【凍得好值得！】
今早返工，同teammates走去位於山上嘅屋邨擺街站，介紹服務，招收會員…
擺咗兩個幾鐘，吹到儍，凍到震！！！
手指凍到硬咗！寫字有啲歪曲！不過絕對值得！
因為我哋成功招攬咗九位新入伙老友記做會員！
獨居嘅林伯，77歲，篤住柺杖，拎住一大袋蕃薯同黄芽白準備返屋企…
佢俾義工成功截停，帶咗佢嚟我度。
我同佢傾偈，先知佢由港島搬嚟，新居入伙唔夠廿日，名符其實人生路不熟！
區內設施唔識、左鄰右里唔識、邊度有餐廳唔識、邊度睇醫生唔識、邊度買餸都唔識！
嗰兩袋蕃薯同黃芽白原來啱啱搭巴士跨區返舊居筲箕灣買返嚟！
即刻同佢入會，介紹義工俾佢認識，約定聽日帶佢去街市買餸同返中心參觀！
林伯眼含淚光，好感動！
我收咗佢$21會費，送咗盒迎新禮物俾佢…
「林伯，歡迎你入會，呢盒長壽麵係送俾你嘅迎新禮物，食咗長命四十年！」
林伯笑咗，我見佢排牙唔多整齊，一個個窿…
得知佢攞長者生活津貼…
「下次帶埋紅簿仔嚟中心，我幫你申請埋關愛基金，送埋副假牙俾你！」
林伯大驚…
「幫你約牙醫免費幫你整假牙咋！」
林伯恍然大悟…
「姑娘～多謝妳！」
雖然手腳凍到震，但我凍得好開心！
林伯～歡迎你！下次見～
