催淚彈！
劇場版 #紫羅蘭永恆花園
今日終於睇咗 #京紫 劇場版優先場，故事設定係正傳故事之後，女主角Violet 通過成為人偶，接觸唔同類型嘅人，理解何謂「愛」之後，終於知道念念不忘嘅少佐尚在人世......
少佐喺正傳故事中，一直只係出現喺回憶入面，今次終於正式登場，交代返佢係戰後嘅去向。作為女主角一直以來嘅精神支柱，到底佢點樣睇自己當初收留Violet 嘅呢一個決定？
除咗Violet同少佐嘅感情線，同埋郵局一班見慣見熟嘅角色之外，今次劇場版仲有另外兩個新角色，佢哋嘅故事線一直喺主線劇情內穿插，通過佢哋嘅故事，觀眾更能理解少佐同violet想見不能見嘅掙扎，而其中一位更加係正傳故事入面一個重要角色嘅親人，雖然佢哋嘅故事唔係發生係同一個時間點，但係共通嘅，係佢哋都同樣唔擅長向親人表達內心真正嘅感受，究竟佢哋點樣通過書信或其他通訊工具，向最愛嘅人表達感激之情呢？
我覺得今次劇場版好成功咁承接正傳故事嘅劇情，續寫左一個關於愛情、親情嘅感人故事，加上京都動畫一直以來嘅高水準製作，唔少在場觀眾都睇到熱淚盈眶。科技不斷進步，通訊工具同方式亦不斷變化，但無論點，人類似乎一直學唔好點樣珍惜眼前人，所以強烈推薦聽眾入場一睇，希望睇完嘅你可以更勇敢、更無保留咁，向最愛嘅人表達「愛」。
多謝 Medialink 連紙巾都準備好
#京アニ 請繼續努力
