口，你以為自己處於道德高地，佢只會轉用強權壓迫你，令你更冇反抗嘅餘地。
—完—
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #回到過去發現阿媽嘅缺點
