【職場談判術 有讚亦要有彈】#職場談判術 #MrBusiness
日常職場環境當中，少不免需要同其他人交流，自然有機會牽涉到談判，不論談判對象大小，都需要運用智慧同經驗先可以贏得談判桌上勝利。
「今次campaign不如試試拍片，依家好多人習慣用電話睇片，仲出Graphic好似好悶。」
「你可以買依部最新型號notebook，文書處理煲劇打機做設計咩都得。」
好多時務求令對方跟從自己意見，或者想做主導決策角色，先入為主以為將所有優點好處如數家珍「晒冷」，就是壓倒對方贏得談判的最佳方法，但事實證明並非如此。嘗試換轉角度，如果對方向你力sell一個看似毫無缺點的計劃，你都會反問自己「有無咁大隻蛤乸隨街跳」，情況就似舊時街邊拍賣會，件家品又平又好用又限量又買大送細，唔買就笨，以為執到筍貨，但返到屋企就知「中伏」。
反而談判中你對自己提出的建議有讚有彈，將正反意見都呈現，對方會欣賞你不作隱瞞，有助建立一種互信關係，最後更大機會促成理想談判結果。雖然如實相告，但要注意提出的缺點都無傷大雅，否則就適得其反了。
「今次campaign不如試試拍片，依家好多人習慣用電話睇片，雖然budget同人手方面要預鬆少少，但效果一定會比用Graphic好好多。」
「你可以買依部最新型號notebook，文書處理煲劇打機做設計咩都得，雖然機身重少少同舊電續航力弱少少，但你放屋企其實問題不大。」
