【夏蟲不可以語於冰、井蛙不可以語於海】個Page真係好多「夏蟲」同「井蛙」
本來一個自言自語嘅Page，多得大家支持，慢慢變到多元化。就係因為多咗唔同嘅話題，就多咗好多咗唔同嘅朋友留言。對於五毛類嘅物種，佢地本身就係一個笑話，只係比多一個娛樂我。而唔同政見嘅人，我多數都會理性討論，基於言論自由，大家諗法唔同係可以理解嘅。
但係，令我覺得最麻煩，而又難於理解嘅就係一啲自以為有「真知灼見」嘅「夏蟲」同「井蛙」。有時候我對厘類人，都唔知點對待佢地好。因為我本人嘅國籍與及居住地响英國，我嘅Page自然係會多講英國嘅周遭嘅嘢啦。咁我同時亦係香港人，咁我關心香港事，亦唔係好神奇喎。
好奇怪，每一兩個post，總有一啲既唔關政見問題，亦唔係「五毛」嘅「夏蟲」會留言，極多數都係大叫一下，就係咁多。佢地嘅言論不外乎係，「英國有乜好，比我都唔去。」、「你嗰本英國passport當年送比我都唔要呀！」「食fish n chips 食到你儍咗呀，X街！」、「你留番响英國等死啦！」「香港幾好都有， 貪英國天氣差呀？」、「你個死agent，叫人移民，呃生意！」、「英國咁好，永遠唔好番香港。」等等…
網絡無錯係一個言論自由嘅世界，基本上講乜都可以。我可以出post嘅時候，其它人亦能夠comment。不過，點解厘類「夏蟲」提出嘅嘢永遠都只係以自己嘅諗法為中心，而毫無討論價值嘅怪叫呢？厘啲網絡怪叫言論，對我黎講真係好似醉酒佬咁，一唔高興就周圍大叫同瀨尿一樣。
我唔知大家點睇，至少我覺得私人嘅facebook或者社交平台，去抒發情感係完全正常不過嘅事，每個人都會（包括我在內）。但係去到公眾嘅地方，大家分享討論嘅時候，點解有咁多人覺得自己可以留一句半句無內涵嘅嘢，自我認為可以「秒殺」其它人呢？
要明白所謂嘅一句「秒殺」嘅評論，係需要邏輯、理性、智慧、經歷、見識、眼界、學問，而最重要係有common sense。以上嗰啲怪叫言論，我就唔覺得有任何上述嘅成份。點解依家咁多人會覺得自己係 #WinstonChurchill 呢？
而啲「夏蟲」自己寫完，除咗只係宣泄咗自己嘅情緒，排泄幾兩之外，其實有無其它意義呢？要人點回覆你？話你叻，你地肯定唔係。話你蠢，又驚你嬲。同你講道理，又驚你唔明。
結果，我試過唔同嘅方法，最後都只可以係hide同block。不過，我想鄭重咁講清楚，我唔係怕咗厘啲「夏蟲」同「井蛙」。而係我每次都係當自己個Page係一個公眾場所，作為一個有公德嘅人，見到醉酒佬响度瀨尿一樣。唯有保持地方清潔，同盡法趕走啲無謂人，比其它正常人享用。
唔該厘啲「夏蟲」同「井蛙」亦要明白，個Page係我管理嘅，我選擇唔hide唔block，只係我有風度。但係出醜嘅係你地，而一定唔係我。當比人hide或者block嘅時候，亦唔代表自己型咗，只係好肉酸咁比人趕走，係咁多。
#自己低質就唔好扮嘢
#出黎亂叫之前唔該去見識下先
#人老唔代表個人醒咗
#確定咗自己係有腦先去秒殺啦
#自己肉酸都唔知
#夏蟲不可以語於冰
#井蛙不可以語於海
